«Արմենպրես»-ի մեդիա ընտանիքի անդամ, արդեն երեք տասնամյակ իր գործունեությունը ծավալող «Հայաստանի Հանրապետություն» օրաթերթն ունի նորացված կայք՝ hhpress.am հասցեով: Կայքի շնորհանդեսը տեղի ունեցավ հունիսի 7-ին:
«Արմենպրես» պետական լրատվական գործակալության տնօրեն Արամ Անանյանը նշեց, որ սա «Արմենպրես» մեդիաընտանիքի թվային վերափոխման գործընթացի հերթական քայլն է: Մի քանի ամիս առաջ ներկայացվեց «Արմենպրես»-ի մեդիա ընտանիքի մեկ այլ անդամի՝ «Ռեսպուբլիկա Արմենիա» ռուսալեզու թերթի վերափոխված էլեկտրոնային տարբերակը, որի շնորհիվ բազմապատկվել է ընթերցողների թիվը, ընդլայնվել է թերթի ընդգրկումը ռուսալեզու լրատվական միջավայրում:
«Վստահ ենք, որ «Հայաստանի Հանրապետություն» օրաթերթը նույնպես նոր կայքի միջոցով դիվերսիֆիկացնելու ու բազմապատկելու է իր ընթերցողների շրջանակը: Թերթի 30-ամյակը հետաքրքրիր ու կարեւոր առիթ է դեպի առաջ նայելու, թվային փոփոխության անցնելու: Թվային տեխնոլոգիաներն առաջ են ընթանում եւ ժամանակն է, որ մենք ունենանք նոր կայք»,-ասաց Արամ Անանյանը:
Արամ Անանյանը նշեց, որ մեկ շաբաթ առաջ «Արմենպրես»-ը սկսեց նաեւ փոդքաստային նախագծերով հանդես գալ՝ «Հայաստանի ապագան» եւ «Հեքիաթ միասին» նախագծերը:
«Այս տարի «Արմենպրես»-ում նորությունների առիթները շատ են լինելու: Մեր գործընկերների օժանդակությամբ մենք տեխնիկական բովանդակային եւ կարողությունների ավելացման հնարավորություններ ունենք: Կարծում եմ, որ շատ շուտով առիթ կունենանք նոր լեզուների մասին խոսել: Հուսով եմ շատ շուտով, սեղմ ժամկետում այդ մասին եւս կխոսենք: Մեծապես կարեւորում եմ տարբեր մեդիա հարթակներում մեր լրատվամիջոցների ներկայությունը: Եվ «Հայաստանի Հանրապետություն» թերթի համար այս նոր սկիզբը, պայմանական, նոր վերելքի մեկնարկ եմ համարում մեզ համար: Շնորհակալ եմ մեր գործընկերներին, թերթի կոլեկտիվին, բոլոր նրանց, որոնք այս թվային վերափոխումը հնարավոր դարձրեցին»,-հավելեց Արամ Անանյանն՝ ընդգծելով, որ թերթը հասանելի է լինելու եւ՛ թղթային, եւ՛ էլեկտրոնային տարբերակով, դառնալու է բոլորի ձայնը:
«Հայաստանի Հանրապետություն» թերթի գլխավոր խմբագիր Արթուր Ղարագյոզյանը նշեց, որ թերթն առանձնանում է թեմատիկ բազմազանությամբ: Այն, ունենալով պետական կարգավիճակ, անդրադառնում է ոչ միայն պետական պաշտոնական լրահոսին, այլեւ ներկայացնում է մեկնաբանություններ, վերլուծություններ եւ այլն:
«Այսօր մենք թեմաների բավական ընդգրկուն բազա ենք ապահովում, որպեսզի եւ՛ տարիքային, եւ՛ սոցիալական բոլորի խմբերին, հնարավորին չափ, ներգրավենք: Ես կցանկանայի ասել, որ թերթի թղթային կրիչի վրա եղած հրապարակումները եւ էլեկտրոնային արտադրանքը լրացնելու են մեկը մյուսին: Կլինեն այնպիսի նյութեր, որոնք մինչեւ թերթում լույս ընծայվելը կհայտնվեն կայքում եւ կունենանք նյութեր, որոնք հնարավոր կլինի ընթերցել թղթային տարբերակով»,-ասաց Արթուր Ղարագյուզյանը: «Հայաստանի Հանրապետություն» թերթն իր դռներն է բացել նաեւ Սփյուռքի մամուլի հետ համագործակցության համար:
Ծրագրի պատասխանատու, «Ռեսպուբլիկա Արմենիա» թերթի գլխավոր խմբագիր Արարատ Պետրոսյանը, ներկայացնելով նոր կայքի տեխնիկական հարցերը, նշեց, որ կայքի վերափոխումը կատարվել է՝ հնարավորինս հարմարեցնելով թերթի տեսքին՝ հիմքում ընդունելով ժամանակակից տեխնոլոգիաները: «Հանրապետություն», «Միջազգային», «Սոցիում», «Սփյուռք», «Հոգեւոր», «Սպորտ» եւ այլ բաժիններով ներկայացվելու են նյութերը, իսկ «Արխիվային» բաժնում կայքի այցելուները կգտնեն նախորդ հրապարակումները: Կայքում տեղ գտնեն նաեւ տեսանյութեր:
