Վանաձորում, Զորավար Անդրանիկի բրոնզաձույլ հուշարձանի մոտ մի մեծ խումբ հայորդիներ՝ մշակույթի գործիչներ, զինվորականներ, երկրապահներ, ուսանողներ, դպրոցականներ, հյուրեր Երեւանից, արտասահմանյան երկրներից, մասնակիցը եղան հայ եւ բուլղար ժողովուրդների ազգային հերոս Զորավար Անդրանիկ Օզանյանի ծննդյան 157-ամյակին նվիրված հանդիսությանը՝ կազմակերպված «Ինտերկապ» բարեգործական կենտրոնի եւ Լոռու մարզի կամավորականների միության նախաձեռնությամբ: Նախ նշվեցին Զորավարի հուշարձանի կառուցմանը նպաստած մեկենասների, կազմակերպությունների, քանդակագործ Գեղամ Բեգջանյանի, ճարտարապետ Սուրեն Աբովյանի անունները: Շնորհավորանքի խոսք ասաց Գուգարաց թեմի առաջնորդ Հովնան եպիսկոպոս Հակոբյանը՝ շեշտելով. «Օրհնյալ էր Զորավարի ներկայությունը ոչ միայն հայ, այլեւ կովկասյան ժողովուրդների կյանքում, նա եղավ այն հզոր վահանը, որ ամենուր պատնեշեց թուրքական առաջխաղացմանը: Նրա հոգին ու միտքը պիտի դարերով զորավիգ լինեն մեզ մեր դժվարին պայքարի ողջ ընթացքում»:
Վանաձորի թիվ 8 դպրոցի սաները հակիրճ ներկայացրեցին Զորավարի լեգենդար կյանքն ու գործունեությունը: Բարեմաղթանքի ու գնահատանքի խոսք հնչեցրին գրող, հրապարակախոս, գրականագետ, «Զորավար Անդրանիկ» նախաձեռնող խմբի անդամ Կարո Վարդանյանը, Լոռու մարզի կամավորականների միության նախագահ, գնդապետ Կամո Հովհաննիսյանը, պատմաբան Արման Բեռնեցյանը: Հանդիսության մասնակիցներին «Ինտերկապ» ԲԿ-ի նախագահ Նորայր Զուլոյանը ներկայացրեց Բուլղարիայի արտակարգ եւ լիազոր դեսպան Կալին Վասիլեւ Անաստասովի շնորհավորական ուղերձը, որում մասնավորապես ասվում է. «Հավատացյալ հայ ժողովրդի համար Անդրանիկի կերպարն ընդունվում է որպես առնականության, իմաստնության, հայրենասիրության խորհրդանիշ: Մեզ համար նա բուլղար է, բուլղարացի մեծ առաջնորդ՝ հայկական ծագմամբ, որի համար ազատությունից քաղցր բառ գոյություն չուներ: Անդրանիկ Զորավարի արձանը զարդարում է Վառնայի Գեներալ Անդրանիկ հրապարակը»:
«Մշո զարմ» հայրենակցական միության նախագահ, Լոռու ասպետ Էդուարդ Խլղաթյանը ներկայացրեց «Լոռու ասպետների» խորհրդի որոշումը՝ Վանաձորի պատվավոր քաղաքացի Նորայր Զուլոյանին Լոռու ասպետի կոչում շնորհելու մասին եւ նրան հանձնեց Ասպետի շքանշանը: Ռազմահայրենասիրական բնույթի ցուցադրական ելույթ ունեցան Վանաձորի «Ողջ մնալու արվեստ» ակումբի (տնօրեն՝ Լիպարիտ Դալլաքյան) սաները: Վանաձորի պատվավոր քաղաքացի Վանդոս Ղարագյոզյանը եւ գեներալ-մայոր Միքայել Գրիգորյանը միասին ծաղկեպսակ, իսկ ներկաները ծաղիկներ խոնարհեցին Զորավարի հուշարձանին:
Գագիկ ԱՆՏՈՆՅԱՆ
Լոռի
