Երեւանում մայիսի 3-9-ը իրականացվելու է Հայաստանի ֆուտբոլի ֆեդերացիայի եւ ՖԻՖԱ-ի հիմնադրամի համատեղ «ՖԻՖԱ-ի հիմնադրամի ճամբար-Հայաստան 2021» ծրագիրը։ Այս մասին հայտնում է ՀՖՖ-ն: Հայաստանը ՖԻՖԱ-ի հիմնադրամի կողմից ընտրվել է որպես ծրագիրն իրականացնող առաջին երկիր։
Ծրագրի շրջանակներում ՀՖՖ տեխնիկական կենտրոն/ֆուտբոլի ակադեմիայում կազմակերպվելու է մեկշաբաթյա ճամբար՝ անապահով ընտանիքների, ծնողազուրկ, հաշմանդամություն ունեցող երեխաների, ազգային փոքրամասնությունների ներկայացուցիչների եւ Արցախից տեղահանված ընտանիքների՝ նախապես ընտրված 12-14 տարեկան 100 երեխաների համար։ Երեխաները մասնակցելու են զվարճալի ֆուտբոլային մարզումների եւ ՄԱԿ-ի կայուն զարգացման նպատակների հիման վրա կազմված դասընթացների։
Շաբաթվա ընթացքում նախատեսված են միջոցառումներ ՖԻՖԱ Հիմնադրամի նախագահ Յուրի Ջորկաեֆֆի, ինչպես նաեւ ՖԻՖԱ-ի մրցավարների բաժնի ղեկավար Մասիմո Բուզակայի հետ։
