Տարբեր ժողովուրդների կողմից թեյի օգտագործման մշակույթին էր նվիրված Երեւանի Արշավիր Շավարշյանի անվան թիվ 40 հիմնական դպրոցում կայացած թեյախմության փառատոնը: Դպրոցի բակում 10 երկրների, այդ թվում նաեւ Հայաստանի ազգային տարազներով, պետական դրոշներով եւ աղ ու հացով դպրոցականները դիմավորեցին հյուրերին:
Տնօրեն Լիանա Մուրադյանը ողջունեց ներկաներին՝ մասնավորապես նշելով. «Կարեւորելով մատաղ սերնդի մեջ մշակութային երկխոսության ձեւավորումը՝ մենք ներկայացնում ենք 10 պետությունների (Հայաստան, Վրաստան, Հնդկաստան, Չինաստան, Իրան, Եգիպտոս, Ռուսաստան, Ուկրաինա, Անգլիա, Չեխիա) թեյախմության արարողակարգը»: Նշեց նաեւ՝ ամենայն հարգանք տածելով եվրոպական պետությունների նկատմամբ՝ աշակերտները նախագծային աշխատանքներ են կատարել՝ ընտրելով արեւելյան երկրների թեյախմության արարողակարգն ու ավանդույթները, քանի որ թեյախմության մշակույթը ձեւավորվել է Հին Արեւելքում եւ շարունակվում է զարգանալ ցայսօր: Ապա ներկայացրեց հյուրերին՝ ՀՀ-ում Հնդկաստանի դեսպանի պաշտոնակատար Տեջաս Պագար, ԻԻՀ դեսպանի մշակույթի գծով խորհրդական Սեյեդ Հոսեյն Թաբաթաբայի, «Շահիդ Ֆահմիդե» կրթահամալիրի տնօրեն Ռեզա Դավարին, Հնդկական մշակույթի կենտրոնի տնօրեն Կարեն Մկրտչյան եւ հայ-հնդկական բարեկամության ՀԿ անդամներ, հնդիկ բարեկամներ, Հայաստանում Կոնֆուցիուսի ինստիտուտի ներկայացուցիչներ: Վերջինս զբաղվում է չինական մշակույթի, չինարենի ուսուցմամբ ու տարածմամբ, հիմնվել է Չինաստանի կառավարության աջակցությամբ՝ չինական Շանսիի համալսարանի եւ Երեւանի Վ. Բրյուսովի անվան պետական լեզվաբանական համալսարանի նախաձեռնությամբ, 2009 թ. փետրվարին: Գործընկեր համալսարանն է ՉԺՀ Դալիանի օտար լեզուների համալսարանը: Ներկա էին նաեւ «Հայաստան» կրթամշակութային ակումբի նախագահ Արմինա Սարգսյանը, Երեւանի Կենտրոն վարչական շրջանի կրթության, մշակույթի եւ սպորտի բաժնի պետ Նելլի Ասատրյանը եւ այլք: Հանդիսավոր մասից հետո ներկաները հյուրասիրվեցին դպրոցականների պատրաստած թեյով ու քաղցրավենիքով: Առաջին հարկի մի անկյունում չինական տարազով աշակերտները ներկայացրել էին իրենց ազգային թեյախմության մշակույթը: Սկզբում նկարագրեցին, թե ինչպես է պատրաստվում չինական թեյը, մատուցվում եւ այլ արարողություններ՝ կապված այս հետաքրքիր մշակույթի հետ: Մյուս անկյունում իրանական տարածքն էր: Այստեղ իրենց ելույթով (երգ ու ասմունք՝ նվիրված այս արարողությանը) հանդես եկան նաեւ «Շահիդ Ֆահմիդե» կրթահամալիրի սաները: Կենտրոնում հայկական անկյունն էր՝ հայկական հյուրասիրությամբ: Հայ ազգագրական պարային կատարումով հանդես եկան «Արմինա» պարային համույթի (ղեկավար՝ Արմինե Ալեքսանյան) պարուհիները: Երկրորդ հարկում ներկայացված էինարդեն մնացած 7 երկրների տաղավարները: Եգիպտոսի Արաբական Հանրապետության տաղավարի հարեւանությամբ ներկայացված էր նաեւ թեյախմությանը զուգահեռ նարգիլեի օգտագործման մշակույթը: Արաբական համազգեստով դպրոցականները ներկայացրեցին այդ հնամյա երկրի մշակույթի տարրեր: Եղավ նաեւ պարային կատարում: Վրաստանի, Ուկրաինայի, Չեխիայի, Անգլիայի, Ռուսաստանի տաղավարները նույնպես հանդես եկան այդ երկրների մշակույթը ներկայացնելով՝ պար, երգ, ինչպես նաեւ թեյախմություն ու հյուրասիրություն: Հետաքրքիր էր ձեւավորված հնդկական տաղավարը, որի մոտ, բացի դպրոցի սաներից ու նրանց ուսուցչուհուց, ներկա էին նաեւ հնդիկներ: Հնդիկ երեխաների դերում հայ դպրոցականները հանդես եկան՝ հյուրընկալելով պատվելի հյուրերին, այնուհետեւ հյուրասիրեցին ընդունված կարգով, հանդես եկան նաեւ հնդկական պարով, որը սովորեցրել էր հնդիկ պարուսույցը: Հյուրասիրությունից հետո դպրոցի տնօրենը շնորհակալագրեր հանձնեց աջակիցներին, հուշանվերներ՝ պատվավոր հյուրերին: Հնդկաստանի դեսպանի պաշտոնակատարը դպրոցին հուշանվեր հանձնեց:
Արարողության վերջում Հնդկաստանի դեսպանի պաշտոնակատարը նշեց. «Կարեւոր ու լավ կազմակերպված ծրագիր էր: Ներկայացվեց տարբեր ժողովուրդների մշակույթների շփումը, հատկապես կարեւոր է, որ երեխաներն այս տարիքից արդեն ծանոթանում են ուրիշ ժողովուրդների մշակույթին: Ինձ շատ դուր եկավ միջոցառումը, իսկ հյուրասիրության ներկայացրած թեյերն ու խմորեղենները համեղ էին՝ հարուստ համեմունքներով»:
Տեջաս Պագարն անդրադարձավ նաեւ հայ-հնդկական բարեկամության եւ նորօրյա կապերին. «Վերջին երկու տարիներին ակտիվորեն խորացել է հայ-հնդկական բարեկամությունը, տարբեր ոլորտներում աշխատանք ունենք տանելու, բայց ամենակարեւորն առեւտրի ոլորտն է, կարծում եմ՝ հետագայում սա կօգնի ամրապնդել դրանից բխող տարբեր ոլորտներում համագործակցությունը…»:
