Ժողովրդագրական իրավիճակի բարելավման նպատակով ընտանիքում 3-րդ եւ յուրաքանչյուր հաջորդ երեխայի ծննդյան կապակցությամբ կնշանակվի եւ կվճարվի դրամական աջակցություն՝ ամսական 50 հազար դրամի չափով, մինչեւ երեխայի 6 տարին լրանալու ամիսը` ներառյալ։
Կառավարության երեկվա նիստում կայացվեց համապատասխան որոշումը։ Նաեւ հաստատվեց այդ դրամական աջակցությունը նշանակելու եւ վճարելու կարգը։ Որոշումն ուժի մեջ կմտնի հրապարակմանը հաջորդող օրվանից եւ «կտարածվի այն դեպքերի վրա, երբ երեխան ծնվել է 2022 թ. հունվարի 1-ին կամ դրանից հետո՝ մինչեւ 2026 թ. դեկտեմբերի 31-ը՝ ներառյալ։ Աշխատանքի եւ սոցիալական հարցերի նախարարը մինչեւ 2025 թ. հուլիսի 1-ը կառավարություն պետք է ներկայացնի առաջարկ՝ 2026 թ. հունվարի 1-ին եւ դրանից հետո ծնված երեխաներին սույն որոշմամբ սահմանված դրամական աջակցություն նշանակելն ու վճարելը շարունակելու նպատակահարմարության վերաբերյալ»։
ԱՍՀ նախարար Նարեկ Մկրտչյանը նշեց, որ գործող իրավակարգավորումների համաձայն՝ երեխայի կարգաթվով պայմանավորված պետական նպաստ տրվում է միայն երեխայի ծննդյան դեպքում, որը միանվագ է։ Ըստ էության, ժողովրդագրական իրավիճակի բարելավմանն ուղղված պարբերական բնույթի դրամական աջակցություն ՀՀ օրենսդրությամբ նախատեսված չէ։
Նախատեսվեց, որ դրամական աջակցությունը վճարվելու է անկանխիկ՝ բանկի միջոցով։ Ակնկալվում է, որ ծրագրի իրականացմամբ կավելանա վերջին տարիներին գրանցված՝ 3 եւ ավելի երեխաների թվի տարեկան աճի տեմպը։ Հաշվի առնելով 3 եւ ավելի երեխաների թվի՝ վերջին 5 տարիների տարեկան միջին աճի տեմպը՝ մոտ 5 տոկոս, եւ ծրագրի արդյունքում ակնկալվող հավելյալ տարեկան 3 տոկոս աճը, կանխատեսվում է, որ 3 եւ ավելի երեխաների թիվը 2020 թ. 10131-ի դիմաց կավելանա տարեկան 8.14 տոկոսով՝ կազմելով՝ 2022 թ.՝ 10956, 2023 թ.՝ 11844, 2024 թ.՝ 12804, 2025 թ.՝ 13848 եւ 2025 թ.՝ 14976։
Դրամական աջակցությունը կնշանակվի եւ կվճարվի, եթե դիմելու օրվա դրությամբ ծնողը, շահառու երեխայի կարգաթիվը որոշելու համար հաշվի առնված երեխաները եւ զավակները, ինչպեսեւ շահառու երեխան ՀՀ բնակչության պետռեգիստրում հաշվառված են ՀՀ-ում բնակության վայրի հասցեով (բացառությամբ ռազմական ուսումնական հաստատությունում սովորող անձի, պարտադիր զինվորական ծառայության զորակոչված կամ ազատազրկման վայրում պատիժը կրող անձի)։ Նաեւ՝ եթե դիմելու օրվա դրությամբ ծնողն ու շահառու երեխան գտնվում են Հայաստանում։ Եթե միաժամանակ ծնվել են մեկից ավելի երեխաներ, ապա դրամական աջակցությունը նշանակվում եւ վճարվում է յուրաքանչյուր շահառու երեխայի համար:
Դրամական աջակցությունն ստացող ծնողը դրամական աջակցության վճարումը շարունակելու համար պարտավոր է տարեկան առնվազն մեկ անգամ, վերջին անգամ բանկ ներկայանալու ամսվան հաջորդող 12-րդ ամսվա վերջին աշխատանքային օրվանից ոչ ուշ, ներկայանալ բանկ եւ հայտարարություն ստորագրել Հայաստանում լինելու մասին:
Աջակցություն ստանալու իրավունքը դադարում է, օրինակ, հետեւյալ դեպքերում. 1. շահառու երեխայի 6 տարին լրանալու դեպքում, 2. պետռեգիստրում առկա տվյալների համաձայն՝ շահառու երեխայի կամ ծնողի հաշվառումից դուրս գալու դեպքում, 3. պետռեգիստրում առկա տվյալների համաձայն՝ շահառու երեխայի կամ ծնողի` օտարերկրյա պետության բնակության վայրի հասցեով հաշվառվելու դեպքում, 4. ծնողի՝ ՀՀ քաղաքացիությունը դադարելու դեպքում, 5. ծնողին 6 ամիս անընդմեջ դրամական աջակցությունը չվճարելու դեպքում, 6. շահառու երեխայի՝ Հայաստանից անընդմեջ 6 ամսից ավելի ժամկետով բացակայելու դեպքում, 7. շահառու երեխայի կամ ծնողի մահվան դեպքերում։
