«Մենք ենք, մեր սարերը»՝ Հենրիկ Մալյանի՝ Հրանտ Մաթեւոսյանի համանուն ստեղծագործության հիման վրա նկարահանած գեղարվեստական կինոնկար։ Նկարահանվել է «Հայֆիլմ» կինոստուդիայում 1969 թ.։ Իշխանի հոտում հայտնվում են անծանոթ ոչխարներ, եւ նա երեկոյան աշխատանքից հոգնած հովիվներին ու հնձվորներին առաջարկում է մորթել ոչխարները։ Առանց երկար-բարակ մտածելու, ընկերովի մորթում են ոչխարներն ու խորոված պատրաստում։ Խորովածն ուտելու պահին հայտնվում է Ռեւազն ու միանում նրանց կերուխումին։ Ուտելուց հետո Ռեւազը հիշում է, որ ոչխար է կորցրել ու հովիվներին հարցնում է, թե նրանք անծանոթ ոչխարներ չե՞ն տեսել։ Իշխանն ու ընկերները հասկանում են, որ իրենց մորթածը Ռեւազի ոչխարներն էին, ու փորձում են վերջինիս խաբելով ճանապարհ դնել։ Միջամտում են Զավենն ու Պավլեն, ովքեր կոպտում են Ռեւազին։
Ռեւազի կինը դիմում է միլիցիա, եւ գյուղ գործուղված քննիչը փորձում է քանդել պատմության կծիկը։ Սակայն լեյտենանտը հասկանում է, որ արվածը դիտավորյալ գողություն չէ, եւ որոշում է հետաքննություն չանցկացնել։ Բայց իր ղեկավարության առաջ անաչառ երեւալու համար սկսում է, օրենքի տառին համապատասխան, հետաքննել գործն ու հարցաքննել մասնակիցներին։ Քննությունը շարունակելու համար լեյտենանտը որոշում է գործի մասնակիցներին՝ Իշխանին, Ավագին, Պավլեին, Զավենին ու Ռեւազին, տանել միլիցիայի բաժանմունք։ Իսկ քանի որ հենց այդ օրերին գյուղից պետք է ոչխարներ տանեին մթերակայան, նրանք քաղաք են գնում սարերով՝ իրենց հետ տանելով մթերման հոտը։
Սցենարիստ՝ Հրանտ Մաթեւոսյան, ռեժիսոր՝ Հենրիկ Մալյան, օպերատոր՝ Կարեն Մեսյան, կոմպոզիտոր՝ Տիգրան Մանսուրյան:
Դերերում.
-Լեյտենանտ՝ Սոս Սարգսյան
-Իշխան՝ Մհեր Մկրտչյան
-Պավլե՝ Խորեն Աբրահամյան
-Ավագ՝ Ազատ Շերենց
-Զավեն՝ Արմեն Այվազյան
-Ռեւազ՝ Արտավազդ Փելեշյան
