Ռուս-ուկրաինական հակամարտությունն էականորեն ձեւափոխեց Երկիր մոլորակի աշխարհաքաղաքական քարտեզը: Այն այսօր որոշիչ է պետությունների, ինչպես նաեւ տարբեր կազմակերպությունների հետ հարաբերություններ կառուցելու գործընթացներում: Տնտեսության առումով միջազգային փոխհարաբերություններում ամեն օր ավելի են ուրվագծվում ՌԴ-ի դեմ պատժամիջոցներին միացածների ու չմիացածների բեւեռները, ինչին համապատասխան էլ նրանց հետ կառուցվում են տնտեսական հարաբերությունները եւ քաղաքականությունն ընդհանրապես:
Այսօր արդեն միանշանակ է, որ ՌԴ-ի դեմ սահմանված պատժամիջոցներն էական ազդեցություն են թողնում ոչ միայն ՌԴ-ի, այլեւ պատժամիջոցներին միացած երկրների տնտեսությունների վրա: Հատկապես տուժում են եվրոպական երկրները, որոնք մեծապես կախված են ռուսական էներգակիրներից: Պատժամիջոցների հետեւանքներն առաջին հերթին արտահայտվում են համատարած գնաճով եւ պարենի անբավարարությամբ: Հին աշխարհամասում վիճակը կսրվի ձմռանը, երբ ռուսական գազի եւ նավթի գնման էմբարգոյի հետեւանքով շուկայում ստեղծված պակասն իրեն առավել զգացնել կտա: Արդեն ամռան այս օրերին եվրոպական որոշ երկրներ անցել են էլէկտրաէներգիայի խնայողությունների տարբեր միջոցառումների, իսկ ԱՄՆ-ում գրեթե կրկնակի թանկացել է բենզինը:
Ռուսաստանի դեմ կիրառվող պատժամիջոցների գործիքը ոչ միայն պետությունների հետ տնտեսական հարաբերություններ կառուցելու կողմնորոշիչ է, այլեւ՝ աշխարհաքաղաքականության: Այն երկրներին ստիպում է կողմնորոշվել արտաքին քաղաքականություն վարելու ուղղությունների հարցում: Հատկապես ԱՄՆ-ը եւ ԵՄ-ն վերջին շրջանում իրենց արտաքին քաղաքականությունը կառուցում են այս պատժամիջոցների գործոնի հիման վրա:
Օրերս Ֆինանսական հանցագործությունների դեմ պայքարի ցանցը (FinCEN) եւ ԱՄՆ ֆինանսների նախարարության Արդյունաբերության եւ անվտանգության բյուրոն (BIS) հրապարակել էր այն երկրների ցանկը, որոնց տարածքով պատժամիջոցների տակ հայտնված ապրանքները կարող են հասնել Ռուսաստան եւ Բելառուս: Այդ երկրներն են Հայաստանը, Բրազիլիան, Չինաստանը, Վրաստանը, Հնդկաստանը, Իսրայելը, Ղազախստանը, Ղրղզստանը, Մեքսիկան, Նիկարագուան, Սերբիան, Սինգապուրը, Հարավային Աֆրիկան, Թայվանը, Տաջիկստանը, Թուրքիան, Արաբական Միացյալ Էմիրությունները եւ Ուզբեկստանը:
Արդյունաբերության եւ անվտանգության բյուրոն առանձնահատուկ մտահոգություն առաջացնող ապրանքների կատեգորիա է համարում տեխնիկան, որը կարող է օգտագործվել ռազմական նպատակներով՝ ինքնաթիռների պահեստամասերը, հիդրոակուստիկ համակարգերը, ալեհավաքները, սպեկտրոֆոտոմետրերը, GPS համակարգերը, վակուումային պոմպերը, նավթահանքային սարքավորումները եւ այլն: Միանշանակ է, որ այդ ցանկում Հայաստանի ընդգրկումն ունենալու է իր հետեւանքները ԵԱՏՄ երկրներից դուրս տնտեսական հարաբերությունները կառուցելիս:
Այստեղ աչքի է զարնում այն փաստը, որ ՌԴ-ին սահմանակից պետություններից այդ ցանկում բացակայում է, թերեւս, միայն Ադրբեջանը: Ստացվում է, որ ուկրաինական ճգնաժամից ընդամենը երկու օր առաջ՝ փետրվարի 22-ին ՌԴ-ի հետ դաշնակցային հարաբերությունների մասին համաձայնագիր ստորագրած Բաքուն անվերապահորեն միացել է ՌԴ-ի դեմ պատժամիջոցներին: Այստեղ հատկանշական է արձանագրելը, որ նույնիսկ ՌԴ-ի հետ Հարավային Օսեթիայի եւ Աբխազիայի նման հիմնարար խնդիրներ ունեցող Վրաստանը չի միացել պատժամիջոցներին, իսկ Բաքուն, այդ հարցում իր կողմնորոշման վերաբերյալ ձայն չհանելով հանդերձ, միացել է իր «ռազմավարական» գործընկերոջ դեմ պատժամիջոցներին:
Չի բացառվում, որ դեպի Եվրոպա ռուսական գազին այլընտրանքային ուղիներից մեկն ապահովողին՝ Ադրբեջանին, առանձնակի վերաբերմունք է ցուցաբերվել, եւ չի հիշատակվել նրա անունն այդ ցանկում, բայց առանց դրա էլ ռուս-ուկրաինական հակամարտության հարցում Ադրբեջանն ի սկզբանե չեզոք դիրք չէր գրավել՝ տնտեսական աջակցություն ցուցաբերելով Ուկրաինային, իսկ վերջերս էլ ռուսական զինված ուժերի ռազմավարի մեջ հայտնվեցին նաեւ ադրբեջանական արտադրության ականանետները:
Ադրբեջանի այս պահվածքն արձանագրվում է համապատասխան կենտրոններում, եւ հակամարտության ավարտից հետո ՌԴ-ն միանշանակ իր վերաբերմունքը կարտահայտի: Հայաստանը մշտապես հայտարարել է, եւ հայտնի փաստ է, որ Ռուսաստանի հետ ոչ միայն ռազմավարական գործընկերային հարաբերություններ ունի, այլեւ ՀԱՊԿ ռազմաքաղաքական դաշինքի անդամ է, որի ոչ մի անդամ չի միացել պատժամիջոցներին: Այս ամենին զուգահեռ՝ Երեւանն առավելագույնս հավասարակշռված քաղաքականություն է վարում ռուս-ուկրաինական հակամարտության հարցում՝ աչքի առաջ ունենալով նաեւ այդ երկրում առկա հայկական մեծ համայնքը:
