Արդեն տեղեկացրել էինք, որ այս տարվա ապրիլի 22-ին Երեւանում, «REACT. հակամարտությունից տուժած անձանց հումանիտար աջակցության եւ ինտեգրման» ծրագրի շնորհիվ սկսվեցին սոցիալական աշխատանքի մասնագետների պատրաստման եռամսյա դասընթացները՝ «Հայաստանի սոցիալական աշխատողների ասոցիացիայի» (ՀՍԱԱ) նախաձեռնությամբ եւ ՀՀ-ում ԱՀ մշտական ներկայացուցչության հետ համագործակցությամբ:
Ըստ ՀԱԱԱ-ի նախագահ Միրա Անտոնյանի՝ դասընթացների առաջին փուլը կայացել էր Արցախում՝ Հայ օգնության ֆոնդի (ՀՕՖ) երեխաների կենտրոնի մասնագետների ու Երեւանի պետական համալսարանի մասնագետների համագործակցությամբ։ Արցախյան 44-օրյա պատերազմից հետո հազարավոր տեղահանվածներ բնակություն հաստատեցին ՀՀ մարզերում, Երեւանում, ուստի կար անհրաժեշտություն՝ աջակցել աշխատանք փնտրող տեղահանվածներին։ Եվ առաջին անգամ նաեւ Երեւանում 20-ից ավելի դիմորդների հետ կազմակերպվեցին դասընթացներ, որոնք ավարտվեցին մոտ 3 ամիս անց: Մասնակցում էին թշնամու տիրապետության տակ անցած Հադրութի, Շուշիի, Քաշաթաղի ու Քարվաճառի շրջանների տեղահանվածներ, հիմնականում՝ կանայք։ Մեծ մասը Քաշաթաղից տեղահանվածներ էին, ովքեր նախկին բնակավայրերում հիմնականում աշխատում էին կրթության ու առողջապահության բնագավառներում: Դասընթացները վարում էին ասոցիացիայի հիմնադիր անդամներից, ինչպես նաեւ՝ ԵՊՀ սոցիոլոգիայի ֆակուլտետի սոցիալական աշխատանքի եւ սոցիալական տեխնոլոգիաների ամբիոնի դասախոսներ։ Մասնակիցներն ունկնդրեցին «Օգնող փոխհարաբերություններ», «Էթիկա», «Տարբեր խոցելի խմբերի հետ աշխատանքի առանձնահատկություններ» դասախոսությունները։ Նախատեսված է դասընթացներից հետո մասնակիցներին հատկացնել համապատասխան հավաստագրեր եւ աջակցել աշխատանք գտնելու հարցում։
Սեպտեմբերի 5-ին դասընթացների մասնակիցները Երեւանում՝ ՀՕՖ-ի տարածքում, ներկա եղան դասընթացների երկրորդ փուլին, որի նպատակն է կազմակերպել պրակտիկա «Ընտանիքի կարիքների խորքային գնահատում» թեմայով։ ՀԱԱԱ-ի ներկայացուցիչ Մարգարիտա Տեր-Հովհաննիսյանը մասնակիցներին ծանոթացրեց հատուկ ձեւաթղթի հետ, որը մշակվել է «Արցախում սոցիալական աշխատուժի կարողությունների զարգացում» ծրագրի շրջանակներում։ Դասախոսը հանգամանալից ներկայացրեց ձեւաթուղթը, որով պետք է աշխատեն պրակտիկանտները տեղահանված որեւէ ընտանիքի հետ։ Ըստ մշակված ձեւաթղթի՝ պրակտիկանտները, այցելելով որեւէ ընտանիք, պետք է կարեւորեն հետեւյալ հանգամանքները՝ տեղեկություն ընտանիքի կազմի վերաբերյալ, բնակարանային պայմանները, ընտանիքի ներքին (ֆինանսական-տնտեսական) ռեսուրսները, ընտանեկան հանգամանքները, ինչը ներառում է մի շարք պայմաններ՝ ընտանիքի սոցիալական պատմություն, առողջական խնդիրներ, երեխաների խնամք, կրթություն եւ այլն, ապագայի պլաններ (ինտեգրումը նոր համայնքում) եւ ընտանիքի կարիքների ու ակտիվացման-խթանման հնարավորությունների ամփոփում։ Ընտանիք այցելելուց, նշված խնդիրների հետ ծանոթանալուց հետո սոցաշխատողը պետք է կատարի վերջնական դիտարկում եւ առաջարկներ անի միջամտության համար։ Ընթացքում մասնակիցները հարցեր էին ուղղում բանախոսին, անում առաջարկներ, ներկայացնում փաստեր՝ հաշվի առնելով նաեւ իրենց ընտանիքների օրինակները։
Վերջում բոլոր մասնակիցներին տրամադրվեցին նշված ձեւաթղթից՝ պրակտիկա իրականացնելու նպատակով։ Աշխատանքները համակարգող, ՀԱԱԱ-ի ներկայացուցիչ Դոնարա Պետրոսյանը տեղեկացրեց՝ ընթացքում կարեւոր աշխատանք են իրականացրել՝ կազմակերպելով նման դասընթացներ։ Նշեց նաեւ՝ աշխատանքները լինելու են շարունակական, իսկ մասնակիցները կստանան համապատասխան հավաստագրեր պրակտիկ աշխատանք ներկայացնելուց հետո։
