Պատմության հետագծով

-1874 թ. սեպտեմբերի 28-ին Վաղարշապատում բացվեց Գեւորգյան հոգեւոր ճեմարանը՝ Հայաստանում հիմնված եւ մինչ օրս գործող ամենահին բարձրագույն ուսումնական հաստատությունը։ Հիմնադրվել է Ն.Ս.Օ.Տ.Տ. Գեւորգ Դ Կոստանդնուպոլսեցի Վեհափառ կաթողիկոսի կողմից։ 19-րդ դարի վերջից սկսյալ արեւելահայ կրթական մշակույթը, մանկավարժությունն ու դպրոցը, գիտությունն ու հասարակական-քաղաքական կյանքը, ազատագրական պայքարը, եկեղեցին ու հոգեւոր կյանքը մեծապես պայմանավորված են հայ դպրոցի եւ մշակույթի պատմության մեջ առանձնահատուկ տեղ գրաված Սուրբ Էջմիածնի Գեւորգյան ճեմարանի գործունեությամբ։ Գեւորգյան հոգեւոր ճեմարանը թողել է իր գործունեության հետքերը գրեթե բոլոր բնագավառներում՝ բարձրացնելով հայ ժողովրդի մտավոր մակարդակը բարձրագույն եվրոպական չափանիշների։ Մինչեւ ճեմարանի շրջանավարտները կհիմնադրեին Երեւանի պետական համալսարանը, Գեւորգյան ճեմարանը միակ բարձրագույն ուսումնական հաստատությունն էր հայ կյանքի բոլոր հանգուցակետերում՝ հեռավոր Հնդկաստանից մինչեւ եվրոպական ոստանները, Ռուսաստանից մինչեւ սիրիական անապատները։

-1928 թ. սեպտեմբերի 28-ին ծնվել է Նիկոլայ Ռիժկովը՝ ռուս պետական եւ կուսակցական գործիչ։ Ավարտել է Ուրալի ճարտարագիտական ինստիտուտը։ 1971-1985 թթ. վարել է պետական եւ կուսակցական բարձր պաշտոններ. 1985-1991 թթ.՝ ԽՍՀՄ Մինիստրների խորհրդի նախագահ։ 1988 թ. դեկտեմբերի 7-ին նշանակվել է Սպիտակի երկրաշարժի հետեւանքների վերացման աշխատանքները ԽՍՀՄ մասշտաբով համադրելու եւ տուժածներին օգնություն ցույց տալու համար ստեղծված ԽՄԿԿ ԿԿ քաղբյուրոյի հանձնաժողովի նախագահ։ Եղել է աղետից տուժած վայրերում, հսկայական կազմակերպչական աշխատանք կատարել բնակչությանն անհետաձգելի օգնություն ցույց տալու, ավերված քաղաքներն ու գյուղերը վերականգնելու ուղղությամբ։ Ռիժկովը միջազգային ասպարեզում հանդես է գալիս հայանպաստ ելույթներով, կարեւորում Հայաստան-Ռուսաստան ռազմավարության անհրաժեշտությունը։ Գյումրիում տեղադրված է Ռիժկովի հուշատախտակը՝ դիմաքանդակով, Սպիտակում՝ կիսանդրին։ 2008 թ. դեկտեմբերի 5-ին արժանացել է «Հայաստանի ազգային հերոս» Հայաստանի բարձրագույն կոչման:

-1939 թ. սեպտեմբերի 28-ին ԽՍՀՄ-ի եւ Գերմանիայի միջեւ խաղաղության եւ սահմանների մասին պայմանագիր կնքվեց։

-1994 թ. սեպտեմբերի 28-ին Բալթիկ ծովում խորտակվեց էստոնական «Էստոնիա» նավը, ինչի հետեւանքով մահացավ 852 մարդ։

-2003 թ. սեպտեմբերի 28-ին Իտալիայում տեղի ունեցավ խոշոր էներգովթար, ինչի պատճառով հոսանքազրկվեց մոտ 57 միլիոն մարդ։