«Մեր նպատակն է դպրոցից սկսած նոր սերնդին դաստիարակել այնպես, որ իմանա ինքն ով է, ինչ պատմություն ունի, որտեղից է գալիս և ուր է գնալու»:
Սպարապետ Վազգեն Սարգսյան
24 տարվա պատմություն ունի ՀՀ ԵԿՄ «Պատանի երկրապահ» ակումբը, իսկ արդեն 13 տարի է, ինչ Գեղարքունիքի մարզում՝ Մարտունու տարածաշրջանի Ծովինար գյուղի մոտ՝ Սևանա լճի ափին, գործում է ԵԿՄ «Պատանի երկրապահ» ուսումնամարզական ճամբարը, որի բացումը տեղի է ունեցել հուլիսի 17-ին:
Օգոստոսի 23-ին ներկա եղա ճամբարի փակման հանդիսավոր արարողությանը: Այստեղ էին ՀՀ ԵԿՄ վարչության անդամներ՝ մարզխորհրդի և տարածքային բաժանմունքների նախագահներ՝ վարչության նախագահ Սասուն Միքայելյանի գլխավորությամբ, ինչպես նաև՝ ՀՀ ՊՆ ներկայացուցիչներ՝ գեներալներ, սպաներ, հյուրեր, բարերարներ, պատանիների ծնողներ: Մինչ արարողության պաշտոնական մասի մեկնարկը՝ տեղի ունեցավ ծաղիկների խոնարհում ճամբարում տեղադրված խաչքարի առջև: Դրոշակակիրները հրապարակբերեցին ՀՀ, Արցախի Եռագույն և Երկրապահի դրոշները: Հնչեցին մեր 2 հանրապետությունների ու ԵԿՄ օրհներգերը, եղավ լռության րոպե: ՀՀ ԵԿՄ աշխատակազմի ղեկավար, գնդապետ Վաչագան Ղուկասյանը, ով ղեկավարում էր փակման արարողությունը, վարչության նախագահ Ս. Միքայելյանին զեկուցեց, որ ճամբարականները շարված են և պատրաստ հանդիսավոր միջոցառմանը: Ս. Միքայելյանը ողջունեց պատանիներին ու նրանց ղեկավարներին:
Այնուհետև ներկաներին ողջունեց և Տերունական աղոթքի խոսք ասաց Գևորգ քահանա Տեր-Բարսեղյանը: Շնորհավորանքի և ողջույնի խոսքով հանդես եկավ ԵԿՄ վարչության նախագահ Սասուն Միքայելյանը: ՀՀ ԵԿՄ վարչության կողմից եղավ նաև պարգևատրման արարողություն: ԵԿՄ շնորհակալագրերի և պատվոգրերի արժանացան ԵԿՄ-ի հետ համագործակցող պետական կառույցների ներկայացուցիչները,հովանավորներ և ճամբարականներ, ովքեր աչքի էին ընկել տարբեր մրցույթներում:
