Ձմռան շրջանում ռազմավարական եւ կենսական նշանակության օբյեկտների անխափան աշխատանքների ապահովման անհրաժեշտությամբ պայմանավորված՝ հանրապետությունում մեկնարկել է գազի, էլեկտրաէներգիայի, կապի եւ հաղորդակցության մյուս միջոցների տեխնիկական սարքավորումների վերանորոգման ու թարմացման գործընթացը: Այդ կարեւոր խնդրի արդյունավետ համակարգման համար ԱՀ նախագահ Արայիկ Հարությունյանի մոտ համապատասխան ոլորտների պատասխանատուների եւ մասնագետների մասնակցությամբ հրավիրված խորհրդակցությունում քննարկվել են լիարժեք լուծում պահանջող հարցերը, կոնկրետ հանձնարարականներ են տրվել երկրի ղեկավարից:
Հաշվի առնելով այն իրողությունը, որ պատերազմի հետեւանքով թշնամու վերահսկողության տակ են անցել Քարվաճառի ու Քաշաթաղի շրջաններում կառուցված ՀԷԿ-երը, եւ խաթարվել է Սոթքից Արցախ ձգվող բարձրավոլտ էլեկտրագիծը, նախագահը «Արցախէներգո» ՓԲԸ ղեկավարների ուշադրությունը հրավիրել է բոլոր հատվածներում Գորիս-Ստեփանակերտ էլեկտրահաղորդման գծի անվտանգ ու անխափան ապահովմանը՝ հանձնարարելով վթարների արագ վերացման նպատակով այսուհետ «սնող երակի» որոշ հատվածներում, մասնավորապես՝ Աղավնոյի եւ Լիսագորի ենթակայաններում, մասնագետների շուրջօրյա հերթապահություն սահմանել:
«Արցախէներգոյի» տեխնիկական տնօրեն Վահրամ Խաչատրյանի հավաստմամբ՝ վերջին շրջանում հանրապետության տարածքում եւ հատկապես մայրաքաղաքում հոսանքազրկման դեպքերը հիմնականում կապված են եղել տեխնիկական որոշ անսարքությունների հետ, որոնք ներկայումս վերացված են: Նրա խոսքերով՝ համակարգի արագ արձագանքման խմբի արհեստավարժների կողմից ձեռնարկվող քայլերն ուղղված են խափանումների վերացմանը: Աշխատանքներ են տարվում ժամանակակից նոր սարքավորումներ ձեռք բերելու եւ արագ տեղադրելու ուղղությամբ: Այդ տեսակետից Վ. Խաչատրյանը կարեւորեց Ստեփանակերտի ենթակայանում նախկինում գործող տրանսֆորմատորը 40 հազար կիլովատ հզորությամբ նոր տրանսֆորմատորով փոխարինելու հանգամանքը, ինչը նվազագույնի կհասցնի հոսանքազրկման դեպքերը: Նա ավելորդ չհամարեց ընդգծել հիշյալ ենթակայանի ռազմավարական նշանակությունը, որից փաստացի սնվում է ոչ միայն մայրաքաղաքը, այլեւ Մարտունու, Մարտակերտի եւ Ասկերանի շրջանները: Ընկերության տեխնիկական տնօրենը վստահեցրեց, որ համակարգի նյութատեխնիկական բազան շարունակ թարմացվում է, վերանորոգվում են էլեկտրահաղորդման գծերն ու ենթակայանները, եւ շուտով ձմռան նախապատրաստական աշխատանքները կավարտվեն:
«Արցախգազ» ՓԲԸ տնօրեն Սեյրան Միքայելյանը նույնպես վստահեցնում է, որ ձմռան ընթացքում գազի մատակարարման խնդրում արգելքներ չեն ծագի, եւ կարվի հնարավորը, որպեսզի բնակչությունը չդժգոհի ծառայությունից: Միեւնույն ժամանակ նա հորդորեց խնայողաբար օգտագործել այն՝ «հաշվի առնելով ձմռան քմահաճ լինելու առանձնահատկությունները»:
Անդրադառնալով քաղաքացիներին գազի, էլեկտրաէներգիայի եւ կապի միջոցների օգտագործման դիմաց պետության կողմից նախատեսված փոխհատուցման խնդրին՝ ԱՀ տարածքային կառավարման եւ ենթակառուցվածքների նախարար Հայկ Խանումյանը նշեց, որ դեկտեմբերի 1-ից կդադարեցվի էլեկտրաէներգիայի օգտագործման դիմաց քաղաքացիների սուբսիդավորումը, եւ պետության կողմից այդ արտոնությունը կտարածվի սոցիալական որոշ խմբերի վրա: Ինչ վերաբերում է գազի եւ կապի ծառայության դիմաց վճարումներին, ապա կառավարության կողմից ընդունված որոշումն ուժի մեջ կմնա մինչեւ 2022 թ. մարտի 1-ը:
