Արցախյան 44-օրյա պատերազմից հետո, կապված ավերածությունների վերացման, մշտական օջախներից տեղահանված, թշնամու կողմից բռնազավթված բնակավայրերի բնակիչների, առաջին հերթին, բնակարանային պայմանների բարելավման եւ մի շարք այլ իրողությունների հետ, որակյալ արհեստագործների, արհեստավարժ մասնագետների պատրաստումն ու ներգրավումը տնտեսության մեջ կարեւորագույն նախապայման են դարձել Արցախի կառավարության համար: Այդ նպատակով համապատասխան քայլեր են ձեռնարկվում բուհերը բեռնաթափելու եւ միջնակարգ-մասնագիտական կրթօջախներ ստեղծելու ուղղությամբ:
Ինչպես հայտնի է, ի թիվս մի շարք ուսումնական հաստատությունների, «Եզնիկ Մոզյան» արհեստագործական ուսումնարանը ստիպված էր տեղափոխվել Ստեփանակերտ ու այնտեղ շարունակել իր գործունեությունը: Համալրելով մասնագիտությունների ցանկը եւ հաշվի առնելով հատկապես շինարարության ոլորտում որակյալ մասնագետների պահանջարկը, մայրաքաղաքում գործող պրոֆտեխնիկական ուսումնարանի տնօրինությունը «հարկադրված» էր նույնպես վերակառուցել իր աշխատանքները: Սակայն պարզվում է, ձեռնարկվող քայլերը լիովին չեն կարող վերափոխել իրավիճակը, եւ առավել գործուն միջոցներ պիտի ձեռնարկվեն կրթական համակարգը բարեփոխելու համար:
Ելնելով այս իրողություններից, կառավարությունն իր «փնտրտուքների» արդյունքում եւս մեկ կրթական ուղղություն նախընտրեց՝ ողջունելով հայ-իտալական կրթական համալիրի մուտքը Արցախ: Արհեստագործականի հիմքի վրա՝ նոր ուսումնականում այն կգործի հայկական ոգով եւ իտալական տեխնոլոգիաներով ու չափանիշներով: Ըստ ԿԳՄՍ փոխնախարար Հասմիկ Մինասյանի, կրթօջախը բուհ ընդունվելու այլընտրանք կդառնա: «Այն կազմակերպելու է միջազգային չափորոշիչներին համահունչ հանրակրթական, ավագ եւ նախնական մասնագիտական կրթություն: Ավարտական փուլում հաստատությունը կթողարկի արհեստավարժ վարպետներ, ովքեր արտադրության մեջ որոշիչ դերակատարություն կունենան եւ կցուցադրեն իրենց գիտելիքներն ու կարողությունները: Իսկ համալիրի ուսումնական եւ տեխնիկական հարուստ բազան՝ ուսուցանող վարպետների եւ մանկավարժների աջակցությամբ, շրջանավարտներին կտա այն ամենը, ինչը հատկանշական է հմուտ արհեստագործ դառնալու համար»,- գտնում է Հ. Մինասյանը:
Փոխնախարարը զրույցի ժամանակ անդրադարձավ «մեր ժամանակներում նախապատվելի» այն մասնագիտությունների ցանկին, ինչպիսիք են ռադիոէլեկտրոնային միջոցների սպասարկումը, վարսավիրական արհեստը, հասարակական սնունդը, տրանսպորտային միջոցների շահագործումը, փայտամշակման արտադրությունն ու կարի տեխնոլոգիան, որ մասնավորապես կապված է հագուստի մոդելավորման հետ, եւ այլն: Ուսուցման ընթացքում համադրվելու են հայկական եւ իտալական ծրագրերը: Համալիրում դասավանդելու են փորձառու մասնագետներ ու մանկավարժներ, որակավորման նպատակով նրանք գործուղվելու են Իտալիա եւ համապատասխան դասընթացներ են անցնելու: Հ. Մինասյանը համոզված է, որ կրթօջախի շրջանավարտները պահանջված կլինեն աշխատաշուկայի համար եւ կնպաստեն տնտեսության վերականգնմանն ու ենթակառուցվածքների զարգացմանը:
