Նիդերլանդացի աստղագետ Ֆրանկ Հուգերբիտսը, ով կանխագուշակել է ավերիչ իրադարձությունները Թուրքիայում եւ Սիրիայում, նախազգուշացրել է, որ մարտին Երկրի վրա սպասվում է նոր ավերիչ «մեգաերկրաշարժ»: «Solar System Geometry Survey» գիտական ինստիտուտի տվյալներով, որում աշխատում է Հուգերբիտսը, ավելի քան 8.5 բալ մագնիտուդով լուրջ ցնցումների շարք կարող է արձանագրվել մարտի առաջին շաբաթվա ընթացքում: Ըստ գիտնականների՝ այդ ժամանակաշրջանում կարմիր գոտի են Ճապոնիայի հարավը, Հունաստանը, Պորտուգալիան, Հյուսիսային Ամերիկայի մի մասը, Ինդոնեզիան եւ Պակիստանը: Ռուսաստանը նույնպես հայտնվել է այդ ցուցակում. սեյսմոլոգների տվյալների համաձայն՝ ավերիչ երկրաշարժներ կարող են տեղի ունենալ Կամչատկայի մարզում եւ Կուրիլյան կղզիներում:
Փորձագետները նշում են, որ Թուրքիայում եւ Սիրիայում տեղի ունեցած հզոր երկրաշարժները նպաստել են «սեյսմիկ ակտիվության արթնացմանը» մի շարք տարածաշրջաններում: Միեւնույն ժամանակ մասնագետները նշում են, որ նման հզոր ցնցումների ճշգրիտ վայրը կանխատեսելը շատ բարդ է, քանի որ դրա վրա ազդում են հսկայական թվով գործոններ: Մյուս կողմից՝ գիտնականները նշում են, որ վաղաժամ կարելի է իմանալ, թե երբ տեղի կունենան նման ցնցումներ:
Ռուս մասնագետները տեղի ունեցած ողբերգությունից հետո գնահատել են երկրաշարժի հետեւանքները Ռուսաստանի համար: Ղրիմի սեյսմիկ եւ սողանքային ակտիվության գնահատման հանրապետական կենտրոնի ղեկավար Տատյանա Գորելովան հայտնել է, որ Թուրքիայում կրկնվող երկրաշարժները կարող են ոչ մեծ ստորգետնյա ցնցումներ սադրել ռուսական թերակղզու ափի մոտ: Նա չի բացառել, որ ստորգետնյա ցնցումները Թուրքիայում գրանցված սեյսմիկ շարունակվող ակտիվության հետեւանք են: Մասնագետը ճշգրտել է, որ լուրջ երկրաշարժներ չեն սպասվում Սեւ ծովում, նաեւ նշել է, որ թերակղզում սեյսմիկ ակտիվությունը սովորական է համարվում, եւ դրանում արտասովոր ոչինչ չկա:
Չնայած մի շարք գիտնականների լավատեսական կանխատեսումներին՝ Թուրքիայում ցնցումները շարունակվում են: Փետրվարի 28-ին Թուրքիայի կենտրոնական մասում 4.0 մագնիտուդով երկրաշարժ տեղի ունեցավ:
Նշվում է, որ ստորգետնյա ցնցումների էպիկենտրոնը եղել է Կայսերի քաղաքից 16 կմ դեպի արեւմուտք,10 կմ խորության վրա:
Փետրվարի 27-ին 3.2 մագնիտուդով երկրաշարժ արձանագրվեց Ուկրաինայի արեւմուտքում՝ Զակարպատիեի մարզում: Ուկրաինայի հատուկ վերահսկողության կենտրոնի տվյալներով՝ գլխավոր ստորգետնյա ցնցումները գրանցվել են Մուկաչեւոյից ոչ շատ հեռու, Բոլշայա Դոբրոն գյուղի շրջանում, 2 կմ խորության վրա:
ՌԴ գիտությունների ազգային ակադեմիայի երկրաշարժների կանխատեսման տեսության եւ մաթեմատիկական երկրաբանության ինստիտուտի գլխավոր գիտաշխատող Ալեքսանդր Գորշկովն ավելի վաղ զգուշացրել է, որ Թուրքիայում տեղի ունեցածի հետ համեմատվող լուրջ երկրաշարժ կարող է գրանցվել Ղրիմում, որովհետեւ այն Ալպյան-Հիմալայան գոտու մեջ է, նույն կառուցվածքում, ինչ Թուրքիան:
Ռուսաստանի ԳԱԱ երկրաբանական ծառայության տնօրեն Յուրի Վինոգրադովը ենթադրել է, որ Թուրքիայից հետո երկրաշարժ կարող է գրանցվել Կովկասում. «Հավանականություն միշտ կա: Դա տեկտոնիկ սալերի շարժումն է. Արաբականը սողացել է դեպ Արեւելաեվրոպական պլատֆորմ: Միացման գոտին հենց այնտեղ է, հետո գալիս են Հայաստանը, Ադրբեջանը, Կովկասը, ինչ-որ ժամանակ անց երկրաշարժներ են հնարավոր Կովկասի շրջանում, բայց ոչ այդքան ուժեղ, որովհետեւ հիմնական հարվածները իր վրա է վերցրել պլատֆորմի այդ մասը»:
Սեյսմիկ ռիսկի գլոբալ մոնիտորինգի միջազգային կենտրոնի գլխավոր տնօրեն Սամվել Հակոբյանը նախազգուշացրել է, որ առաջիկա 2-3 տարվա ընթացքում երկրաշարժներ կարող են տեղի ունենալ Կովկասում, Կասպից ծովի շրջանում, ինչպես նաեւ Կուրիլյան կղզիների հարավում. «Ռուսաստանում սեյսմիկ ամենավտանգավոր գոտին Կամչատկան է, այնտեղ կարող են մինչեւ 9 մագնիտուդով ուժեղ երկրաշարժներ տեղի ունենալ: 2-րդ ակտիվ գոտին Կովկասն է, մնացածը պակաս ակտիվ են: Այսօր Կովկասում՝ Կասպից ծովի ափամերձ գոտում, 30-40 կմ խորության վրա 6.2 մագնիտուդով երկրաշարժ կարող է տեղի ունենալ: Կամչատկայում ամենավտանգավորը Կուրիլյան-Կամչատկայի ու Ալեուտյան գոտինների հատման վայրն է: Այնտեղ հիմա լարվածություն է կուտակվում, առաջիկա 2-3 տարվա ընթացքում շատ վտանգավոր կլինի: Վտանգավոր գոտի է նաեւ Կուրիլյան կղզիների հարավը»:
Նիդերլանդցի աստղագետի խոսքով՝ Երկիրը, Մերկուրին եւ Սատուրնը այնպիսի դիրքում են, որ դա կարող է ուժեղ տատանումների հանգեցնել մարտի 3-ին եւ 4-ին կամ 6-ին եւ 7-ին: Երկրաշարժի հզորությունն այդ օրերին կարող է հասնել 7 կամ 8 բալի, ինչը կհամարվի «մեգաերկրաշարժ»: Նա ավելացրել է, որ մարտի 3-4-ին պարզապես սեյսմիկ վերելք կարող է դիտվել, ինչին մի քանի օր անց կհետեւի ավելի լուրջ սեյսմիկ ակտիվություն:
Ըստ Հուգերբիտսի հաշվարկների՝ մոտ օրերս կենտրոնական Թուրքիայում կարող է եւս մեկ ուժեղ հետցնցում գրանցվել: Նա կանխատեսումները կառուցում է սեյսմիկ ակտիվության կանխատեսման իր մշակած մեթոդի վրա՝ ելնելով արեգակնային համակարգի մարմինների փոխադարձ դիրքից: Բազմամյա դիտարկումների արդյունքում եզրակացրել է, որ 6 եւ բարձր մագնիտուդով երկրաշարժներ հաճախ տեղի են ունենում այն ժամանակ, երբ «մոլորակները եւ Լուսինը որոշակի դիրքի են հասնում արեգակնային համակարգում»: Հուգերբիտսը սեյսմոլոգ չէ, նա աստղագետ է, իսկ աստղագիտությունը շատերը գիտություն չեն համարում: Խանդոտ գիտնականների մի մասը չի ընդունում նրա կանխատեսումները՝ շեշտելով, որ մոլորակների փոխազդեցությունը չի կարող երկրաշարժներ առաջացնել:
Հուգերբիտսի կարծիքով՝ Երկրի սեյսմիկ ակտիվության վրա ազդեցություն է թողնում ոչ թե մոլորակային գրավիտացիան, այլ էլեկտրամագնիսականությունը: Նրա կանխատեսումներն առաջին անգամ չէ, որ գրավում են գիտական հասարակայնության ուշադրությունը: Սեյսմոլոգները եւ աստղաֆիզիկոսները արդեն նշել են, որ դրանք այնքան ճշգրիտ չեն, որ արժանի լինեն լուրջ վերաբերմունքի: Գիտական շրջանակները պնդում են, որ դեռ ոչ մի գիտնականի չի հաջողվել խոշոր երկրաշարժ կանխատեսել: Բայց Հուգերբիտսը գիտնական չէ, եւ, հավանաբար, դա է ողջ գաղտնիքը:
