Կիրակի երեկոյան ավարտվեց վերջնաժամկետը, որը Վրաստանի իշխանություններին ներկայացրել էր «Տուն՝ դեպի Եվրոպա» հասարակական շարժումը: Խոսքը վարչապետ Իրակլի Ղարիբաշվիլիի ու նրա կաբինետի հրաժարականի ու ազգային համաձայնության կառավարության ձեւավորման մասին է: Ընդդիմության կարծիքով՝ իշխող «Վրացական երազանքն» ի վիճակի չէ կատարել Եվրահանձնաժողովի 12 պահանջները, որոնք անհրաժեշտ են Եվրամիությանը անդամակցության թեկնածուի կարգավիճակ ստանալու համար: Այդ իսկ պատճառով, ըստ ընդդիմության, Վրաստանում հասունացել է փոփոխությունների անհրաժեշտությունը:
Ընդդիմությունը ժամանակից շուտ է սկսել բազմահազարանոց հանրահավաքի նախապատրաստությունը։ Արդեն շաբաթ օրը կենտրոնական Ռուսթավելի պողոտային, որտեղ գտնվում է խորհրդարանի շենքը, հարող հրապարակներն ու այգիները լցված էին մարզերից ժամանած այցելուներով, սկսվել էր բեմի, էկրանների, ակուստիկ սարքավորումների տեղադրումը։ «Լելո» կուսակցության ներկայացուցիչները չեն թաքցնում, որ կազմակերպվել է Վրաստանի տարբեր շրջանների բնակիչների անվճար տեղափոխումը Թբիլիսի։ Ընդդիմադիրների բնական մտահղացմամբ՝ վճռորոշ պետք է լինի մարդկանց թիվը, ովքեր ընդդիմանում են «Վրացական երազանքին»։
Ողջ շաբաթ՝ վերջնագրի ներկայացումից հետո, հասարակական ակտիվիստները քարոզչական այցելություններ են կատարել ողջ երկրում: Դրանցից ոչ բոլորն են, սակայն, անվնաս անցել։ Ընդդիմադիրները հաճախ են բախվել իշխող կուսակցության հակաքայլերին: Նման «պատահականությունները», որպես կանոն, վերածվել են ծեծկռտուքի։ Սա եւս մեկ անգամ հաստատում է իշխող շրջանակների եւ նրանց հակառակորդների անզիջողականությունը, ինչպես նաեւ փոխզիջում փնտրելու փոքրագույն ցանկության բացակայությունը։ Էլ ի՞նչ կարելի է ասել, եթե օրերս Թբիլիսիում ԱՄՆ դեսպանատան կազմակերպած ընդունելության ժամանակ ձեռնամարտի են բռնվել «Վրացական երազանքի» անդամներն ու ընդդիմադիր հեռուստաընկերություններից մեկի ղեկավարը։ Ըստ խայտառակ միջադեպին «Վրացական երազանքից» մասնակցի՝ ընդդիմադիրն իր հասցեին առանց որեւէ պատճառի «այնպիսի վիրավորանք է հասցրել, որը Վրաստանում վաղ մանկությունից ոչ ոքի չեն ներում», եւ ինքը միայն ստիպված է եղել վերականգնել իր պատիվը։ Հակառակ ճամբարի մեկնաբանությունները հակառակ բնույթ են կրում. «Վրացական երազանքը» վերջնականապես կորցրել է իր դեմքը եւ աննախադեպ խայտառակություն է կազմակերպել ԱՄՆ դեսպանատանը։ Այս մասին գրում է «Նեզավիսիմայա գազետան»:
Չափավոր ընդդիմադիր «Գիրչի» կուսակցության ղեկավարներից մեկի՝ Վախթանգ Մեգրելիշվիլու խոսքով՝ Վրաստանի գլխավոր խնդիրը հենց այն է, որ երկու քաղաքական սուբյեկտները՝ «Վրացական երազանքն» ու «Ազգային շարժումը», կոշտ դիմակայության մեջ են, դա արդեն շարունակվում է երկար տարիներ, եւ ոչ ոք չի պատրաստվում ինչ-որ բան փոխել: Նա այս փուլում անհրաժեշտ է համարում անցկացնել երկրի իրական ապաօլիգարխացում, այլ կերպ ասած՝ առաջարկում է ազատվել «Վրացական երազանքի» հիմնադիր Բիձինա Իվանիշվիլուց, ով ձեւականորեն ոչ մի պաշտոն չի զբաղեցնում, բայց շարունակում է լրջագույն ազդեցություն ունենալ պետական կառավարման վրա, մասնակցում է քիչ թե շատ կարեւոր կադրային բոլոր որոշումների կայացմանը եւ, ընդհանուր առմամբ, որոշում է երկրի քաղաքականությունը: Դա դժվար է ապացուցել կոնկրետ փաստերով, եթե այդպիսին չդիտվեն նախկին բարձրաստիճան պաշտոնյաների խոստովանությունները, որ իրենց պաշտոնանկությունը Իվանիշվիլու հետ հակասությունների հետեւանք է: Մի խոսքով՝ հուլիսի 3-ին խորհրդարանի շենքի առջեւ հսկայական բաներ է հայտնվել՝ «Մահվան թագավորի» կերպարով. հանգիստ կարելի է կռահել, որ դրա տակ նկատի են ունեցել Վրաստանի ամենահարուստ մարդուն:
Վրաստանում ծայր առած ծայրահեղ տրամադրություններին աջակցում են նաեւ եվրոպական որոշ քաղաքական գործիչներ, ովքեր հայտնի են Սահակաշվիլու հետ իրենց մտերմությամբ: Նրանց մեկնաբանություններում գրեթե բացահայտորեն նշվում է, որ Վրաստանի ժողովուրդն արժանի է ավելի լավ կառավարության, իսկ ներկայիս իշխանություններն ի վիճակի չեն իրականություն դարձնել «դարավոր երազանքը» եւ ինտեգրվել Հին աշխարհին:
Թբիլիսիի վրա ճնշում է գործադրում նաեւ Կիեւը, որտեղ այդ ուղղությամբ լրջորեն ակտիվացել է Ուկրաինայի Գերագույն ռադայի «Ժողովրդի ծառա» խմբակցության ղեկավար Դավիդ Արախամիան: Նա անընդհատ կրկնում է, որ վրացական իշխանություններն օգնում են Ռուսաստանին՝ շրջանցելու արեւմտյան պատժամիջոցները, եւ խոստանում է ապացույցներ հրապարակել: Նրա խոսքով՝ «Վրացական երազանքի» հիմնադիրը՝ միլիարդատեր Բիձինա Իվանիշվիլին, ներգրավված է «ահաբեկչության հովանավոր երկրին օգնության գործընթացում՝ շրջանցելու պատժամիջոցները»: Արախամիան շեշտել է, որ այդ տեղեկությունն ստացել է ԱՄՆ կատարած այցելության ժամանակ:
Վրացական իշխանությունների արձագանքը վրացական ծագմամբ ուկրաինացի պատգամավորի հայտարարություններին, իհարկե, շատ բացասական է: Ինչ վերաբերում է բուն երկրի ներսում ընթացող գործընթացներին, «Վրացական երազանք» կուսակցության նախագահ Իրակլի Կոբախիձեն կիրակնօրյա միտինգի նախօրեին երկարատեւ բրիֆինգի ընթացքում հայտարարել է, որ իշխանություններն արդեն պատրաստ են կատարել Եվրահանձնաժողովի 12 պահանջները՝ Եվրամիությանն անդամակցության թեկնածուի կարգավիճակ ստանալու համար: Նրա խոսքով՝ օրերս կձեւավորվի իշխանության ներկայացուցիչներից եւ ակտիվ քաղաքացիական հասարակության անդամներից կազմված հատուկ խումբ, որը կզբաղվի Վրաստանի ապաօլիգարխացման վերաբերյալ օրենքի մշակմամբ, ինչը, ըստ էության, Եվրամիության ներկայացրած գլխավոր պահանջն է: Բայց բանն այն է, որ Եվրոպան եւ վրացական հասարակության ընդդիմադիր մասը՝ մի կողմից, «Վրացական երազանքը»՝ մյուս կողմից, տարբեր կերպ են պատկերացնում ապաօլիգարխացման գործընթացը: Եթե առաջինները դրա իրականացումը պատկերացնում են քաղաքական բոլոր գործընթացներից Իվանիշվիլու հեռացմամբ, ապա «Վրացական երազանքը» հայտարարում է, որ Իվանիշվիլին ոչ մի պաշտոն չի զբաղեցնում, քաղաքականությանը չի մասնակցում, եւ ապաօլիգարխացումը վերաբերում է միայն ընդդիմադիր շարժման մի շարք ղեկավարների՝ արդեն բանտում գտնվող նախկին նախագահ Միխայիլ Սահակաշվիլու գլխավորությամբ:
Հենց դա նկատի ունենալով՝ «Լելո» կուսակցության առաջնորդներից մեկը՝ Բադրի Ջափարիձեն, ԱՄՆ Ժողովրդավարության ազգային հիմնադրամի ղեկավար Դեմոն Ուիլսոնի հետ հանդիպումից հետո հայտարարել է, որ «Վրացական երազանքը» չի կարող կատարել Եվրահանձնաժողովի առաջարկությունները, ուստի պետք է ձեւավորվի ազգային համաձայնության կառավարություն: Նրա խոսքով՝ ԱՄՆ-ը կօգնի Վրաստանին այդ գործընթացում։ «Վրացական երազանքի ներկայացուցիչների բոլոր հայտարարությունները, թե ԵՄ-ին անդամակցության թեկնածությունը ոչինչ չի նշանակում, սուտ են։ Սուտ է նաեւ, որ Եվրամիությունը մեզ կարգավիճակ չի տվել, որովհետեւ Վրաստանը չի ներքաշվել պատերազմի մեջ։ Սա դեմագոգիա է եւ ռուսական քարոզչություն»,- ասել է Ջափարիձեն։
«Տուն՝ դեպի Եվրոպա» ակցիայի մասնակիցները, ովքեր հունիսի 3-ի լույս 4-ի գիշերն անցկացրել են Թբիլիսիի կենտրոնում՝ կառավարության վարչակազմի շենքի մոտ, երեկ փորձում էին խանգարել կառավարության նիստի անցկացմանը: Կառավարության շենքի մոտ հավաքված մի քանի հազար մարդիկ պահանջում էին, որ գործադիր իշխանությունը պետք է հրաժարական տա, եւ ամբողջությամբ կատարվեն Եվրահանձնաժողովի պահանջները: Երեկ ողջ օրվա ընթացքում իրավիճակը Թբիլիսիի կենտրոնում լարված էր, ինչի հետ կապված՝ մոբիլիզացվել էր ոստիկանությունը:
