Մաքսիմալիզմի մասին խոսելիս սովորաբար այն կապում են պատանեկության տարիքի հետ: Սակայն երբ խոսքը վերաբերում է ժողովուրդներին, կարծես թե գոնե այս պահին պատանեկան տարիք ունեցող ժողովուրդներ չկան: Թեպետ այնքան էլ երաշխավորված չէ, որ աշխարհաքաղաքական որեւէ պահանջից կամ պահանջարկից ելնելով` վաղը չի պարզվի, որ… նոր ժողովուրդ է հայտնաբերվել:
Այդ նույն աշխարհաքաղաքականությամբ պայմանավորված` այսօրվա իրավիճակները պահանջում են մաքսիմալիզմի հետեւից վազելիս նախ հաշվի առնել դրան հասնելու հնարավորությունները: Եթե հաջողության պատուհան կա, որով հնարավոր է, հավանական է հաջողությամբ ներս ու դուրս հանել, նախ եւ առաջ պետք է այդ հնարավորությունն օգտագործել: Մեր օրերում հաճախ է այնպես ստացվում, որ այդ պատուհանը տեսնելու փոխարեն այն չնկատելու է տրվում, եւ ծավալվում է մաքսիմալիստական երթեւեկը:
Մի սենյակում, որտեղ ընդամենն այդ մի պատուհանն է, գերադասում են ոչ թե դրանից օգտվել, այլ՝ սկսում են հաջողության դուռ փնտրել: Ընդ որում, քանի որ դռան հետքն էլ չկա, արդյունքը լինում է պատերն անտեղի ճանկռոտելը, ինչ է թե՝ հաջողության պատուհանը քիչ է, հաջողության դուռ է պետք: Արդյունքում գալիս է մի պահ, որ, այդ անհիմն առավելապաշտությամբ պայմանավորված, հաջողության պատուհանն արդեն վերածվում է միակ փրկության հնարավորության: Սակայն հնարավոր է ստեղծվի մի իրավիճակ, որ քեզ պարզապես արդեն հնարավորություն չտան այդ պատուհանով փրկվել: Իսկ դուռն էլ չկա ու չկա… Ու դու ստիպված լինես դիմել ծանրագույն զոհաբերությունների, որպեսզի գոնե այդ պատուհանով ոչ թե հաջողության հետեւից գնաս, այլ պարզապես փրկվես:
Ասում են՝ երբ Աստված փակում է դուռը, նա բացում է պատուհանը: Դա հնարավորության պատուհանն է, եւ մեզնից է կախված, թե ի՞նչ նպատակի կծառայի այն՝ կդառնա հաջողությա՞ն պատուհան, կլինի փրկությա՞ն պատուհան, թե՞ կվերածվի Օվերտոնի պատուհանի: Ինչ վերաբերում է դռանը, ապա այն, իհարկե, պետք է փնտրել, միայն թե պետք չէ անտեսել պատուհանը…
Գագիկ ԿԱՐԱՊԵՏՅԱՆ
Հ. Գ. Ժամանակին մեր տներում միայն փայտե պատուհաններ էին՝ մե՛ր փայտից, էկոլոգիապես մաքուր: Հիմա գրեթե ամենուր մետաղապլաստե պատուհաններ են՝ ներկրովի, հիմնականում հարեւան, բայց ոչ բարեկամ երկրից, այսպես ասած՝ «եվրոպատուհաններ», որոնք ոչ մի կապ էլ չունեն Եվրոպայի հետ, որոնք միգուցե ավելի ջերմամեկուսիչ ու ձայնամեկուսիչ են, բայց առնվազն էկոլոգիայի առումով հաստատապես զիջում են ՄԵՐ փայտե պատուհաններին…
