Հայաստանի եւ Ադրբեջանի միջեւ սահմանագծման, սահմանազատման գործընթացի մեկնարկի համար տարբեր ուղղություններով ու միջոցներով ճնշումներ են գործադրվում հայկական կողմի վրա: Ադրբեջանաթուրքական զույգն իրեն հայտնի մեթոդներով կրկին խոսում է ոչ քաղաքակիրթ՝ սադրանքների եւ ապակայունացման սպառնալիքի լեզվով՝ փորձելով լարվածություն ստեղծել հայ-ադրբեջանական սահմանի այն հատվածներում, որտեղ ադրբեջանական զինուժն ապօրինի ներխուժել է ՀՀ տարածքներ: Սադրանքներ են կազմակերպվում նաեւ Հայաստանի արեւելյան հատվածի առավել զգայուն կետերում: Վերջին երկու շաբաթվա ընթացքում արձանագրվեց Ադրբեջանի զինված ուժերի կողմից հրադադարի խախտման մեկ դեպք Սոթքի ոսկու հանքավայրում, ինչի հետեւանքով վիրավորվեց հանքի հայազգի աշխատակիցը:
Այս ընթացքում Ադրբեջանի պաշտպանության նախարարությունը երկու անգամ ապատեղեկատվություն տարածեց, թե, իբր, ՀՀ զինված ուժերը կրակ են բացել արեւելյան սահմանին: Բաքվի տարածած նման մերկապարանոց ստերը չեն դիմանում այն պարզ փաստարկին, որ սահմանային լարվածությունն ամենեւին ձեռնտու չէ Հայաստանին, այն Ադրբեջանի օգտին է: Նման քայլերով պաշտոնական Բաքուն փորձում է ճնշում գործադրել սահմանազատման եւ սահմանագծման գործընթացն արագացնելու համար: Սակայն այստեղ էլ ադրբեջանական ռազմաքաղաքական ղեկավարության գործողությունների տրամաբանությունն անհասկանալի է, քանի որ ՀՀ իշխանությունները բազմիցս հայտարարել են, որ շահագրգռված են սահմանազատման գործընթացների մեկնարկի եւ տարածաշրջանային հաղորդակցության ուղիների վերաբացման մեջ: Թերեւս, Ադրբեջանը նման գործողություններով փորձում է սահմանազատման իր պայմանները պարտադրել, բայց առնվազն մանկամտություն է կարծելը, թե բանակցային սեղանին որոշիչը լինելու են սահմանային սադրանքները՝ պատմական-իրավական փաստարկների, քարտեզների եւ հիմքերի փոխարեն:
Ակտիվացող գործընթացների համատեքստում է Հայաստան ժամանել Ռուսաստանի Դաշնության փոխվարչապետ Ալեքսեյ Օվերչուկի գլխավորած պատվիրակությունը: Այս ուղղությամբ աշխատանքային խմբի գործողությունների ակտիվացման փաստին Դուշանբեում անդրադարձել է նաեւ ՀՀ ԱԳ նախարար Արարատ Միրզոյանը. «Ուզում եմ ձեզ տեղեկացնել, որ մեր ադրբեջանցի գործընկերների հետ զրուցել ենք սահմանազատման եւ սահմանների անվտանգության հանձնաժողովների ստեղծման հարցի շուրջ։ Եվ կարծես թե պայմանավորվածություն կա ՌԴ փոխվարչապետ Ալեքսեյ Օվերչուկի հետ, որ մայիսի 16-17-ը պատրաստվում են հանդիպել Մոսկվայում հաղորդակցությունների մասով, եւ կա նաեւ պայմանավորվածություն, որ նույն օրերին Մոսկվայում երկկողմ հանդիպում կկազմակերպվի»:
ՌԴ-ի եւ Ադրբեջանի ԱԳ նախարարների հետ հանդիպումից հետո Հայաստանի դիվանագիտական կառույցը հայտնեց, որ հանդիպմանը մտքեր են փոխանակվել տարածաշրջանային հաղորդակցության ուղիների եւ տնտեսական կապերի ապաշրջափակման, սահմանազատման, սահմանային անվտանգության հարցերով հանձնաժողովի ստեղծման, Հայաստանի ու Ադրբեջանի միջեւ հարաբերությունների կարգավորման պայմանագրի վերաբերյալ։ Ըստ հաղորդագրության՝ Արարատ Միրզոյանը վերահաստատել է հայկական կողմի դիրքորոշումը Լեռնային Ղարաբաղի հակամարտության համապարփակ կարգավորման շրջանակներում արցախահայության անվտանգության, իրավունքների եւ ազատությունների երաշխավորման, ինչպես նաեւ Արցախի Հանրապետության կարգավիճակի վերաբերյալ։
Վերջինս չպետք է կապել սահմանազատման եւ սահմանագծման գործընթացի հետ, որը հատկապես կարեւոր է Հայաստանի համար՝ Ադրբեջանի զինուժը ՀՀ տարածքից դուրս հանելու նպատակով: Այսպես կոչված անկլավների մասին պաշտոնական Բաքվից հնչող քարոզչական հայտարարություններն իրենց հիմքում առարկայական ոչինչ չունեն: Մի բան միանշանակ է, որ եթե այդ հարցը քննարկվի, ապա օրինաչափորեն դիտարկվելու է Արծվաշենի խնդիրը: Անկախ ամեն ինչից, ՀՀ տարածքից ադրբեջանական զինված ուժերի դուրս բերման միակ խաղաղ ուղին սահմանագծումն ու սահմանազատումն է:
