-1992 թ. մարտի 2-ին Հայաստանը դարձավ ՄԱԿ-ի անդամ:
-1855 թ. մարտի 2-ին Ալեքսանդր Երկրորդը դառնում է Ռուսաստանի ցար:
-1917 թ. մարտի 2-ին Ռուսական կայսրության վերջին կայսր Նիկոլայ Երկրորդը հրաժարվում է գահից:
-1933 թ. մարտի 2-ին Նյու Յորքում տեղի է ունենում «Քինգ Քոնգ» ֆիլմի պրեմիերան:
-1956 թ. մարտի 2-ին Մարոկկոն ձեռք է բերում անկախություն Ֆրանսիայից:
-1853 թ. մարտի 2-ին ծնվել է Քրիստափոր Կարա-Մուրզան՝ հայ երգահան (մահ.՝ 1902 թ.)։ 19-րդ դարի երկրորդ կեսի հայ երաժշտության պատմության մեջ իր ուրույն տեղն ունի Կարա-Մուրզան։ Նա իր ժամանակի եռանդով լի երաժշտա-հասարակական գործիչ էր, ժողովրդի լավագույն նվիրյալներից, բազմաթիվ երգչախմբերի կազմակերպիչ։ Կարա-Մուրզան առաջինը հաստատեց բազմաձայն երգեցողություն հայկական երաժշտության պատմության մեջ։ Նրա ջանքերով ժողովրդական երգի մշակումը դարի վերջին տասնամյակում առանձին նշանակություն ձեռք բերեց։ Կարա-Մուրզան նաեւ լավ մանկավարժ էր։ Նա օգնում էր երիտասարդ երաժիշտներին, պատրաստում եւ դաստիարակում էր երգչախմբերի ղեկավարների։ Նաեւ հրապարակախոս էր։ Նրա հոդվածներում արտացոլվում են առաջադիմական, գեղարվեստական սկզբունքներ։
-1931 թ. մարտի 2-ին ծնվել է Միխայիլ Գորբաչովը՝ ԽՍՀՄ առաջին եւ վերջին նախագահը:
-1855 թ. մարտի 2-ին մահացել է Նիկոլայ Առաջին ցարը (ծնվ.՝ 1796 թ.):
-1895 թ. մարտի 2-ին մահացել է Բերտա Մորիզոն՝ ֆրանսիացի նկարչուհի (ծնվ.՝ 1841 թ.):
-2007 թ. մարտի 2-ին մահացել է Անրի Թրուայան (Լեւոն Թորոսյան)՝ գրող: Ծնվել է 1911 թ., Մոսկվայում։ 1918-ին ընտանիքի հետ գաղթել է Ռուսաստանից եւ 1920-ից հաստատվել Ֆրանսիայում։ Ստացել է իրավաբանական կրթություն։ 1959 թ. Թրուայան ընտրվել է ֆրանսիական ակադեմիայի անդամ: Նա «Քառասուն անմահներից» մեկը լինելու պատվին արժանացած առաջին ոչ ֆրանսիացի գրողն է։ Առաջին իսկ վիպակը՝ «Սարդը» (1938), մեծ հռչակ բերեց Թրուայային, եւ նա արժանացավ հանրահայտ «Գոնկուր» մրցանակի։ Թե՛ այս գործում, թե՛ հետագա երկերում՝ «Քանի աշխարհը կա» (1947), պատկերել է 20-րդ դարասկզբի Ռուսաստանի պատմաքաղաքական իրավիճակը եւ վտարանդիների կացությունը։ «Արդարների լույսը» (1959-1963) պատմավեպերի շարքը նվիրված է դեկաբրիստներին, «Ապագայի ժառանգությունը» (1968-1970) եռագրությունը՝ ճորտատիրության վերացմանն ու նարոդնիկության շարժմանը։ Թրուայային ավելի մեծ հռչակ բերեցին «Սգավոր ձյունը» (1952, հայերեն՝ 1973) վիպակը եւ «Էգլեթիերների ընտանիքը» (1965-1967, հայերեն՝ 1980) եռագրությունը, որոնցից առաջինը եւս արժանացել է գրական հեղինակավոր մրցանակի, իսկ դրա մոտիվներով ռեժիսոր Յուրի Երզնկյանը նկարահանել է համանուն ֆիլմ՝ Արմեն Ջիգարխանյանի դերակատարմամբ։
-2008 թ. մարտի 2-ին մահացել է Սոֆիկո Ճիաուրելին՝ վրաց դերասանուհի (ծնվ.՝ 1937 թ.), Վրացական ԽՍՀ ժողովրդական արտիստուհի (1976), Հայկական ԽՍՀ ժողովրդական արտիստուհի (1979)։ Նկարահանվել է ավելի քան 100 ֆիլմում։ ԽՍՀՄ միակ դերասանուհին է, որ միջազգային մրցույթներում 7 անգամ արժանացել է «Կնոջ լավագույն դերակատարման համար» մրցանակին:
