Վերջին տարիներին աշխարհաքաղաքական գործընթացներում երեւույթներ են նկատվում, որոնք ոչ միայն չեն տեղավորվում տրամաբանության դասական կանոնների մեջ, այլեւ պատմական փաստերը «բռնաբարելու» գործընթաց են հիշեցնում: Պատմական իրողությունները նենգափոխելու նման երեւույթները լուրջ վտանգ են ներկայացնում գործող աշխարհակարգի հիմք միջազգային իրավանորմատիվային հիմքերի եւ վերջին հաշվով՝ նաեւ Երկիր մոլորակի ժողովուրդների համար:
Օրերս պատմական գործընթացները եւ այսօրվա իրականությունը տրամաբանության ռելսերից հանելու եւ փաստերն աղճատելու «մաստեր կլաս» ցույց տվեց Թուրքիայի նախագահ էրդողանը: Արցախի օկուպացված տարածքներից մեկում՝ Ջրականում հերթական ռազմական օդանավակայանը բացելու արարողության ժամանակ վերջինս հայտարարեց, թե Բաքուն պետք է Ջրականի եւ հարակից տարածքների բնակավայրերի շինությունները քանդելու համար փոխհատուցում պահանջի Երեւանից։
«Այս հարցը պետք է բարձրացնել Հաագայի դատարանում եւ փոխհատուցում պահանջել։ Պետք է նրանց պատին դեմ տալ այս հարցում: Համաշխարհային հանրությունը պետք է տեսնի նրանց դեմքը։ Մենք պետք է աշխարհին ցույց տանք նրանց իրական դեմքը»,- հայտարարել է Թուրքիայի առաջնորդը: Այս խոսքերն արտաբերում է այն երկրի ղեկավարը, որը Հայոց ցեղասպանության եւ հայ ժողովրդի զգալի հատվածին նպատակային ունեզրկման հանցավոր գործողությունների հեղինակի իրավահաջորդն է: Պատմական ողբերգությունից 100 տարի անց էլ Թուրքիայում դեռ վաճառում եւ յուրացնում են հայ ժողովրդի հոգեւոր, մշակութային եւ նյութական արժեքները: Հայ ժողովրդի հանդեպ ահռելի բարոյական եւ նյութական փոխհատուցման բեռի տակ ճկռած պետության ղեկավարն այսօր խոսում է հայ ժողովրդից փոխհատուցում պահանջելու մասին:
Մարդկության դեմ կատարված մեծագույն հանցագործություններից մեկի հեղինակի իրավահաջորդ պետության առաջնորդը պատմական իրողության ճանաչման ու համապատասխան փոխհատուցման մասին մոռանալով՝ այսօր խոսում է Արցախի 200 հազարանոց հայ բնակչությունից փոխհատուցում պահանջելու մասին:
Էրդողանի մատուցած այս կեղծ թեզը մի քանի շերտ ունի: Առաջին՝ նախկին ԼՂՀ-ի հարակից տարածքները հայկական ուժերի կողմից ազատագրվել են ի պատասխան Ադրբեջանի հերթական ցեղասպան գործողությունների, երբ Արցախի ժողովրդի օրինական եւ ժողովրդավարական սկզբունքներով անցկացված անկախության հանրաքվեին հետեւեց վերջինիս ներխուժումը, Արցախի անպաշտպան տարածքների 30 տոկոսի հայաթափումը՝ անզեն տղամարդկանց, կանանց ու երեխաներին գնդակահարելով: Մյուս կողմից, ըստ Էրդողանի, 30 տարի ազատագրված տարածքների չբնակեցվող տներն ու շինությունները պետք է կանգուն մնային: Թուրքիայի ղեկավարը դրա անհնարինության մեջ կարող է համոզվել՝ այցելելով 1974-ից Կիպրոսի օկուպացված հյուսիսային հատվածի հունական բնակավայրեր, որտեղ արդեն 50 տարի չեն ապրում օրինական տերերը:
44-օրյա պատերազմում բազմաթիվ պատերազմական հանցագործությունների հեղինակ ու համահեղինակ երկիրն այսօր խոսում է ագրեսիայի ենթարկված ժողովրդին Հաագայի դատարան հանձնելու մասին, երբ այդ համաշխարհային դատական կառույցը պարբերաբար վճիռներ է կայացնում Բաքվի դեմ՝ Անկարայի աջակցությամբ մարդկության դեմ կատարած հանցագործությունների համար: Ավելորդ չէ արձանագրելը, որ թյուրքական պետությունները շարունակում են նման հանցավոր գործողությունները նաեւ այսօր եւ անպատիժ մնալու դեպքում դրանից չեն հրաժարվի նաեւ ապագայում: Այսօր Էրդողանը փոխհատուցումից է խոսում, քանի որ քաղաքակիրթ աշխարհը չստիպեց Թուրքիային ճանաչել մարդկության դեմ կատարված ոճրագործությունը՝ Հայոց ցեղասպանությունը, եւ փոխհատուցել հետեւանքները: Աշխարհի լռության հետեւանքն այն է, որ այսօր Թուրքիայի նախագահը գլխիվայր շուռ է տալիս մերօրյա ու պատմական իրողությունները, եւ պատմությունը նենգափոխելու այս արատավոր պրակտիկան կայծակնային արագությամբ կտարածվի ողջ աշխարհով, քանի որ դրա համար ներկայում կան բարենպաստ պայմաններ, անթիվ հակաքաղաքակրթական պատճառներ:
