Վանեվան գյուղի փողոցներում վերջերս գործարկվեց արտաքին լուսավորության ժամանակակից, էներգախնայող «ԼԵԴ» համակարգ։ Գեղարքունիքի մարզի սահմանամերձ գյուղում լուսավորվել է շուրջ 1600 մետր ճանապարհահատված, մասնավորապես` գյուղի կենտրոնական եւ երկրորդական մի քանի փողոցներ։
Վանեվանը ՀՀ Գեղարքունիքի մարզի Վարդենիսի տարածաշրջանում է, Վարդենիս քաղաքից մոտ 3 կմ արեւմուտք, Մարտունի-Վարդենիս ճանապարհի ձախ կողմում։ Ծովի մակարդակից մոտ 1950 մ բարձրության վրա է։ 1995-ից Գեղարքունիքի մարզի կազմում է։ Ըստ ՀՀ 2011 թ. մարդահամարի արդյունքների` Վանեվանի մշտական բնակչությունը կազմել է 367, առկա բնակչությունը` 335 մարդ։
Վանեվանը երբեւէ չի ունեցել արտաքին լուսավորություն, ինչն իր բացասական հետեւանքներն է ունեցել հատկապես սահմանային լարվածության պայմաններում տեղաշարժվելիս։ Էներգախնայող եւ բնապահպանական տեսանկյունից արդարացված «ԼԵԴ» համակարգերի գործարկումը, եւ դա կարեւոր աջակցություն է համայնքին:
Արտաքին լուսավորության էներգախնայող, ժամանակակից համակարգերի ներդրումը, որն իրականացվում է «Էկոգյուղերի ցանց» նախագծի շրջանակում, արդյունավետ է բնապահպանական եւ համայնքային միջոցների տնտեսման տեսանկյունից: Ծրագրի շնորհիվ զգալիորեն կրճատվում են համայնքի բյուջետային ծախսերը, որոնք ուղղվում են այլ խնդիրների լուծմանը:
Ստեփան ՊԱՊԻԿՅԱՆ
