Արմավիր-Վոլոգդա՝ համագործակցության կամուրջներ

«Հայաստանի Հանրապետություն» օրաթերթի հարցազրույցը ՌԴ Վոլոգդայի մարզի նահանգապետ Օլեգ Ալեքսանդրի Կուվշիննիկովի հետ

-Մեծարգո պարոն նահանգապետ, Ռուսաստանի Դաշնությունը կարեւորում է Հայաստանի Հանրապետության հետ բազմակողմ համագործակցության զարգացումը ինչպես համապետական, այնպես էլ տարածաշրջանների միջեւ կապերի ձեւավորման համատեքստում: Այդ առումով Ռուսաստանի ամենաակտիվ տարածաշրջաններից մեկը Վոլոգդայի մարզն է: Գիտենք, որ Հայաստանի Արմավիրի մարզի Ձեր գործընկերոջ հետ առեւտրատնտեսական պայմանագիր եք կնքել 2017 թ., 4 տարի ժամկետով: Նախատեսո՞ւմ եք, արդյոք, երկարաձգել այն:

-Անկասկած, Հայաստանի Հանրապետությունը Վոլոգդայի մարզի ռազմավարական գործընկերներից է: Այո, անվերապահորեն սատարում ենք մեր պետության մոտեցումը հայ-ռուսական հարաբերությունների բազմակողմանի զարգացման գործում եւ ակտիվորեն խթանում միջտարածաշրջանային հարաբերությունները, այդ թվում եւ Հայաստանի հետ: Անցած երկու տարվա ընթացքում, չնայած համավարակին, մեզ հաջողվել է Հայաստանի հետ, թեկուզեւ օնլայն ձեւաչափով, իրականացնել կարեւոր նախագծեր առեւտրատնտեսական եւ հումանիտար ոլորտներում, երիտասարդական քաղաքականության բնագավառում: Անցկացվել են աշխատանքային հանդիպումներ, բանակցություններ, ցուցադրություններ (ապրանքանիշերի ներկայացումներ): Հայաստանի ներկայացուցիչները մասնակցել են մեր մարզում անցկացված փառատոներին եւ մրցույթներին: Այո, կնքված պայմանագրի ժամկետը լրանում է 2022 թ.: Հանգամանքների բերումով դեռ չենք հանդիպել Արմավիրի նոր մարզպետ Էդվարդ Հովհաննիսյանի հետ: Սակայն լիահույս ենք, որ կշարունակենք կառուցողական երկխոսությունը տարածաշրջանի նոր ղեկավարության հետ եւ կերկարաձգենք համագործակցության ծրագիրը:

-Ըստ Ձեզ՝ որքանո՞վ իրականացվեց նախկինում կնքված առեւտրատնտեսական, գիտատեխնիկական եւ հումանիտար ոլորտներում համագործակցության համաձայնագիրը:

-Համաձայնագիրը կարգավորում էր Արմավիրի եւ Վոլոգդայի մարզերի միջեւ  համատեղ աշխատանքի հիմնական ուղղությունները՝ առեւտրատնտեսական, կրթության, երիտասարդական քաղաքականության, մշակույթի, զբոսաշրջության, ինչպես նաեւ ագրոարդյունաբերական ոլորտներում: Ընդ որում՝ համաձայնագիրը միջմարզայինից պլանաչափ տեղափոխվեց նաեւ միջպետական հարաբերությունների ոլորտ: Նշեմ մի քանի միջոցառումներ: 2020 թ. Հայաստանի ներկայացուցիչները օնլայն ձեւաչափով մասնակցեցին «Ավանդույթների ժառանգորդները» համառուսաստանյան մանկական փառատոնին եւ տեղ զբաղեցրեցին հաղթողների շարքում: Անցյալ տարի տեղական ինքնակառավարման մարմինների մակարդակով անցկացվել են մի շարք աշխատանքային հանդիպումներ, որտեղ քննարկվել են երիտասարդական քաղաքականության հեռանկարները: Այս աշխատանքներին ակտիվորեն ներգրավվել են մեր խոշոր քաղաքները՝ Վոլոգդան եւ Չերեպովեցը: Այս պահին կա հնարավորություն՝ գործընկերային հարաբերություններ հաստատելու Վոլոգդայի կրթության զարգացման ինստիտուտի եւ Հայաստանի ԿԳՄՍ կրթության զարգացման եւ նորարարությունների ազգային կենտրոնի միջեւ: Հույս ունենք մինչեւ տարեվերջ իրականացնել եւս մեկ հետաքրքիր ծրագիր՝ Ձմեռ պապի այցը Վելիկի Ուստյուգից Հայաստան: Ի դեպ, այս նախաձեռնությունն արժանացել է ՌԴ ԱԳ նախարար Սերգեյ Լավրովի հավանությանը:

-Ձեր, ինչպես նաեւ Վոլոգդայի մարզի այլ ղեկավարների գլխավորած պատվիրակությունները մի քանի անգամ այցելել են Հայաստան…

-Տնտեսական պատվիրակությունների փոխայցեր տեղի են ունեցել 2017-2018 թթ., ինչը հնարավորություն է տվել գտնել նոր գործընկերների: Դրա ապացույցն է հիշյալ տարիներին Վոլոգդայի մարզից Հայաստան արտահանման ծավալների մոտ 20 տոկոս աճը: Այսօր մենք «բիզնես այցելությունները» իրականացնում ենք օնլայն ձեւաչափով: Միշտ պատրաստ ենք համագործակցության եւ կոնկրետ առաջարկությունների դեպքում խնդրում ենք դիմել Վոլոգդայի արտահանման աջակցության կենտրոն:

-Ձեր հայրենի Չերեպովեցը պահպանում է սոցիալ-տնտեսական առաջանցիկ զարգացման տարածքի (ՍՏԱԶՏ) կարգավիճակը:

-Այո: ՍՏԱԶՏ ռեզիդենտները 10 տարով ազատվում են գույքահարկի ու հողի տուրքի եւ առաջին 5 տարվա կտրվածքով՝ եկամտահարկի վճարումներից: Ռեզիդենտներից «Վոլոգդայի կաթի գործարան» ընկերությունների խումբը ներդրումային ծրագրով պանիրների արտադրության եւ փաթեթավորման նոր գործարան է կառուցում: Չերեպովեցում ավարտվել է նոր ջերմոցային տնտեսության կառուցման առաջին փուլը: Բացի 8.2 հեկտար տարածքով ջերմոցներից, նախատեսված է նաեւ օժանդակ շինությունների, այդ թվում՝ ջերմաէլեկտրակայանների կառուցում: Ստեղծվել է 198 նոր աշխատատեղ: Ներդրումների ծավալը կազմել է ավելի քան 2.5 մլրդ ռուբլի:

-Ըստ ձեր մալո ծառայության տեղեկությունների՝ Վոլոգդայի եւ Արմավիրի մարզերի միջեւ ապրանքաշրջանառությունը 2017 թ. առաջին 9 ամսվա կտրվածքով կազմել է 3.4 միլիոն ԱՄՆ դոլարին համարժեք գումար:

-Դեպի Հայաստան արտահանման ծավալը, 2017 թվականից սկսած, աճ է արձանագրել: Բացառություն է 2019 թ., երբ անկումը 2018-ի համեմատ կազմեց 5.9 տոկոս: Հետագայում արձանագրվել է կայուն աճ: 2020-ին 1.74 տոկոս՝ 2019-ի համեմատությամբ: 2021-ին ունեցանք 4.7 տոկոս աճ: Այս պահին Վոլոգդայից Հայաստան է արտահանվում երեք խումբ ապրանքատեսակ. սեւ մետաղից արտադրատեսակներ՝ տարաներ, մետաղալարեր, որոնց արտահանման աճը կազմել է 116. 4 տոկոս, ալյուր եւ վաֆլիներ՝ 277.5 տոկոս աճով: Հատկապես ցանկանում եմ շեշտել շոկոլադը՝ 233.6 տոկոս աճով: Ի դեպ, հրուշակեղենի խոշոր արտադրողներից մեկը «ԱտԱգ» ընկերությունն է, որի հիմնադիրները ծագումով հայաստանցի Ատոմյան եղբայրներն են: Նրանք ոչ միայն հաջողակ գործարարներ են, այլեւ բարերարներ եւ սոցիալական պատասխանատվությամբ բիզնեսի ղեկավարներ: Նրանց ջանքերով Շեքսնա ավանում վերանորոգվել է տաճար, եւ ստեղծվել մանկական քաղաք՝ «Վոլոգդայի Դիսնեյլենդը»:

-Մեծարգո Օլեգ Ալեքսանդրի, մեկ անգամ եւս շնորհակալություն այս զրույցի համար:

-Ուրախ եմ, որ պատրաստակամ եք մեր մարզը ներկայացնելու Հայաստանի բնակիչներին: Համոզված եմ, որ նման հրապարակումներից հետո շատերը կցանկանան այցելել Վոլոգդայի մարզ, անձամբ ծանոթանալ մեր գեղեցիկ եւ հյուրընկալ երկրամասին, իսկ Վոլոգդայի եւ հայաստանցի գործարարները կգտնեն համագործակցության նոր ուղիներ՝ նպաստելով մեր երկրների բարեկամական եւ տնտեսական կապերի ընդլայնմանը:

Սարգիս ՍԱՐԳՍՅԱՆ

Մոսկվա, հատուկ «ՀՀ»-ի համար