Թուրքիայի նախագահ Ռեջեփ Թայիփ Էրդողանն ապիլի 26-ին չեղարկել է հրապարակային բոլոր միջոցառումները, որովհետեւ «բժիշկների խորհրդով» որոշել է մի քանի օր անցկացնել տանը: Նախօրեին ուղիղ եթերում նրա ինքնազգացողությունը վատացել էր: Հիվանդությունն ի հայտ եկավ ոչ հարմար պահի. Թուրքիայում կայանալիք նախագահական ընտրություններին ընդամենը երկու շաբաթ է մնացել, իսկ վերջին հարցումները ցույց են տալիս, որ Էրդողանի գլխավոր մրցակիցը՝ ընդդիմության միասնական թեկնածու Քեմալ Քըլըչդարօղլուն, 7 տոկոսով գերազանցում է նրան:
«Ես շնորհակալություն եմ հայտնում բոլորին, ովքեր այս թեթեւ հիվանդությունից հետո առողջություն են մաղթել ինձ: Բժիշկների խորհրդով այսօր ես կհանգստանամ տանը»,- հայտարարել է Էրդողանը ուղիղ եթերում տեղի ունեցածի հաջորդ օրը:
Թուրքիայի գործող նախագահը հարցազրույց էր տալիս «Ulke TV»-ին, երբ հանկարծ վատ զգաց իրեն: Տեսախցիկն օպերատորը շրջեց դեպի լրագրողը, որի դեմքի արտահայտությունն անմիջապես փոխվեց: Էրդողանը դադարեցրեց հարցազրույցը «Օ, Աստված իմ» բառերով եւ ընդմիջում խնդրեց գովազդի համար: Մի քանի րոպեից նա վերադարձավ՝ ներողություն խնդրելով հեռուստադիտողներից: Նա նաեւ խոստովանել է, որ հիվանդացել է որովայնային գրիպով: «Մենք շատ ենք աշխատում: Ես լավ մրսել եմ: Մտածում էինք, որ եթե չեղարկեմ ծրագիրը, ինձ սխալ կհասկանան: Հեռուստադիտողներից ըմբռնում եմ խնդրում»,- ասել է Թուրքիայի ղեկավարը:
Ուղիղ եթերում Էրդողանի ինքնազգացողության վատթարացումից հետո տարբեր վարկածներ են շրջանառվում տեղի ունեցածի վերաբերյալ: Թուրքիայի նախագահի վարչակազմն արդեն հերքել է լուրերը, որ նա կաթված է տարել: Սակայն հայտնի է դարձել, որ Էրդողանն արդեն չեղարկել է ապրիլի 27-28-ին պլանավորված չորս հարցազրույց թուրքական հեռուստաընկերությունների հետ: Այս մասին գրել է «BirGun» թերթը: Ընդհանրապես՝ հետաձգվել են Էրդողանի մասնակցությամբ բոլոր միջոցառումները մինչեւ մայիսի 3-ը:
Էրդողանի առողջական վիճակի մասին հակասական տեղեկություններ են տարածվում: «Bloomberg»-ի աղբյուրները կասկածում են, որ Թուրքիայի ղեկավարը սրտամկանի ինֆարկտ է տարել: Այդ լուրը հերքել է Թուրքիայի առաջնորդ Ռեջեփ Թայիփ Էրդողանի վարչակազմի ապատեղեկատվության դեմ պայքարի կենտրոնը։
«Սոցցանցերում տարածված այն տեղեկությունները, թե նախագահ Էրդողանը, իբր, սրտի կաթված է ստացել եւ հոսպիտալացվել է, իրականությանը չեն համապատասխանում»,- ասվում է պաշտոնական հաղորդագրության մեջ։
Իր հերթին՝ Թուրքիայի փոխնախագահ Ֆուաթ Օքթայը հայտարարել է, որ երկրի նախագահի առողջական վիճակը լավ է, նա միայն թեթեւ մրսածություն ունի։
Որոշ ժամանակ անց Էրդողանի վիճակի մասին բացատրությամբ հանդես է եկել նաեւ նախագահի պաշտոնական ներկայացուցիչ Իբրահիմ Քալընը: Նա հանգստացրել է հանրությանը՝ շեշտելով, որ Էրդողանի առողջական վիճակը գերազանց է:
Թուրքիայի քաղաքական աշխարհի ներկայացուցիչներից առաջինը միջադեպին անդրադարձել է Քեմալ Քըլըչդարօղլուն՝ Էրդողանին մաղթելով շուտափույթ ապաքինում: Այնուհետեւ գործող նախագահին աջակցության խոսքեր է հղել ընդդիմադիր «Լավ» կուսակցության առաջնորդ Մերալ Աքշեները:
Թուրքիայում շարունակվում է նախընտրական արշավը: Ընտրությունները կկայանան մայիսի 14-ին: Հարցումները կամ մատնացույց են անում Քեմալ Քըլըչդարօղլուի առավելությունը, կամ լավագույն դեպքում հավասարություն ցուցադրում նրա ու Էրդողանի միջեւ: Այսպես՝ ORC-ի հարցման համաձայն՝ Էրդողանն իր հակառակորդին զիջում է արդեն 7 տոկոսով: Քըլըչդարօղլուին մեկ տոկոս է մնում՝ 50 տոկոսի շեմը հաղթահարելու եւ առաջին տուրում հաղթելու համար: Էրդողանի օգտին պատրաստ է քվեարկել ընտրողների 42 տոկոսը: Երբ նախընտրական քարոզարշավը նոր էր սկսվել, եւ Քըլըչդարօղլուն հայտարարել էր իր թեկնածության առաջադրման մասին, թվում էր, թե դա կուժեղացնի հաղթանակի հասնելու Էրդողանի հնարավորությունները: Բանն այն է, որ 74-ամյա Քեմալ Քըլըչդարօղլուն, ով գլխավորում է երկրի ամենահին՝ Ժողովրդահանրապետական կուսակցությունը, որը ժամանակին հիմնադրել է Թուրքիայի առաջին նախագահ Աթաթյուրքը, Էրդողանի վաղուցվա քաղաքական հակառակորդն է, որին մշտապես զիջել է: Նա աստիճանաբար կորցրել էր հանրաճանաչությունը, քաղաքական կշիռը: Եվ ոչ ոք չէր սպասում, որ կկարողանա արժանի մրցակցություն ապահովել: Ընդհակառակը՝ կարծիք կար, որ Քըլըչդարօղլուն Էրդողանի համար հարմար մրցակից է:
Ընդդիմությունից ընտրություններում առավել հավանական հակառակորդը համարվում էր Անկարայի քաղաքապետ Էքրեմ Իմամօղլուն։ Բայց նրա դեմ քրեական գործ է հարուցվել պաշտոնյաներին վիրավորելու համար, որն ավարտվել է քաղաքական գործչի նկատմամբ մեղադրական դատավճռով եւ նրա քաղաքական գործունեության արգելմամբ։ Արդյունքում ընդդիմությունն ստիպված էր համախմբվել Քըլըչդարօղլուի շուրջ: Լիարժեք համախմբում, սակայն, տեղի չունեցավ, եւ այդ ֆոնին ընդդիմության հաղթելու հնարավորությունները նկատելիորեն ցածր էին գնահատվում: Սակայն փետրվարին արձանագրված երկրաշարժը, որն ավելի քան 50 հազար հոգու կյանք խլեց Թուրքիայում, ուժեղացրեց քննադատությունների ալիքը իշխանությունների հասցեին: Վերջիններս մեղադրվում են շինարարության ոլորտում կոռուպցիայի եւ 1999 թ. ավերիչ երկրաշարժից հետո ներդրված անվտանգության չափորոշիչները չպահպանելու մեջ: Քըլըչդարօղլուն Էրդողանին մեղադրեց միլիարդների փոշիացման մեջ՝ հայտարարելով, որ այսպես կոչված «երկրաշարժի» հարկից ստացված փողերը, որոնք պետք է ծախսվեին տարերային աղետների կանխման եւ արտակարգ իրավիճակների նախարարության համակարգի զարգացման համար, պարզապես յուրացվել են գործող իշխանությունների կողմից:
Էրդողանի համար ցավագին էր հատկապես այն, որ երկրաշարժը գրանցվեց այն շրջաններում, որտեղ նրան աջակցությունն ավանդաբար բարձր էր: Այդ երկրաշարժի պատճառով նրա նկատմամբ վստահությունը խախտվեց: Տարերային աղետի հետեւանքների սոսկալիության քննարկումները լրջորեն խաթարեցին Էրդողանի դիրքերը: Դրանց գումարվեցին նաեւ Թուրքիայի մյուս խնդիրները՝ լիրայի կուրսի անկումը, որը հանգեցրեց գների համատարած բարձրացման:
Հիմա իրավիճակն այնպիսին է, որ Էրդողանը նույնիսկ կարող է չհայտնվել երկրորդ տուրում: Եթե նրա հակառակորդը 50 տոկոսից ավելի ձայներ ստանա, միանգամից հաղթող կհռչակվի: Բայց, ըստ փորձագետների, դա քիչ հավանական է թվում: Առավել հավանականն այն է, որ Էրդողանն ու Քըլըչդարօղլուն կանցնեն երկրորդ փուլ, որտեղ էլ նրանց առերես պայքարում կորոշվի ամեն ինչ: Իսկ ընտրողների վստահությունը վերադարձնելու համար Էրդողանն ընդամենը երկու շաբաթից մի փոքր ավելի ժամանակ ունի:
Իհարկե, շատ դժվար է կանխատեսել ինչ-որ մեկի հաղթանակը: Թեկնածուները գրեթե հավասար հնարավորություններ ունեն, եւ շատ բան կարող են վճռել մանրուքները: Ասում են՝ Էրդողանը ժամանակին ինքնազգացողության վատացման եւս մեկ «փայլուն» օրինակ է ունեցել… Գուցե ամեն ինչ այնքա՞ն էլ պարզ չէ…
