Նոյեմբերի 18-ին Ամերիկայի Հայ ավետարանչական ընկերակցության Երևանի կենտրոնական գրասենյակի դահլիճում տեղի ունեցավ Արաբական ծոցի Աստվածաշունչ ընկերության հրատարակած «Մանուկներու բացատրական Աստուածաշունչ. կյանքի մեծ հարցումները փոքրիկ ընթերցողների համար» արևմտահայերեն գրքի շնորհանդեսը: Միջոցառմանը ներկա էին գրքի կազմման ու հրատարակման մեջ ներդրում ունեցած Արաբական ծոցի Աստուածաշունչի ընկերության ընդհանուր քարտուղար Հրայր Ջեբեջյանը, Հայաստանի Աստվածաշնչային ընկերության գլխավոր քարտուղար Եզնիկ եպիսկոպոս Պետրոսյանը, Ավետարանչական ընկերակցության Հայաստանի ներկայացուցիչ Հարութ Ներսեսյանը և այլք:
Մասնագետների խոսքերով` գիրքը մանուկների համար բավական մատչելի է, ստեղծված է հարցադրումների տեսքով, կարծես զրույց լինի երեխայի ու գրքի միջև: Գիրքը պատկերազարդ է, որը, անշուշտ, կգրավի երեխային՝ ավելի մեծ ոգևորությամբ սերտելու գրվածքները: Այն երեխային հնարավորություն է տալիս ինքնուրույն աշխատելու, այսինքն` կարդալ ու ընկալել առանց որևէ արտաքին օժանդակության: Յուրաքանչյուր բաժին սկսվում է սաղմոսով, այսինքն՝ դա ևս երեխաների ուշադրությունը գրավելու և ուսուցանելու տարբերակ է, քանի որ հենց սաղմոսներն են պարունակում դաստիարակչական հսկայական բովանդակություն: Ամերիկայի Հայ ավետարանչական ընկերակցությունը մտադիր է գիրքը տպագրել նաև արևելահայերենով`մանուկ-ընթերցողների շրջանն ընդարձակելու նպատակով:
Ընկերակցության խմբագիր Անդրանիկ Մարդոյանը ներկայացրեց հոգևոր դաստիարակություն ստացած երեխայի և, առհասարակ, մարդու կերպարը. «Համաձայնենք, որ մարդը կրթված ու դաստիարակված է, բարոյական բարձր չափանիշների տեր է, եթե ունի հոգևոր զարգացման որոշակի պաշար: Ուրեմն՝ անհատի կերտման գործում անչափ կարևոր է քրիստոնեական դաստիարակությունը, որի օգնությամբ էլ ձևավորվում է քրիստոնեական գիտակցություն, իսկ հետագայում` քրիստոնեական աշխարհայացք: Եթե քրիստոնեական գիտակցությունը գերակայի մտավոր գիտակցության վրա, ապա երեխան, պատանին և երիտասարդը կդառնան ազնվախոհ, ազնվասիրտ, բարի, ճշմարտությունը ճանաչող, ճշմարտությանը հետևող և ճշմարտության համար պայքարող»:
Հենց այս շարժառիթով մի խումբ հայրենասեր նվիրյալներ զարկ տվեցին «Մանուկներու բացատրական Աստուածաշունչ» արևմտահայերեն գրքի հրատարակմանը: Դրա ստեղծման հիմքում քրիստոնյա հեղինակների ողջ գիտելիքներն են ու փորձառությունը: Վստահաբար գիրքն օգտակար կլինի ոչ միայն երեխաների, այլև կիրակնօրյա դպրոցների ուսուցիչների համար` որպես յուրատիպ ձեռնարկ:
Շնորհանդեսի ավարտին դահլիճում ներկա բոլոր երեխաներին գրքեր բաժանվեցին:
