Միացյալ Նահանգներում այսօր անցկացվում են Կոնգրեսի միջանկյալ ընտրություններ, որոնց ժամանակ կընտրվեն Ներկայացուցիչների պալատի 435 անդամները եւ Սենատի մեկ երրորդը։ ԱՄՆ Կոնգրեսի ընտրություններն անցկացվում են երկու տարին մեկ անգամ։ Միջանկյալ ընտրությունները կարեւոր են նրանով, որ դրանք տեղի են ունենում նախագահական ժամկետի կեսին եւ, այդպիսով, Սպիտակ տունը ղեկավարող քաղաքական կուսակցության համար յուրօրինակ քննություն են վարվող քաղաքականությունը գնահատելու, մրցակցի հնարավորությունները հասկանալու եւ երկու տարի անց՝ արդեն նախագահական ընտրությունների համար համապատասխան եզրակացություններ անելու։
Հարցումները ցույց են տալիս, որ ամերիկացիների մեծամասնությունը անհանգստացած է տնտեսության վիճակով եւ կարծում է, որ երկիրը սխալ ուղու վրա է, ինչը հաղթելու հնարավորություն է ընձեռում հանրապետական թեկնածուներին այն ընտրատարածքներում, որոնք մինչ այդ անհասանելի էին թվում: Համեմատության համար նշենք, որ օրակարգային թեմաների ցանկում երկրորդ եւ երրորդ տեղերում անօրինական ներգաղթն ու հանցագործություններն են, որոնք մտահոգում են քաղաքացիների համապատասխանաբար 5 եւ 4 տոկոսին։ Օրինակ՝ հոկտեմբերի 30-ից նոյեմբերի 2-ը 1005 ամերիկացիների շրջանում անցկացված հարցման համաձայն՝ քաղաքացիների 80 տոկոսը որոշում կկայացնի՝ ելնելով տնտեսության մեջ առկա խնդիրներից։ Հարցվածների 77 տոկոսի համար քվեարկության հիմնական գործոնը լինելու է երկրում գնաճի խնդիրը, իսկ 75 տոկոսը հաշվի կառնի կրթության խնդիրը։
«The New York Times»-ը, վկայակոչելով հոկտեմբերի 17-ին Սիենայի քոլեջի հարցումը, գրել է, որ ամերիկացիների 49 տոկոսը պատրաստ է քվեարկելու հանրապետականների օգտին, մինչդեռ դեմոկրատներին պաշտպանում է հարցվածների 45 տոկոսը։ CNN-ը, հիմնվելով «Inside Elections»-ի հաշվարկների վրա նոյեմբերի 3-ի դրությամբ, կանխատեսում է, որ հանրապետականները կշահեն Ներկայացուցիչների պալատում առնվազն 216 տեղ (այն վերահսկելու համար անհրաժեշտ է առնվազն 218 տեղ), իսկ դեմոկրատները՝ առնվազն 199: Եվս 20 տեղի ճակատագիրը դեռեւս պարզ չէ, եւ կախված դրանց բաշխվածությունից՝ կուսակցություններից յուրաքանչյուրը պահպանում է մեծամասնության հնարավորությունը։ Նախկինում «CNN»-ը դեմոկրատներին տվել էր 205 մանդատ, իսկ հանրապետականներին՝ 212։ Համիլթոն քոլեջի միջազգային հարաբերությունների եւ եվրոպական քաղաքականության ոլորտում պրոֆեսոր Ալան Քաֆրունիի խոսքով՝ 2022 թ. Կոնգրեսի ընտրությունները տեղի են ունենում աննախադեպ քաղաքական բեւեռացման պայմաններում։ «Այս պահին հարցումները ցույց են տալիս, որ հանրապետականները, ամենայն հավանականությամբ, մեծամասնություն կստանան Ներկայացուցիչների պալատում եւ, հավանաբար, Սենատում: Միեւնույն ժամանակ, շատ նահանգներում եւ ընտրատարածքներում պարտվող հանրապետական թեկնածուները կհրաժարվեն զիջել՝ երկիրը դնելով անորոշության ուղու վրա, ինչը կմեծացնի համատարած քաղաքական անկայունության եւ նույնիսկ բռնության հավանականությունը», – նման կարծիք է հայտնել պրոֆեսորը «RBC»-ի հետ զրույցում:
Արտաքին քաղաքականության մասով պետք է նշել, որ Ուկրաինայի վերաբերյալ Հանրապետական կուսակցության քաղաքական գործիչների մի շարք կոշտ հայտարարություններ մեծացրել են նրանց հաղթելու հավանականությունը։ Մասնավորապես, ամերիկացիները սկսել են ակտիվորեն աջակցել Հանրապետական կուսակցությանը հատկապես այն բանից հետո, երբ Ներկայացուցիչների պալատի հանրապետական անդամ Մարջորի Թեյլորը խոստացավ գումար չհատկացնել Ուկրաինային։ Ավելի վաղ Ներկայացուցիչների պալատի Հանրապետական խմբակցության ղեկավար Քեւին Մաքքարթին ընտրություններում հաղթելու դեպքում հայտարարել էր Ուկրաինայի ֆինանսավորման «ծորակը փակելու» մասին եւ քննադատել դեմոկրատներին «ԱՄՆ-ի համար հեռավոր, անհարկի երկրի վրա փող ծախսելը պարտվողական պատերազմում»։
Հասարակական հարցումների «FiveThirtyEight» կազմակերպությունը մշակել էր 100 հնարավոր սցենարներ ԱՄՆ Կոնգրեսի ընտրությունների արդյունքների համար, որոնցից 84-ի դեպքում ընտրություններում հաղթում են հանրապետականները։ Ֆրանսիացի պաշտոնաթող գնդապետ Ժակ Օգարդը կարծիք է հայտնել, որ եթե ԱՄՆ-ում հաղթեն հանրապետականները, ապա Ուկրաինայի եւ Ռուսաստանի միջեւ բանակցություններ կսկսվեն։ Նա նաեւ նշել է, որ նման սցենարի դեպքում հանրապետականները կարող են դանդաղեցնել Կիեւին տրամադրվող օգնությունը, որն այժմ այդքան ակտիվորեն տրամադրվում է Վաշինգտոնի կողմից։ «Եթե Ուկրաինան բախվի այն փաստի հետ, որ ԱՄՆ-ը չի կարող նրան տրամադրել ցանկալի ռազմական աջակցություն, նա ստիպված կլինի նստել բանակցությունների սեղանի շուրջ։ Հուսով եմ, որ Արեւմուտքը, ի վերջո, կվերանայի իր դիրքորոշումը եւ (Ուկրաինայի նախագահ Վլադիմիր) Զելենսկիին կմղի բանակցությունների»,- ասել է նա։
Վերլուծական որոշ շրջանակներ, սակայն, գտնում են, որ դեմոկրատները դեռ կպահպանեն ամուր դիրքերը Ներկայացուցիչների պալատում եւ Սենատում, իսկ Կոնգրեսը կշարունակի ռազմական աջակցությունն Ուկրաինային։ Ընդհանուր առմամբ, ամերիկացիների տրամադրվածությունը մնում է բավական ուկրաինամետ մակարդակի վրա։ Ամերիկացիների 73 տոկոսը կարծում է, որ ԱՄՆ-ը պետք է շարունակի աջակցել Կիեւին (դեմոկրատների 81 տոկոսը եւ հանրապետականների 66 տոկոսը)։ Ավելին՝ հաշվի առնելով այն, որ Կոնգրեսի նոր կազմը աշխատանքը սկսելու է 2023 թ. սկզբին, չի բացառվում, որ մինչեւ տարեվերջ օգնության լուրջ փաթեթ կընդունի։ Մյուս կողմից, Ուկրաինային ցուցաբերվող «չափազանց մեծ օգնությունը» քննադատում է հիմնականում հանրապետականների դասական պահպանողական թեւը, մինչդեռ հանրապետականների շարքերում նոր պահպանողականների (նեոկոնների) ազդեցիկ թեւը պաշտպանում է Ուկրաինային ցուցաբերվող օգնությունը։ Նրանց թվում օրինակ, Սենատում հանրապետականների առաջնորդ Միթչ Մաքքոնելը խոստացել է շարունակել հանրապետականների կողմից վերահսկվող ԱՄՆ Սենատի՝ Ուկրաինային օգնություն տրամադրելու մոտեցումը եւ «նույնիսկ ավելի հեռուն գնալ»: Նեոպահպանողականների թվում են նաեւ այն հանրապետականները, որոնք ընտրություններում հաղթելու դեպքում կգլխավորեն արտաքին հարաբերությունների, զինված ուժերի եւ բյուջետային ծախսերի ազդեցիկ մասնագիտացված հանձնաժողովները։ Ի դեպ, Ուկրաինայի հարցում Մաքքոնելի եւ Մաքքարթիի միջեւ մոտեցումների տարամիտումը խնդրահարույց կարող է դառնալ առաջին հերթին կուսակցության համար։
