Պատմության հետագծով

-1934 թ. սեպտեմբերի 30-ին ծնվել է Հենրիկ Մալյանը՝ հայ նշանավոր կինոռեժիսոր, թատերական ռեժիսոր, սցենարիստ, թատերական ուսուցիչ, ՀԽՍՀ ժողովրդական արտիստ (1977), ԽՍՀՄ ժողովրդական արտիստ (1982)։ Պետական մրցանակի դափնեկիր։ ԽՍՀՄ ժողովրդական արտիստ Դավիթ Մալյանի (1904-1976) եղբոր որդին, բեմադրիչ, ՀՀ արվեստի վաստակավոր գործիչ Նարինե Մալյանի հայրը։

-1919 թ. սեպտեմբերի 30-ին ծնվել է Գեւորգ Էմինը՝ հայ գրող, բանաստեղծ, թարգմանիչ, ԽՍՀՄ պետական մրցանակի կրկնակի դափնեկիր (1951, «Նոր ճանապարհ» ժողովածու, 1976, «Դար, հող, սեր» բանաստեղծությունների գիրք), Չարենցի անվան մրցանակի դափնեկիր (1979)։

-1930 թ. սեպտեմբերի 30-ին ծնվել է Սվետլանա Գրիգորյանը՝ հայ անվանի դերասանուհի։ ՀԽՍՀ ժողովրդական արտիստ։ Երեւանի պատվավոր քաղաքացի։ Արժանացել է բազմաթիվ պարգեւների եւ շքանշանների՝ «Մովսես Խորենացի», Սուրբ Էջմիածնի կողմից՝ «Սուրբ Սահակ եւ Սուրբ Մեսրոպ»։ 2009 թ. Լոս Անջելեսում հանդիսավորությամբ նրան է հանձնվել «Ծիծաղի թագուհի» տիտղոսը:

-1985 թ. սեպտեմբերի 30-ին մահացել է Բենիամին Մարգարյանը՝ հայ խորհրդային աստղագետ, Հայկական ԽՍՀ ԳԱ ակադեմիկոս (1971), ՀԽՍՀ գիտության վաստակավոր գործիչ (1961)։ ԽՍՀՄ ԳԱ աստղագիտական խորհրդի անդամ (1964), Միջազգային աստղագիտական միության «Գալակտիկաներ» հանձնաժողովի փոխնախագահ (1973-1976), նախագահ (1976-1979)։

-1975 թ. սեպտեմբերի 30-ին հայտնաբերվեց Յուպիտերի արբանյակ Ֆեմիստոն։

-1991-ից սկսած սեպտեմբերի 30-ին նշվում է թարգմանչի միջազգային օրը։

-1791 թ. սեպտեմբերի 30-ին տեղի ունեցավ Վոլֆգանգ Ամադեուս Մոցարտի «Կախարդական սրինգ» օպերայի առաջնախաղը։

-1915 թ. սեպտեմբերի 30-ին Ուռհայի ինքնապաշտպանության ժամանակ թուրքական զինված ուժերը հարձակվեցին հայկական թաղամասի վրա եւ մոտ 400 զոհ տալով՝ նահանջեցին։