Հունիսի 1-ին Երեւանում՝ Oղակաձեւ զբոսայգում, Արցախի՝ թշնամու տիրապետության տակ անցած Հադրութի, Քաշաթաղի եւ Շուշիի շրջանների երեխաները մասնակիցը եղան իրենց տոնին նվիրված «Հադրութ՝ մեծ երազանք» խորագիրը կրող ցերեկույթին, որը կազմակերպել էին «Դիզակ Արտ» մշակութային երիտասարդական կենտրոնը, ՀՀ-ում Արցախի Հանրապետության կառավարության օպերատիվ շտաբը եւ «I U WE» հասարակական կազմակերպությունը՝ Երեւանի քաղաքապետարանի, «Թեքեյան կենտրոն» հիմնադրամի եւ մի քանի ընկերությունների հովանավորությամբ: Հավաքական հիշողության եւ հայրենիքի ամբողջականության գաղափարն էր ցերեկույթի նպատակը:
Ներկաներին ողջունեց եւ տոնի առթիվ շնորհավորեց ՀՀ-ում Արցախի Հանրապետության կառավարության օպերատիվ շտաբի պետ Միքայել Վիրաբյանը: Ցերեկույթին հատկացված վայրում ներկայացված էին Հադրութի մանկապատանեկան ստեղծագործական կենտրոնի սաների նկարչական ու ձեռագործ աշխատանքները, Արցախին բնորոշ կենցաղային իրեր: Փոքրիկները մոտ 2 ժամ իրենց ելույթներով հիացրեցին ու հաճելի պահեր, հուզմունք, երազանք պարգեւեցին ներկաներին: Ազգագրական պարերով ու երգերով, թատերական ներկայացմամբ, նորաձեւության ցուցադրմամբ հանդես եկան Հադրութի մանկապատանեկան ստեղծագործական եւ «Դիզակ Արտ» մշակութային երիտասարդական կենտրոնների սաները: «Արցախ» եւ «Այայի երկիր Արցախ» երգերի հիանալի կատարումով հանդես եկավ բերձորցի Լիլիթ Ավագյանը, ով այժմ սովորում է երաժշտական դպրոցում: Սոս Սարգսյանի անվան համազգային թատրոնի դերասան Սարգիս Շողունցը, ողջունելով ներկաներին, շնորհավորելով մանուկներին տոնի առթիվ, ասաց. «Երազանքները բնավորություն ունեն եւ միշտ կատարվում են», ապա կարդաց Թումանյանի «Անխելք մարդը» հեքիաթը:
Հաղորդավարը տեղեկացրեց, որ համազգային թատրոնը միշտ է եղել Արցախի կողքին: «Դիզակ Արտ»-ի սաները ներկայացրեցին Հովհաննես Թումանյանի «Շունն ու կատուն» եւ «Մի կաթիլ մեղր» հեքիաթները, նաեւ Արցախի բարբառով՝ Հադրութի խոսվածքով: Ընթացքում Հադրութի մանկապատանեկանի ուսուցիչները կազմակերպել էին վարպետաց դասեր գեղանկարչությունից եւ ձեռքի աշխատանքից: Նկարչական խմբակի ուսուցիչ Էդիկ Ալավերդյանի սաներից 13-ամյա Անահիտ Այվազյանը Դադիվանքն էր նկարում: Ասաց, որ ցանկանում է դիզայներ դառնալ: Արցախյան վերջին պատերազմում անմահացած հադրութցի Վոլոդյա Մհերյանի քույրիկը՝ Իրինան, հանդես եկավ մենապարի հրաշալի կատարումով՝ հավատով տուն է վերադառնալու: Համերգային մասից հետո փոքրիկները հյուրասիրվեցին պաղպաղակով: Ներկա էին կազմակերպիչ եւ հովանավոր կառույցների ղեկավարներ, ներկայացուցիչներ, ծնողներ: Տոնին մասնակից եղան այգում զբոսնող մեր հայրենակիցներն ու օտարերկրյա հյուրերը:
Ներկա լինելով մեր տաղանդաշատ ու խելացի երեխաների տոնին, ըմբոշխնելով նրանց կատարումները՝ հավատում եմ, որ կգա օրը, եւ Հադրութում ու Շուշիում, Բերձորում ու Քարվաճառում կրկին կհնչի հայոց երգը, կկատարվեն հայոց ազգային պարերը:
