Շուրջ մեկ ամիս առաջ եգիպտական Շարմ էլ Շեյխում կայացած ՄԱԿ-ի Կլիմայի փոփոխության մասին շրջանակային կոնվենցիայի կողմերի 27-րդ համաժողովում տարբեր պետությունների ղեկավարներ, կլիմայի փոփոխության փորձագետներ, երիտասարդներ, քաղաքացիական հասարակության ներկայացուցիչներ, անկախ Շարմ էլ Շեյխի կլիմայի ջերմությունից, տաք-տաք խոսում էին բնությունից ու բնապահպանությունից, մարդու եւ բնության ներդաշնակությունից ու հարակից այլ թեմաներից:
Արդեն քանի օր է՝ Ադրբեջանը բնապահպանական կեղծ պատրվակով շրջափակել է Արցախը՝ ժողովրդին կանգնեցնելով ակնհայտ սպառնալիքների առաջ: Եվ ո՞ւր են հիմա բնապահպանության մասին մտածող այդ բոլորը՝ պետություններ, ղեկավարներ, այլք, որտե՞ղ են անհետացել նրանց ձայները, ովքեր դեռ մեկ ամիս առաջ թունդ բնապահպան էին: Եթե ընդունում են, որ ադրբեջանցիները կեղծ բնապահպաններ են ու իրականում այլ նպատակներ ունեն, ինչո՞ւ չեն խոսում այդ մասին: Եթե համարում են, թե նրանք, իրոք, բնապահպան են, կրկին անհասկանալի է նրանց լռությունը: Չէ՞ որ բնապահպանությունը հումանիստական նպատակներ ունի, այլ ոչ թե ահաբեկչական, ինչպիսին Ադրբեջանի իբր թե «բնապահպանությունն է»: Չէ՞ որ բնապահպանության նպատակը մարդկության աճին ու առողջ ապրելուն նպաստելն է, այլ ոչ թե ցեղասպանելը, ինչպիսին Ադրբեջանի իբր թե «բնապահպանությունն է»…
ՄԱԿ-ի Կլիմայի փոփոխության մասին շրջանակային կոնվենցիայի կողմերի համաժողովի մասնակիցները, թերեւս, միայնակ չեն լռության հարցում, որովհետեւ…
Որտե՞ղ են Միավորված ազգերի միջազգային մանկական ճգնաժամային հիմնադրամի (ՅՈՒՆԻՍԵՖ) եւ նրա անդամների ձայները, կազմակերպություն, որի համար առաջնայինը կարիքավոր յուրաքանչյուր երեխայի ձեռք մեկնելն է: Ինչո՞ւ այս պահին նրա ձեռքը չի հասնում արցախցի երեխաներին, որոնք ձմռան սառնամանիքին զրկված են ջերմությունից (Ադրբեջանը դադարեցրել է Արցախի գազամատակարարումը), որոնք վաղը կարող են արդեն այլ սպառնալիքների առաջ կանգնել՝ սննդի, դեղորայքի եւ մնացած պարագաների պակաս, որոնք ձմռան ցրտին մնացել են Հայաստանից Արցախ վերադառնալու ճանապարհին, որոնք զրկված են կրթություն ստանալու հնարավորությունից (գազամատակարարման անջատման պատճառով դպրոցները ջեռուցելու հնարավորություն չկա)…
Որտե՞ղ են ՄԱԿ-ի Պարենի համաշխարհային ծրագրի եւ նրա մասնակիցների ձայները, կազմակերպություն, որի նպատակներից մեկն արտակարգ իրավիճակներում բնակչությանն աջակցելն է: Թե՞ անպայման պետք է Արցախի ժողովուրդը հայտնվի սովահարության անմիջապես շեմին, որից հետո միայն միգուցե այդ ձայները որեւէ կերպ հնչեն…
Որտե՞ղ են Առողջապահության համաշխարհային կազմակերպության եւ նրան անդամակցողների ձայները, կազմակերպություն, որի նպատակները կրկին մարդասիրական են: Արցախցի ծանր եւ ծայրահեղ ծանր վիճակում գտնվող հիվանդները, որոնց հնարավոր չէ օգնություն ցույց տալ տեղի բուժհաստատություններում, զրկված են Հայաստան տեղափոխվելու հնարավորությունից, որովհետեւ Ադրբեջանը շրջափակել է Արցախ-Հայաստան միակ ճանապարհը: Արցախի հիվանդանոցները կանգնում են դեղորայքային եւ բուժսարքավորումների ու բժշկական պարագաների դեֆիցիտի առաջ: Արդյոք ԱՀԿ-ն իրեն դույզն-ինչ պատասխանատու չի համարո՞ւմ այդ մարդկանց կյանքի ու ճակատագրի համար, որոնց մեջ կան նաեւ տարեցներ, կանայք ու երեխաներ:
Որտե՞ղ են…
Գագիկ ԿԱՐԱՊԵՏՅԱՆ
Հ. Գ. Ադրբեջանի «վարձակալած» (ինքն իրենից) «բնապահպաններն» իրականացնում են բացահայտ բնապահպանական ահաբեկչություն Արցախի ժողովրդի հանդեպ: Միեւնույն ժամանակ Ադրբեջանը ոչ միայն բնապահպանական ահաբեկչության, այլեւ բնապահպանական ֆաշիզմի ժամանակակից եւ ամենաակնհայտ կրողն ու գործադրողն է:
