«Սեպտեմբերի 10-ի լույս 11-ի գիշերը ՀՀ ԶՈՒ ստորաբաժանումները հայ-ադրբեջանական սահմանագոտու արեւելյան հատվածում տեղակայված ադրբեջանական դիրքերի ուղղությամբ կրակ չեն բացել։ Իրադրությունը հայ-ադրբեջանական սահմանին հարաբերականորեն կայուն է եւ գտնվում է ՀՀ ԶՈՒ ստորաբաժանումների լիարժեք վերահսկողության տակ»,- այս մասին հայտնել են ՀՀ պաշտպանության նախարարությունից՝ հերթական անգամ հերքելով ադրբեջանական կողմից տարածվող ապատեղեկատվությունը: Փոխարենը երեկ առավոտյան Արցախի Մարտունու շրջանի Կարմիր շուկա եւ Թաղավարդ համայնքների դիմաց տեղակայված դիրքերից ադրբեջանական կողմը կրակահերթեր է բացել տարբեր տեսակի եւ տրամաչափի հրաձգային զենքերի կիրառմամբ։ Արցախի մարդու իրավունքների պաշտպան Գեղամ Ստեփանյանի տեղեկացմամբ՝ կրակահերթերը տեւել են շուրջ 30 րոպե։ «Քաղաքացիական բնակչության շրջանում վնասների վերաբերյալ փաստերի հավաքագրման աշխատանքները շարունակվում են»,- ֆեյսբուքյան իր էջում գրել է Ստեփանյանը՝ Ադրբեջանի գործողությունները համարելով Արցախի ժողովրդի նկատմամբ իրականացվող էթնիկ զտման քաղաքականության հերթական ապացույց։
Ադրբեջանի պաշտպանության նախարարությունը սեպտեմբերի 2-ից սկսած գրեթե ամենօրյա ռեժիմով ապատեղեկատվություն է տարածում, թե իբր հայ-ադրբեջանական «սահմանին Հայաստանի զինված ուժերը կրակ են բացել իր դիրքերի ուղղությամբ»: Հայկական կողմը սակայն հայտնել էր, որ նույն օրը Ադրբեջանի ԶՈՒ ստորաբաժանումները հայ-ադրբեջանական սահմանագոտու արեւելյան ուղղությամբ կրակ են բացել ՀՀ ՊՆ տրանսպորտային միջոցի ուղղությամբ:
Նմանատիպ ստահոդ հաղորդագրություններ են տարածվել նաեւ սեպտեմբերի 3-ին, 4-ին, 5-ին (երկու անգամ), 6-ին, 7-ին, 9-ին, 10-ին եւ 11-ին։ «Այս գործելաոճը, որի հիմքում հայկական կողմի՝ ագրեսիվ գործողություններ իրականացնելու եւ հայ-ադրբեջանական սահմանին իրադրությունն արհեստականորեն սրելու փորձերի վերաբերյալ բացարձակ կեղծ տեղեկությունների տարածումն է, ոչ մի կերպ չի կարող նպաստել սահմանային իրավիճակի իրական կայունացմանը։ ՀՀ ԶՈՒ ստորաբաժանումները կրակ չեն բացել ադրբեջանական դիրքերի ուղղությամբ: Ավելին` ինչպես արդեն տեղեկացրել ենք, ադրբեջանական կողմից արձակված կրակոցից նախօրեին (սեպտեմբերի 5-ին.- խմբ.) մահացու հրազենային վիրավորում է ստացել պարտադիր ժամկետային զինծառայող, կրտսեր սերժանտ Արման Գագիկի Սարգսյանը»,- ասված է ՀՀ ՊՆ հաղորդագրության մեջ:
Հիմնականում նշվում է, թե կրակոցներն արձակվում են «արեւելյան սահմանից»՝ Քարվաճառի եւ «Լաչինի ուղղությամբ»: Վերոհիշյալ հանգամանքը հուշում է, որ ադրբեջանական կողմը որպես էսկալացիայի ուղղություն ընտրել է Վարդենիսի եւ Արցախը Հայաստանին կապող «կյանքի միջանցքը»։ Դրանով Ադրբեջանը հիմքեր է նախապատրաստում կամ ուժի, կամ ուժի սպառնալիքի կիրառմամբ հայկական կողմից զիջումներ կորզելու համար։
Ադրբեջանի կողմից նախապատրաստվող սադրանքների դիմելու մասին է հուշում այն, որ սեպտեմբերի 10-ին Ադրբեջանի պաշտպանության նախարար Զաքիր Հասանովի գլխավորությամբ անցկացվել է ծառայողական խորհրդակցություն։ Հանդիպմանը մասնակցել են փոխնախարարներ, ռազմական ճյուղերի հրամանատարներ, գերատեսչությունների գլխավոր վարչությունների, գերատեսչությունների եւ ծառայությունների ղեկավարներ։ Արցախի բռնազավթված տարածքներում տեղակայված զորամասերի եւ կազմավորումների հրամանատարները հանդիպմանը միացել են օնլայն։ Ադրբեջանի ՊՆ տարածած հաղորդագրության համաձայն՝ խորհրդակցության ընթացքում մանրամասնորեն վերլուծել են «հայ-ադրբեջանական պետական սահմանին եւ Ղարաբաղում տիրող օպերատիվ իրավիճակն ու տիրող կացությունը։ Լայնորեն վերլուծվել են օպերատիվ պայմանները եւ ներկա իրավիճակը Ադրբեջան-Հայաստան պետական սահմանին ու այն տարածքում, որտեղ ժամանակավորապես տեղակայված է ռուսական խաղաղապահ զորախումբը»։ Ուշագրավն այն է, որ ադրբեջանական կողմն Արցախի մասին հիշատակումներում հաճախ շեշտում է ռուսական խաղաղապահ ուժերի տեղակայման ժամանակավոր բնույթը։
Հասանովը խոսել է «Ադրբեջանի նախագահ Իլհամ Ալիեւի կողմից ադրբեջանական բանակի առջեւ դրված խնդիրների մասին»։ Որպես հիմք ձեւակերպելով իրենց իսկ կողմից տարածվող ապատեղեկատվությունը սահմանային իրավիճակի սրման վերաբերյալ, այդ երկրի ՊՆ ղեկավարը կարգադրել է պատրաստ լինել «անհապաղ եւ վճռական կանխելու ադրբեջանական ստորաբաժանումների դեմ ցանկացած սադրանք»։ Հիշեցնենք, որ Հայաստանի դեմ բացահայտ սպառնալիքի լեզվով Ադրբեջանի պաշտպանության նախարարը խոսել էր նաեւ այս տարվա հունիսի 25-ին՝ նշելով, որ Ադրբեջանը կարող է ոչնչացնել ցանկացած ռազմական օբյեկտ եւ բնակավայր Հայաստանի տարածքում։ Այդ մասին նա հայտարարել էր «ԱզերԹաջ» պետական գործակալության հետ հարցազրույցում՝ հավելելով, թե իբր «Հայաստանը, խախտելով միջազգային օրենքները, շարունակում է ադրբեջանական տարածքների օկուպացումը, պարբերաբար խախտում է հրադադարի ռեժիմը, հետախուզական-դիվերսիոն հարձակումների փորձեր է կատարում պաշտպանության առաջնագծում տեղակայված դիրքերի վրա, հակառակորդի դիպուկահարները կրակոցներ են արձակում զինվորականների, ինչպես նաեւ խաղաղ բնակիչների ուղղությամբ, վնաս են հասցնում քաղաքացիական օբյեկտներին եւ գյուղատնտեսական հողատարածքներին»: Վերոնշյալ կետերը լիովին համապատասխանում են Ադրբեջանի իրականացրած քայլերին, որոնք անպատժելիությունից ոգեւորված երկրի իշխանությունները վերագրում են հայկական կողմին։
