Արցախյան երրորդ պատերազմից հետո ավելի քան 131 հազար շահառու է օգտվել «Ավրորա» բարեգործական հիմնադրամի ծրագրերից, եւ նրանց թիվը, ըստ կառույցի արցախյան մասնաճյուղի պատասխանատուի, շարունակում է աճել:
Մարդասիրական նախաձեռնությունը, հայտարարելով պատերազմի հետեւանքով առաջացած ճգնաժամի հաղթահարման ծրագրի նոր փուլի մեկնարկի մասին, որը ներառում է 14 նախագիծ, մտադիր է նոր շահառուներին ցուցաբերել 800 հազար ԱՄՆ դոլարին համարժեք մարդասիրական աջակցություն: Արցախի ծրագրի ղեկավար Նարինե Աղաբալյանի խոսքերով՝ նախատեսվող բյուջեի գումարները գլխավորապես կծախսվեն առողջապահության, կրթության, մշակույթի, սպորտի եւ սոցիալական ոլորտների զարգացման նպատակով՝ ըստ հրատապության:
Ինչպես տեղեկացրեց ծրագրի պատասխանատուն, մարդասիրական աջակցությունից հատկապես կօգտվեն այն կազմակերպությունները, որոնք հիմնավորված նախագծեր կներկայացնեն՝ ուղղված սահմանամերձ բնակավայրերի վերակենդանացմանն ու համայնքների զարգացմանը: «Արձագանքելով մեր կոչին՝ մրցույթին մասնակցող հասարակական կազմակերպությունների կողմից շուրջ 7 տասնյակ նախագծեր են ստացվել, որոնք մեծամասամբ պատերազմից տուժած Արցախի եւ Հայաստանի սահմանամերձ համայնքների վերակենդանացմանն են միտված, ենթակառուցվածքների արդիականացմանն ու նոր աշխատատեղերի ստեղծմանը,- ասում է Ն. Աղաբալյանը:- Նախապատվությունը, բնականաբար, տրվել է ավերված այն տնտեսությունների սեփականատերերին, որոնք որպես շահառու անմիջականորեն մասնակցելու են նախանշված ծրագրերի իրագործմանը, եւ արդյունքում բարելավվելու են նրանց սոցիալ-կենցաղային պայմանները»:
Հատկանշական է, որ «Ավրորան» իր առաքելության շրջանակներում նաեւ նպաստում է սահմանամերձ բնակավայրերում բիզնես ծրագրերի իրականացմանը, ինչը հավելյալ եկամուտներ ապահովելու հնարավորություն է ընձեռում տասնյակ ընտանիքների: Ն. Աղաբալյանի հավաստմամբ՝ բարեգործական հիմնադրամը, սկսելով 1 մլն 740 հազար ԱՄՆ դոլար ընդհանուր ֆոնդով ամենատարբեր նախագծերի ֆինանսավորման գործընթացը, նպատակ ունի ընդլայնել այն շահառուների շրջանակը, ովքեր ընտանեկան բիզնեսը զարգացնելու, համայնքի խնդիրները համատեղ ուժերով լուծելու ցանկություն ունեն եւ տրամադրվող գումարները կօգտագործեն նպատակային, «բացառապես՝ արարելու, սեփական կարիքները հոգալու, երկիրը շենացնելու եւ այն երբեք չլքելու» պայմանով…
