Երուսաղեմ՝ հին մերձավորարեւելյան քաղաք, որը Միջերկրական եւ Մեռյալ ծովերի ջրաբաժանում է՝ 650-840 մ բարձրության վրա։ Աշխարհի հնագույն քաղաքներից մեկն է, նրա տարիքն ավելին է, քան 3500 տարին։ Երուսաղեմը համարվում է երեք կրոնների կենտրոն. հուդայականություն, քրիստոնեություն, իսլամ։ Բնակչությունը՝ 919 438 մարդ (2018)։
Անցյալում Երուսաղեմը եղել է Հրեական թագավորության մայրաքաղաքը, հիմա այն պաշտոնապես Իսրայելի հանրապետության մայրաքաղաքն է եւ այնտեղ են բոլոր պետական կառույցները, սակայն քաղաքի արեւելյան մասի վրա Իսրայելի ինքնիշխանությունը մինչեւ 2017 թ. ճանաչված չէր միջազգային հանրության զգալի մասի կողմից։ ԱՄՆ քառասունհինգերորդ նախագահ Դոնալդ Թրամփի կողմից 2017 թ. դեկտեմբերին Երուսաղեմը՝ վերստին Իսրայելի մայրաքաղաք ճանաչելը եւ կարճ ժամանակ անց ԱՄՆ դեսպանությունն այնտեղ տեղափոխելու որոշման ընդունումը փոխեցին այս հարցի վերաբերյալ գրեթե յոթանասուն տարի տեւած անորոշ իրավիճակը։ Ընդ որում, ԱՄՆ նախագահի այս քայլի դեմ ամենաշատը բողոքողներից են եղել Թուրքիան եւ Ռուսաստանը։ Չնայած Թուրքիայի եւ մյուս հակաամերիկյան ու հակաիսրայելական ուժերի բողոքներին, ԱՄՆ-ն 2018 թ. մայիսի 14-ին՝ Իսրայել պետության հռչակման յոթանասուներորդ տարեդարձի օրը, իր դեսպանատունը Թել-Ավիվից տեղափոխեց Երուսաղեմ։
