«Վանաձորի օր» տոնակատարությանն ընդառաջ՝ համայնքի ավագանու արտահերթ նիստում հաստատվեց կենսաբանական գիտությունների դոկտոր, պրոֆեսոր, ՀՀ գիտությունների ազգային ակադեմիայի թղթակից անդամ Ռաֆիկ Եդոյանին եւ «Ինտերկապ» ԲԿ նախագահ Նորայր Զուլոյանին «Վանաձորի պատվավոր քաղաքացի» կոչում շնորհելու մասին որոշումը: Վանաձորցիները սիրով ընդունեցին լուրը՝ մաղթելով գնահատանքի նոր դրսեւորումներ:
Ռ. Եդոյանը բազում տարիներ գլխավորել է Վանաձորի մանկավարժական իստիտուտը, 200 գիտական հոդվածների, 16 բուհական դասագրքի եւ 2 գյուտի հեղինակ է: Ն. Զուլոյանի ստեղծած ԲԿ-ն առաջինն է Հայաստանում, որ դարավերջին կապեր հաստատեց Եվրոպայի մի շարք երկրների բարեգործական, մշակութային ու մարզական միությունների հետ եւ նախաձեռնեց մարդասիրական օգնության փոխադրումները մեր երկիր՝ բուժկազմակերպություններին ու բնակչությանը տարիներ շարունակ հատկացնելով դեղորայք, բժշկական սարքավորումներ, հաշմանդամի սայլակներ, սնունդ, հագուստ, մարզական եւ դպրոցական պարագաներ, համակարգիչներ… ԲԿ-ի շնորհիվ 1991-ին 9-13 տարեկան լոռեցի 10 պատանի ուսման ուղարկվեցին Վենետիկ` Մուրադ-Ռաֆայելյան վարժարանում անվճար սովորելու համար: 1990-2001 թթ. մեր խաչքարագործ վարպետների կերտած 11 խաչքար-հուշարձաններ «Ինտերկապի» միջոցներով տեղափոխվել եւ տեղադրվել են եվրոպական հայտնի քաղաքներում: Հիմնադրել է Վանաձորի «Ինտերկապ» անկախ հեռուստաստուդիան, որից հետագայում ծնունդ առան «Միգ» եւ «Լոռի» հեռուստաընկերությունները: ԲԿ-ի շնորհիվ Վանաձորի «Հորովել», «Տաթեւ» համույթները, Երեւանի Կոմիտասի անվան լարային քառյակը բարեգործական համերգներով ելույթներ են ունեցել Ռուսաստանում, Ֆրանսիայում, Գերմանիայում, Իտալիայում, Հունաստանում, Ստամբուլում, գեղանկարիչներ Ֆերդինանդ Գյումրեցին եւ Նիկոլ Աղաբաբյանը ցուցահանդեսներով հանդես եկան Իսպանիայում, Ֆրանսիայում, Իտալիայում, Գերմանիայում` 2003-2008 թթ.: Իսկ 2019 թ. Վանաձորում հանդիսությամբ բացվեց Մեծն զորավար Անդրանիկի առաջին բրոնզաձույլ հուշարձանը: Նախաձեռնության հեղինակը դարձյալ «Ինտերկապն» է:
Գագիկ ԱՆՏՈՆՅԱՆ
Լոռի
