44-օրյա պատերազմում Արցախի էներգահամակարգը հանրապետության առավել տուժած ենթակառուցվածքներից է։ Եթե մայրաքաղաք Ստեփանակերտում ու մյուս բնակավայրերում հնարավոր եղավ համեմատաբար կարճ ժամանակահատվածում վերանորոգել վթարված էլեկտրագծերն ու սնուցող տրանսֆորմատորները եւ էլեկտրաէներգիա մատակարարել բնակչությանը, կենսապահովման հիմնարկ-ձեռնարկություններին, ապա Մարտունու շրջանում, որի տարածքների մի մասն անցել է թշնամու վերահսկողության տակ, հոսանքազրկման պատճառով անհրաժեշտություն ծագեց վերակառուցել սնուցման համակարգը եւ նոր շունչ հաղորդել ռազմագործողություններից տուժած համայնքներին։
Այդ նպատակով փետրվարի սկզբներին կառավարությունը ձեռնամուխ եղավ Ստեփանակերտ-Մարտունի օդային նոր գծի կառուցմանը։ Հրետակոծությունների հետեւանքով շարքից դուրս էր եկել Մարտունի քաղաքն ու շրջակա գյուղերը սնուցող 35 կիլովատ հզորությամբ օդային գիծը, եւ բնակչությունը խիստ սահմանափակումներով էր հոսանք ստանում, օրվա մեջ՝ 3-4 ժամ։ Լարված ու հետեւողական աշխատանքի, արհեստավարժ մասնագետների ձեռնարկումների շնորհիվ գրեթե չորս ամսում նախատեսված ծրագիրն ավարտին հասցվեց, եւ 41 կիլոմետր երկարությամբ օդային գծի վերականգնմամբ 7-ամսյա ընդմիջումից հետո հիշյալ բնակավայրերը վերջապես լուսավորվեցին։
Ըստ «Արցախէներգո» ՓԲԸ գլխավոր տնօրենի տեղակալ Տիգրան Գաբրիելյանի, ամբողջովին վերափոխվել եւ նորացվել է շրջանի էներգահամակարգը, հին սարքավորումներին փոխարինել են ժամանակակից բարձրակարգ սարքավորումներ: Ներկայումս ընթացքի մեջ են Մարտունի քաղաքից Կարմիր շուկա ձգվող 35/10 կիլովատ ենթակայանի նոր գծի կառուցման աշխատանքները, որը շահագործելուց հետո կապահովի ենթաշրջանի բաժանորդների լիարժեք եւ կայուն էլեկտրամատակարարումը: Տ. Գաբրիելյանի խոսքերով՝ նոր էլեկտրագիծը կառուցվում է ընկերության միջոցների հաշվին, եւ մոտավոր հաշվարկներով ենթակառուցվածքի վերականգնման համար ծախսվել է շուրջ 1.5 մլրդ դրամ:
Ինչպես նշեց «Արցախէներգո»-ի փոխտնօրենը, համակարգի արդիականացման աշխատանքներին ընդգրկվել են ինչպես Ստեփանակերտի, այնպես էլ Մարտունու եւ Հադրութի շրջանների մասնաճյուղերի ինժեներատեխնիկական անձնակազմերը, որոնք պատվով են կատարել իրենց առջեւ դրված խնդիրը: «Նրանք իրենց մասնագիտական իմացությամբ ու հմտությամբ ապացուցեցին, որ ցանկացած բարդ իրադրությունում ի վիճակի են վճռականություն դրսեւորել եւ արդարացնել բաժանորդների վստահությունը, արհեստավարժի բծախնդրությամբ հետեւողական լինել, տեր կանգնել խոսքին»,- ծրագրի հաջող իրագործման առիթով նշեց Տ. Գաբրիելյանը:
