Հայ եւ ռուս ժողովուրդների դարավոր բարեկամությունը մեկ անգամ չէ, որ դիմացել է ժամանակների փորձություններին ու դժվարություններին, արտահայտվել պատերազմների ընթացքում, մշակույթի եւ արվեստի բնագավառներում, ամենատարբեր ուղղություններում: Ասել է թե՝ ամենաբարդ իրավիճակներում ռուսները նեցուկ են եղել հայերին, եղբայրաբար կիսել նրանց ուրախությունն ու ցավը: Այդ իրողությունն ապացուցվեց նաեւ 44-օրյա պատերազմից հետո, երբ Ռուսաստանի խաղաղապահ ուժերը սկսեցին իրենց առաքելությունն իրականացնել Արցախում՝ նպաստելով ավերածությունների վերացմանը, ենթակառուցվածքների վերականգնմանը, հրադադարի պահպանմանը:
Ռուսաստանի օրվա կապակցությամբ Արցախում կայացել են մշակութային միջոցառումներ՝ նվիրված հայ եւ ռուս ժողովուրդների բարեկամությանն ու մշակութային կապերին: Ստեփանակերտի պատկերասրահում կազմակերպվել է բաց դասախոսություն՝ 19-րդ դարի ռուս նկարիչներ Ռեպինի, Սուրիկովի, Վասնեցովի, Վերեխչագինի, Շիշկինի, Կրամսկոյի եւ ուրիշների մասին: Ունկնդիրներն էին մայրաքաղաքի մտավորականության ներկայացուցիչները, բուհերի դասախոսներն ու ուսանողները: Պատկերասրահի տնօրեն Ելենա Դադայանը աշխատակիցների անունից շնորհավորեց միջոցառմանը ներկա ռուս խաղաղապահներին տոնի առթիվ՝ կարեւորելով ռուսական գեղարվեստի տեղն ու դերը աշխարհի մշակութային պատմության մեջ: Գիտաշխատող Ն. Գրիգորյանը պատմեց նրանց ստեղծագործական ուղու մասին, տեսաշարի միջոցով ներկայացրեց նշված նկարիչների հայտնի գործերը:
Բաց դասախոսությունը եզրափակվեց ռուսական ռոմանսով՝ Ստեփան Ջհանգիրյանի կատարմամբ: Նույն օրը Ստեփանակերտի Սայաթ-Նովայի անվան երաժշտական քոլեջում կայացավ գրական-երաժշտական երեկո՝ նվիրված ռուսական պոեզիային եւ երգարվեստին, որ կազմակերպվել էր քոլեջի եւ Մեսրոպ Մաշտոցի անվան հանրապետական գրադարանի կոլեկտիվների համատեղ ջանքերով: Ստեփանակերտի Եղիշե Չարենցի անվան թիվ 7 միջնակարգ դպրոցի աշակերտներն ասմունքեցին Աննա Ախմատովայի, Բուլատ Օկուջավայի եւ ուրիշ բանաստեղծների ստեղծագործություններից: Երաժշտական քոլեջի դասական երգեցողության բաժնի ուսանողների կատարմամբ հնչեցին Մուսորգսկու, Գլինկայի, Դարգոմիժսկու, Բալակիրեւի, Ռախմանինովի եւ ռուս հայտնի այլ կոմպոզիտորների ռոմանսները:
Միջոցառմանը ներկա ռուսական խաղաղապահ զորակազմի ներկայացուցիչ, մայոր Օ. Սերգեեւը խորին շնորհակալություն հայտնեց միջոցառման համար, այնուհետեւ կարդաց իր բանաստեղծությունը՝ նվիրված հայ եւ ռուս ժողովուրդների բարեկամությանը: Ավանդույթի համաձայն՝ վերջում խաղաղապահները միջոցառման մասնակիցներին քաղցրավենիք հյուրասիրեցին:
Ռուսաստանի օրը նշվել է նաեւ Ստեփանակերտի մանկապատանեկան ստեղծագործական կենտրոնում՝ «Խաղաղությունը եւ խաղաղապահները երեխաների աչքերով» խորագիրը կրող ցուցահանդեսով: Արցախցի երեխաները շնորհավորել են կենտրոնում հյուրընկալված ռուս խաղաղապահ զորախմբի ներկայացուցիչներին: Կենտրոնի խորհրդի նախագահ Լյուդմիլա Բարսեղյանը խաղաղապահներին երախտագիտություն է հայտնել Արցախում իրականացվող առաքելության համար։ «Խաղաղությունը եւ խաղաղապահները երեխաների աչքերով» ցուցահանդեսին ներկայացված շուրջ 140 նկարներում երեխաներն արտացոլել են իրենց պատկերացումները խաղաղության եւ խաղաղապահների մասին։ Ռուս խաղաղապահները վստահեցրել են, որ շարունակելու են հրադադարի պահպանմանը եւ արցախցիների անվտանգությանը միտված իրենց ջանքերը, անելու են հնարավորը, որպեսզի տարածաշրջանում խաղաղություն եւ կայունություն ապահովվի:
