Ղափամա, խափամա՝ հայկական կերակուր։ Առավել հաճախ պատրաստվում է Ամանորի եւ Սուրբ Զատիկի կապակցությամբ։
Պատրաստում են դդումով. կեղեւը մաքրում են, վերեւի մասը կափարիչանման կտրում, կորիզները հանում, մեջը լցնում խաշած բրինձ, չամիչ, յուղ, մեղր եւ համեմունք։ Եփում են կավե ամանի մեջ՝ թոնրում, փռում։
Ղափաման եփում են նաեւ մսով. գառան կամ ուլի փորի մեջ ձավարի, սոխի եւ ռեհանի հետ խառնած միսը մոտ 5-6 ժամ եփում են բերանը խուփով ծածկած եւ շուրջը խմորով ծեփած (գոլորշին դուրս չգալու համար) կճուճի մեջ՝ թոնրում։
