-1809 թ. հոկտեմբերի 15-ին ծնվել է Խաչատուր Աբովյանը՝ հայ ականավոր գրող, մանկավարժ, լուսավորական, արեւելահայ աշխարհաբար գրականության հիմնադիրը։ Նրա ստեղծագործությամբ սկիզբ է առնում հայ գրականության զարգացման նոր փուլ, որ նախորդից տարբերվում էր թեմատիկայով, լեզվով, հերոսի ընտրությամբ եւ այլն: Աբովյանի ապրած դարաշրջանը հատկանշվում է պարսկական եւ թուրքական բռնապետական լծի դեմ հայ ժողովրդի մղած ազատագրական պայքարով, Ռուսաստանի հովանավորության տակ անցնելու հույսերի իրականացմամբ եւ լուսավորական շարժմամբ, որի նպատակն էր փրկել հայրենիքը հոգեւոր ստրկությունից եւ մտավոր խավարից։ Նա դարձել է այդ շարժման գաղափարական առաջնորդ։ Հայ եւ ռուս ժողովուրդների եղբայրական բարեկամության, հայերի ռուսական կողմնորոշման ջատագովն էր:
-1920 թ. հոկտեմբերի 15-ին ծնվել է Անրի Վերնոյը՝ ֆրանսահայ նշանավոր կինոռեժիսոր («Մայրիկ» ֆիլմ, մահ.՝ 2002 թ.): Արժանացել է մի շարք պարգեւների, ֆրանսիական՝ «Պատվավոր Լեգեոնի շքանշան», Հայ առաքելական եկեղեցու՝ «Սուրբ Գրիգոր Լուսավորիչ» 1-ին աստիճանի շքանշան, «Ոսկե ծիրան» կինոփառատոնի շրջանակներում արժանացել է «Սերգեյ Փարաջանով» մրցանակի (հետմահու)՝ համաշխարհային կինոյում մեծ ավանդի համար։ Մեկ անգամ առաջադրվել է Օսկարի՝ «Հինգ ոտքերով ոչխար» լավագույն սցենար անվանակարգում:
-1922 թ. հոկտեմբերի 15-ին ծնվել է Գրիգոր Գուրզադյանը՝ ականավոր հայ գիտնական, ֆիզիկոս աստղագետ, գրող էսսեիստ, գեղանկարիչ, ՀՀ գիտության ազգային ակադեմիայի ակադեմիկոս, ՀՀ գրողների միության եւ նկարիչների միության անդամ։ Գուրզադյանը տիեզերական աստղագիտության առաջնեկներից է, ԽՍՀՄ տիեզերական ծրագրի՝ Օրիոն աստղադիտական կապի կայանների նախագծող: ՀՀ վաստակավոր ճարտարապետ Սարգիս Գուրզադյանի եղբայրն է, Վահագն Գուրզադյանի հայրը:
-1951 թ. հոկտեմբերի 15-ին ծնվել է Ռաֆայել Վահանյանը՝ հայ շախմատիստ:
-1964 թ. հոկտեմբերի 15-ին շահագործման հանձնվեց աշխարհի ամենաերկար գազամուղների համակարգը՝ «Դրուժբա», նրա մեջ են մտնում մոտ 8900 կմ երկարությամբ գազի խողովակներ:
-1980 թ. հոկտեմբերի 15-ին մահացել է Մուշեղ Գալշոյանը՝ հայ արձակագիր, լրագրող, ՀԽՍՀ պետական մրցանակի դափնեկիր (1981 թ., հետմահու, «Մարութա սարի ամպերը» ժողովածուի համար)։ Գրական անուն է դարձրել տոհմական Գալշոյան ազգանունը:
-2006 թ. հոկտեմբերի 15-ին մահացել է Վարդուհի Վարդանյանը՝ հայ երգչուհի (ծնվ.՝ 1976 թ.):
-1570 թ. հոկտեմբերի 15-ին հիմնադրվում է ներկայիս Հյուսիսային Կորեայի մայրաքաղաք Փխենյանը:
-1806 թ. հոկտեմբերի 15-ին Բաքվի խանությունը մտցվում է Ռուսաստանի կայսրության կազմի մեջ:
-1880 թ. հոկտեմբերի 15-ին հիմնաքարը տեղադրելուց 632 տարի անց ավարտվում է Քյոլնի տաճարի շինարարությունը:
-1971 թ. հոկտեմբերի 15-ին Իրանում սկսվում են Պարսկաստանի հիմնադրման 2500-ամյակին նվիրված տոնակատարությունները:
-1990 թ. հոկտեմբերի 15-ին խորհրդային առաջնորդ Միխայիլ Գորբաչովն արժանանում է Նոբելյան մրցանակի:
