Արցախի Հանրապետությունում ավարտվել է դիմորդների` մասնագիտությունների եւ ընդունելության քննությունների հայտագրման գործընթացը: Գնահատման եւ թեստավորման կենտրոնի տնօրեն Յուրի Քարամյանի խոսքով, Արցախի եւ ՀՀ դիմորդների տվյալները մեկ ընդհանուր բազայում են, եւ ընդունելության հետ կապված բացատրական բոլոր նյութերը դեռեւս մարտի սկզբներին են ուղարկվել դպրոցներ: ԳԹԿ-ի պատասխանատուները հանդիպումներ են ունեցել շրջանավարտների հետ, խորհրդակցություններ անցկացրել, պարզաբանել ընդունելության կարգի փոփոխությունները, նրանց տրամադրել դիմորդների քայլերի տեխնիկական ուղեցույցը: Չնայած հայտագրումն առցանց է, նրանցից շատերը նախընտրել են ներկայանալ ԳԹԿ` լրացուցիչ պարզաբանումներ ստանալու եւ տեղում լրացնելու հայտը:
Ըստ հաստատված կարգի, ընդունելության քննությունները լինելու են միասնական, կենտրոնացված եւ ներբուհական: Սակայն կենտրոնացված քննություններ Արցախի բուհերում չեն լինի: Ինչ վերաբերում է ներբուհականին, ապա այն կանցկացվի արվեստի եւ ֆիզկուլտուրայի գծով: Հատկանշական է, որ դիմորդն այս տարի կհայտագրի ընդամենը մեկ մասնագիտություն: Եթե նախորդ տարիներին նա կարող էր հայտագրել մինչեւ 8 մասնագիտություն (երկուսը` անվճար, մնացածը` վճարովի), այժմ ընդունելության նոր կարգի համաձայն, կարող է հայտագրվել չորս բուհի համար: ՀՀ բուհերում Արցախն ունի «Իրավագիտություն» մասնագիտության նպատակային տեղ: Նույն մասնագիտությամբ տեղեր են հատկացված Արցախի պետական, «Գրիգոր Նարեկացի», «Մեսրոպ Մաշտոց» համալսարաններում: Իսկ դա նշանակում է, որ դիմորդն իրավունք ունի հայտագրվել Երեւանի պետական համալսարան 2-րդ, 3-րդ, 4-րդ հայտերով` Արցախի բուհեր նույն մասնագիտության համար: Եթե նա չանցնի մրցույթի առաջին փուլով, դրական ստացած գնահատականներով կմասնակցի թափուր տեղերի համար մրցույթի լրացուցիչ փուլին:
ԳԹԿ տնօրենի տեղեկացմամբ, այս տարի ընդունելության քննությունները կկայանան երկու առարկայից. «Եթե նախկինում որոշ մասնագիտություններից երեք քննություն էին հանձնում, ապա այս տարի հնարավոր է նաեւ մեկ քննությամբ ընդունվել չորս մասնագիտությունից, որից երկուսը ԱրՊՀ-ում («Ֆիզիկա, մաթեմատիկա», «Քիմիա, կենսաբանություն»), երկուսն էլ տեխնոլոգիական համալսարանում՝ ագրարային մասնագիտություններից: Միեւնույն ժամանակ միասնական քննությունով կարող են ընդունվել վճարովի համակարգ»: «Իրավագիտություն», «Ֆինանսներ» մասնագիտությունների համար օտար լեզվի փոխարեն դիմորդները կհանձնեն հայոց լեզու: Նախկինում, երբ երեք քննություն էր, այս առարկաներն առանձին-առանձին էին հանձնում. «Հետո միացրին` թողնելով դիմորդի հայեցողությանը` հանձնելու հայոց լեզու կամ օտար լեզու»: Յու. Քարամյանի համոզմամբ. «Դա այնքան էլ արդարացված չէ, քանի որ այդ առարկաների չափորոշիչները տարբեր են, եւ դիմորդները փաստորեն հայտնվում են անհավասար պայմաններում: Իսկ համաձայն նոր կարգի, բոլորը հայոց լեզու հանձնելով` հայտնվում են հավասար պայմաններում»:
Ըստ Յու. Քարամյանի, ոչ բոլոր դպրոցներում են երեխաները գնահատվում չափորոշիչների հիման վրա ու երբեմն համեմատական գնահատական է դրվում: Ահա թե ինչու «ատեստատի գնահատականը միշտ չէ, որ արտացոլում է երեխայի իրական գիտելիքը»: Նոր կարգով մրցույթի ժամանակ հանձնաժողովն առաջնորդվելու է մեկ միասնական քննության գնահատականով, հավասար պայմանների դեպքում միայն հաշվի կառնվի ատեստատի գնահատականը:
Որպեսզի դիմորդն իրավունք ունենա մասնակցել մրցույթին (ՀՀ բուհերում նպատակային անվճար տեղերի համար), պիտի վերցնի առավելագույն հանրագումարի առնվազն 75 տոկոսը: Մրցույթի կազմակերպման ժամանակ հանձնաժողովն իրավունք ունի պահուստային տեղերի հաշվին նոր որոշումներ ընդունել: Չնայած տոկոսային հարաբերությամբ շրջանավարտների թիվը շուրջ 500-ով պակաս է նախորդ տարվանից, մեծացել է ՀՀ բուհեր նախընտրած դիմորդների թիվը: Հատկանշական է, որ ՀՀ բուհերում Արցախի նպատակային տեղերի համար կարող են դիմել միայն Արցախի ուսումնական հաստատությունն ավարտած ու նաեւ` մինչեւ սեպտեմբերի 27-ը 12-րդ դասարանն Արցախում սովորած, բայց տեղահանության հետեւանքով ՀՀ-ում ապաստանած շրջանավարտները:
