ԵԱՀԿ Մինսկի խմբի համանախագահ երկրների՝ ԱՄՆ-ի, Ֆրանսիայի եւ Ռուսաստանի դեսպանները հրաժարվել են հուլիսի 10-ին մեկնել Ադրբեջանի օկուպացիայի տակ գտնվող՝ Արցախի մշակութային մայրաքաղաք Շուշի. դիվանագիտական կորպուսի ղեկավարների այցն կազմակերպվել է այդ ավտորիտար երկրի նախագահ Իլհամ Ալիեւի անձնական հանձնարարությամբ։
Ադրբեջանի որոշ ԶԼՄ-ներ ԱՄՆ-ի, Ֆրանսիայի եւ Ռուսաստանի դեսպանների այդ քայլը համարել են դեմարշ։ Ընդ որում, ուղեւորությանը մասնակցել են 46 պետությունների դեսպաններ, ինչպես նաեւ Առողջապահության համաշխարհային կազմակերպության եւ ՄԱԿ-ի Փախստականների հարցերով գերագույն հանձնակատարի ներկայացուցիչները:
ԵԱՀԿ Մինսկի խմբի համանախագահները կողմ են Հայաստանի եւ Ադրբեջանի միջեւ բանակցությունների շարունակմանը, մասնավորապես, Լեռնային Ղարաբաղի կարգավիճակի վերաբերյալ, սակայն Ալիեւն այն կարծիքին է, որ հարցը լուծված է 44-օրյա պատերազմի արդյունքում:
