Խաչատուր Աբովյանի անվան մանկավարժական համալսարանի 100-ամյակին ընդառաջ՝ Հովհաննես Թումանյանի թանգարանում բացվեց ՄԱԿ-ի հայաստանյան գրասենյակի աջակցությամբ կազմակերպված ցուցահանդես, որտեղ ներկայացված են բուհի պրոֆեսորադասախոսական կազմի, մասնավորապես՝ Սամվել Սեւադայի, ինչպես նաեւ նախորդ եւ ներկա կուրսերի ուսանողների լուսանկարներ: Ներկայացված է 37 մասնակցի 140 աշխատանք: Լուսանկարչական ցուցահանդեսը կրում է «Իմ աշխարհը այսօր եւ վաղը» խորագիրը:
Գեղանկարիչ Սամվել Սեւադայի խոսքով՝ լուսանկարների թեմատիկան ընտրվել է ՄԱԿ-ի գրասենյակի կողմից մշտապես առաջ քաշվող մարդասիրական թեմաների (մարդկային հարաբերությունների պահպանման, խաղաղության, երեխաների պաշտպանության եւ այլն) շրջանակներում: Հայաստանում ՄԱԿ-ի մշտական համակարգողի պաշտոնակատար Լիլա Փիթրս Յահիան շնորհակալություն հայտնեց իր հոգուն դրական գույներ փոխանցող լուսանկարների ցուցադրության համար, որոնք այսօր ավելի քան կարեւոր են: Համալսարանի ռեկտոր Սրբուհի Սարգսյանն իր ելույթում նշեց՝ իզուր չէ, որ ցուցահանդեսը կրում է նման խորագիր, քանզի համալսարանը չէր կարող չանդրադառնալ այնպիսի մարդասիրական թեմաների, որոնք մեծ տարածում ունեն ամբողջ աշխարհում: Աբովյանականների հենքը մշտապես ընկած է եղել մշակույթի տարբեր ոլորտների վրա, եւ սա եւս բացառություն չէր:
Հավելենք, որ միջոցառման վերջում Սամվել Սեւադան իր աշխատանքներից նվիրեց նրանց, ովքեր իրենց մի փոքր ներդրումն են ունեցել այդ ամենի կազմակերպման մեջ:
Սյուզի ԴԱՎԹՅԱՆ
Խ. Աբովյանի անվան հայկական պետական մանկավարժական համալսարան, լրագրության բաժին, 2-րդ կուրս
