Կան անհատներ, որոնք իրենց ապրած կյանքով եւ կատարած գործով լույս ու ուրախություն են սփռում ուրիշների կյանքի վրա։ Իրենց բարձր գիտակցության եւ անձնվեր աշխատանքի շնորհիվ նույնիսկ հետմահու մնում են անջնջելի։
Խոսքս մի մարդու մասին է, ով դարձել է բարեգործության խորհրդանիշ ինչպես հայ ազգի, այնպես էլ օտարների համար։ Հովարդ Կարագյոզյան՝ բոլորին հայտնի մի անուն։ Տարիների պատմություն ունեցող բարեգործական հաստատությունը մշտապես մնացել է հավատարիմ իր ուխտին։ Ինչպես Հայաստանում, այնպես էլ սփյուռքի գաղթօջախներում գործող այս հաստատությունը անշահախնդիր օգնում է բոլորին։ Այստեղ դիմում են առանց աղգային ու կրոնական խտրականության։ Բարձրակարգ մասնագետների օգնությամբ կատարվում են ամենատարբեր բժշկական զննություններ եւ դարմանումներ։ Գործում են նաեւ դեղատներ, որտեղ բավականին զեղչ գներով է բաց թողնվում ամենատարբեր հիվանդությունների համար նախատեսված դեղորայքը։
Բարեգործական այս հաստատությունում գործում են նաեւ ընկերային ծառայությունների բաժիններ, որոնք մատուցում են հոգեբանական եւ ընկերային օգնություններ՝ միաժամանակ աշխատանքով ապահովելով շատ մասնագետների։
Հովարդ Կարագյոզյան. մենք այսօր հպարտանում ենք այն փաստով, որ ունեցել ենք եւ ունենք հենց այսպիսի հայորդիներ։ Նրանց անունը միշտ կմնա վառ փարոս եւ օրինակ սերունդների համար։
Արաքսի ՂԱԶԱՆՉՅԱՆ
Բեյրութ, հատուկ «ՀՀ»-ի համար
