Սեպտեմբերի 5-ին Մեծ Բրիտանիայի Պահպանողական կուսակցության նոր առաջնորդ ընտրվեց նախկին ԱԳ նախարար Լիզ Թրասը` ավտոմատ կերպով դառնալով նաեւ երկրի վարչապետ։ Նա հավաքել էր ձայների 57.4 տոկոսը՝ առաջ անցնելով վարչապետի պաշտոնի մյուս հավակնորդ, Մեծ Բրիտանիայի ֆինանսների նախկին նախարար Ռիշի Սունակից։ Թրասը երկրի վարչապետի պաշտոնը պաշտոնապես ստանձնել է սեպտեմբերի 6-ին: Հանդես գալով առաջին ելույթով, նա նշել է այն հիմնական ոլորտները, որոնցով զբաղվելու է վարչապետի պաշտոնում, դրանք են՝ տնտեսությունը, էներգետիկան եւ բժշկությունը։ Ինչպես հայտնում է BBC News-ը, նորանշանակ վարչապետը խոստացել է պատշաճ ուշադրություն դարձնել տնտեսությանը եւ կրճատել հարկերը՝ փոխհատուցելու «բնակչության քրտնաջան աշխատանքը» եւ խթանելու բիզնեսի ու ներդրումների զարգացումը։ Թրասը խոստացել է պահպանել այն խոստումները, որոնք պահպանողականները տվել են իրենց ընտրողներին 2019 թ.: Նա նաեւ ընդգծել է, որ մտադիր է 2024-ին հասնել Պահպանողական կուսակցության մեծ հաղթանակին։
Չնայած դրան՝ Թրասը հանրային աջակցման առումով խնդիր ունի. բրիտանական «YouGov» ընկերությունը, որը զբաղվում է շուկայական հետազոտություններով եւ տվյալների վերլուծությամբ, հրապարակել է սոցհարցման տվյալները, ինչի համաձայն` բրիտանացիների կեսը դժգոհ է եղել Լիզ Թրասի վարչապետ դառնալու փաստից, մինչդեռ գոհ է միայն 4 տոկոսը։ Թե որքանով են ուրախ կամ հիասթափված Թրասից՝ որպես նոր վարչապետի, բրիտանացիների 4 տոկոսը պատասխանել է, որ «շատ երջանիկ է», 18 տոկոսն ասել է, որ «համեմատաբար երջանիկ է», իսկ 17 տոկոսն ասել է, որ «համեմատաբար հիասթափված է», 33 տոկոսը նշել է, որ «շատ հիասթափված է», իսկ եւս 28 տոկոսը չի կարողացել պատասխանել այս հարցին։ Միաժամանակ բրիտանացիների 23 տոկոսը կարծում է, որ Լիզ Թրասն ավելի լավ կաշխատի, քան Բորիս Ջոնսոնը։
Փորձագիտական շրջանակներն էլ բարձրաձայնում են արտաքին քաղաքականության ոլորտում որոշ խնդիրների մասին, որոնք կարող են սրվել Լիզ Թրասի կառավարման շրջանում։ Մեծ Բրիտանիայում «Changing Europe» վերլուծական կենտրոնի տնօրեն Անանդ Մենոնն իր հոդվածներից մեկում գրում է, որ սկսելով իր քարոզարշավը՝ Թրասը Հյուսիսային Իռլանդիայի արձանագրային օրինագիծն անվանել էր «ԵՄ անզիջողականության լավ օրինակ»՝ այն դասելով կառավարությունում իր անձնական ձեռքբերումների շարքը: Նշենք, որ Թրասը դեռ խորհրդարանի անդամ եղած ժամանակ օրինագիծ է ներկայացրել Հյուսիսային Իռլանդիայի արձանագրությունը չեղյալ համարելու մասին։ Այս պահին արձանագրությունը սահմանում է Միացյալ Թագավորության նավերի մաքսային զննում Բելֆաստ նավահանգստում։ Դա անհրաժեշտ է, որպեսզի բրիտանական մաքսանենգ ապրանքը չմտնի Իռլանդիայի Հանրապետության շուկա, որը դեռեւս ԵՄ անդամ է։ «Հետեւանքը կարող է լինել առեւտրային պատերազմը, որը կվատթարացնի արդեն իսկ լարված հարաբերությունները Մեծ Բրիտանիայի եւ ԵՄ-ի միջեւ»,- գրում է Մենոնը։ Ֆրանսիայում Մեծ Բրիտանիայի նախկին դեսպան, Մեծ Բրիտանիայի արտաքին գործերի նախարարության բարձրաստիճան պաշտոնյա լորդ Փիթեր Ռիկեթսը կարծում է, որ Թրասի երկակի մոտեցումը, այն է՝ արձանագրությունը չեղարկելուն ուղղված քայլերը, որոնք միաժամանակ ուղեկցվում են ԵՄ-ի հետ բանակցություններ վարելով, հակառակ արդյունքը կունենան եւ պարզապես հակազդեցություն կառաջացնեն։
«Ռոյթերսի» կարծիքով` Հյուսիսային Իռլանդիայի արձանագրության չեղարկումը կարող է հիմք տալ Իռլանդիայի Հանրապետությանը՝ Հյուսիսային Իռլանդիայի նկատմամբ տարածքային պահանջներ ներկայացնելու համար, ինչը պայմանավորված կլինի Բելֆաստ նավահանգիստ մուտք գործելու անհնարինությամբ:
Նշենք, որ Հյուսիսային Իռլանդիայի արձանագրությունը Բրեքսիթի գործարքի մաս է կազմում, այն բանակցել եւ ստորագրել է Բորիս Ջոնսոնը, այնուհետեւ վավերացվել է Մեծ Բրիտանիայի եւ ԵՄ խորհրդարանների կողմից: Արձանագրությունը պարտադիր է դարձնում Մեծ Բրիտանիայից Հյուսիսային Իռլանդիա ներմուծվող բոլոր ապրանքների վերահսկումը, որը միեւնույն ժամանակ մեծապես մնում է ԵՄ ազդեցության գոտում։ Ավելին, արձանագրությունն ունի միջազգային իրավունքի ուժ։ Վիճակագրությունը ցույց է տալիս, որ Բրեքսիթից հետո Հյուսիսային Իռլանդիայի տնտեսությունը գերազանցել է Մեծ Բրիտանիայինը, իսկ գործարարների շրջանում հարցումները ցույց են տվել, որ նրանց մեծ մասն արդեն հարմարվել է նոր պայմաններին, եւ արձանագրությունը նրանց մտահոգությունների մեջ չէ: Սակայն Հյուսիսային Իռլանդիայի յունիոնիստները պնդում են, որ նավահանգստային ենթակառուցվածքը եւ մատակարարման խափանումները թուլացնում են կապերը Մեծ Բրիտանիայի մնացած մասի հետ: Նրանք հրաժարվել են մասնակցել կառավարության աշխատանքներին, քանի դեռ գործում է Բրեքսիթի արձանագրությունը։
Բրյուսելում լավատես չեն, թե Թրասի կառավարման շրջանում կվերագործարկվեն ԵՄ-Մեծ Բրիտանիա հարաբերությունները, թեեւ մեծ հույսեր են ունեցել, երբ նա ստանձնել էր ԱԳ նախարարի պաշտոնը։ Բրյուսելի եվրոպական քաղաքականության կենտրոնի վերլուծաբանները պնդում են, որ Թրասը «մարմնավորում է Ջոնսոնի դարաշրջանի շարունակականությունը», որը «խոր ճեղքվածք» է թողել ԵՄ-Մեծ Բրիտանիա հարաբերություններում։ Թրասը՝ որպես արտաքին գործերի նախարար, իր առաջին ելույթում որեւէ խոսք չէր ասել Եվրամիության մասին, ինչը եւս մեկ անգամ վկայում է, որ վերագործարկման հավանականությունը մեծ չէ։ Իշխող կուսակցության «Հավերժական Բրեքսիթի» դիրքորոշումը համահունչ չէ հասարակական կարծիքին: Դեռեւս հունիսին «British Foreign Policy Group»-ի (BFPG) անկախ վերլուծական կենտրոնի կատարած ուսումնասիրության մեջ ասվում է, որ բրիտանացիներն աջակցում են Եվրամիության հետ համագործակցության եւ փոխգործակցության բազմաթիվ ոլորտներին:
Ի տարբերություն ԵՄ-ի, հարաբերությունների զարգացման դինամիկան պահպանվում է Միացյալ Նահանգների հետ։ Թրասն ԱՄՆ նախագահ Ջո Բայդենի հետ պայմանավորվել է ամրապնդել համագործակցությունը երկու երկրների միջեւ, այդ թվում՝ պաշտպանության ոլորտում։ Ինչպես հայտնել են բրիտանական կառավարության ղեկավարի գրասենյակից, նրանք համաձայնել են ամրապնդել այդ կապերը՝ ընդլայնելով ուժեղ պաշտպանական դաշինքը ՆԱՏՕ-ի եւ AUKUS-ի միջոցով: Միաժամանակ երկու երկրների ղեկավարները վերահաստատել են իրենց հանձնառությունը՝ ապահովելու Ռուսաստանի պարտությունն Ուկրաինայում։
