Ուլմի տաճար՝ լյութերական եկեղեցի Գերմանիայի Ուլմ քաղաքում (Բադեն-Վյուրթեմբերգ երկրամաս)։
Տաճարը հիմնադրվել է 1377 թ., իսկ 1392-ին սկսվել է նրա շինարարությունը Ուլրիխ ֆոն Էնսինգենի ղեկավարությամբ։ 1405 թ. տաճարի հիմնական մասը ավարտին է հասցվել, եւ այն օծվել է, սակայն հետագայում շինարարությունը դադարեցվել է, քանի որ կողային նավերը չէին դիմանում հենասյուների ծանրությանը։ 1530-1543 թթ., երբ տաճարն անցնում է լյութերականներին, շինարարությունը վերսկսվում է։ Աշտարակի սրաձողը հասնում է 100 մ-ի, սակայն հետագայում ֆինանսական խնդիրների պատճառով շինարարությունն ընդհատվում է։ 1817-1890 թթ. տաճարի կառուցումն ամբողջությամբ ավարտին է հասցվում։ 1944 թ. դեկտեմբերի 17-ին տաճարը գրեթե չի տուժել ռմբակոծությունից, որն ավերել էր քաղաքի պատմական կենտրոնի մեծ մասը։
Ուլմի տաճարը աշխարհի ամենաբարձր տաճարն է։ Զանգակատան բարձրությունը հասնում է 161.53-161.70 մ-ի։ Այս ցուցանիշով նրան հաջորդում է Քյոլնի տաճարը, որի բարձրությունը 157 մ է հիմքից։ Այցելուներին տաճարի ամենավերեւի մասը բարձրանալու եւ քաղաքի տեսարանով հիանալու հնարավորություն է ընձեռված։ Այն իրականացվում է պարույրաձեւ 768 աստիճաններով։ Պարզկա օրերին կարելի է տեսնել Ալպերը։
