Ճանապարհային երթեւեկության հարցերը կարեւոր նշանակություն ունեն մեր երկրի հետագա զարգացման համար: Հայաստանում ճանապարհային երթեւեկության կանոնների խախտման հետեւանքով տարեկան զոհվում են ավելի քան 300 եւ մարմնական վնասվածքներ են ստանում հազարավոր մարդիկ: Ներկայում տարբեր տեսակի միջոցառումներ եւ օրենսդրական ակտեր են մշակվել հարցի մեղմացման համար՝ բալային համակարգ, զրկում եւ այլն: Վթարների հիմնական պատճառը՝ արագության գերազանցում, ոգելից խմիչքների օգտագործում, ճանապարհների վատ վիճակ եւ այլն:
Առաջարկում եմ հետեւյալը՝ ճանապարհներին տեղադրված երթեւեկության նշանների մեջ մտցնել ձմեռային եւ ամառային ժամանակահատվածի համար արագության սահմանափակումներ:
Դպրոցների եւ հասարակական վայրերի մոտ տեղադրել համապատասխան ցուցանակներ:
Հատկապես տարեց, առողջական խնդիրներ ունեցող մարդկանց շրջանում տանել համապատասխան աշխատանք՝ վարորդական իրավունքի վկայականներն ինքնակամ վերադարձնելու համար: Խրախուսել նրանց նյութական եւ բարոյահոգեբանական տեսակետից:
Բարձրացնել վարորդական վկայականներ տվող կազմակերպությունների դերն ու նշանակությունը, պատասխանատվությունը:
Զանգվածային լրատվամիջոցներով նպաստել հարցի նկատմամբ ազգային անվտանգության գիտակցմանը:
Մանրակրկիտ ուսումնասիրել միջազգային փորձը եւ մեր հանրապետության առանձնահատկությունները: Մշակել հարցի զգալիորեն մեղմացման համալիր ծրագիր եւ այն իրականացնել: Լեռնային տարածքներով անցնող որոշ ճանապարհներին տեղադրել բետոնային պատնեշներ, ինչը հնարավորություն կտա բացառել վտանգավոր վթարները:
Երեկոյան ժամերին լուսավորել մայրուղիների առաջնահերթ որոշ հատվածներ:
Խրախուսել եւ գործածության մեջ դնել խնդրի բարելավման առաջարկները:
Ստեփան ՊԱՊԻԿՅԱՆ
Հայկական էներգետիկական ակադեմիայի հիմնադիր նախագահ
