Երեւանի Վ. Բրյուսովի անվան պետական համալսարանում նախօրեին տեղի ունեցավ «Արցախյան պատերազմների հերոսների հիշատակի լսարան»-ի բացման արարողությունը: Համալսարանի ուսանողներից հինգը զոհվել են՝ պաշտպանելով մեր հայրենիքն ու ժողովրդին:
Արարողությանը ներկա էին նահատակված հերոսների ընտանիքների անդամներ, ընկերներ, համակուրսեցիներ, բուհի ղեկավար կազմը` ռեկտոր Կ. Հարությունյանի գլխավորությամբ, պրոֆեսորադասախոսական եւ վարչական կազմերի ներկայացուցիչներ: Միջոցառման սկզբում Կ. Հարությունյանը մասնավորապես նշեց.
«Հարգելի՛ ծնողներ, դասախոսներ, ուսանողներ, ներկաներ,
Այսօր ԲՊՀ-ում հիշատակի եւ մեծարման օր է: Մենք բացում ենք Արցախյան 44-օրյա պատերազմում հերոսացած մեր ուսանողների անվան լսարան: Պատերազմից անցել է գրեթե երկու տարի, սակայն մեր սրտերում եւ հոգիներում չի հնացել ո՛չ ցավը, ո՛չ կսկիծը: Հայրենիքի պաշտպանության գործում մեր համալսարանն անմասն չէր կարող մնալ եւ չի մնացել: Նահատակված հերոսների թվում են մեր հինգ ուսանողները: Հիշենք նրանց անուն առ անուն՝ Արամյան Անանիա, Ավետիսյան Հրաչիկ, Ավետյան Վարդան, Բրսոյան Գագիկ, Մովսիսյան Հովհաննես: Այս քաջ տղաներից յուրաքանչյուրը հերոսապատում կերտած մարտիկ է: Նրանք տարբեր էին իրենց էությամբ, բնավորությամբ, բայց նույնն էր նրանց ապրելու բանաձեւը, նույնն էր նրանց երազանքը՝ կառուցել հզոր երկիր, ունենալ հզոր բանակ եւ պետություն: Սերունդներ են մտնելու մեր համալսարան եւ դուրս գալու այս լսարանից, եւ նրանք լինելու են ոգեշնչված: Որպես իրենց հայրենիքին նվիրյալ զավակներ՝ մեր հերոս տղաներն այս լսարանից հայրենասիրության եւ խիզախության դասեր պիտի ավանդեն մեր սերունդներին, որոնք հաջորդելու են միմյանց՝ մշտապես զգալով սրբալույս տղաների գոտեպնդող հայացքները: Ցավի, ափսոսանքի եւ հպարտության զգացումով կրկին իմ զորակցությունն ու վշտակցությունն եմ հայտնում պատերազմում զոհված մեր ուսանողների ծնողներին եւ հարազատներին:
Սիրելի՛ մայրեր եւ հայրեր, առանձնահատուկ շնորհակալություն եմ ուզում հայտնել ձեզ՝ ձեր որդիների մեջ հայրենիքի հանդեպ անմնացորդ նվիրում սերմանելու համար: Հիշատակ եւ խոնարհում մեր հերոս ուսանողներին, նրանք հավերժածին են եւ ներկա են լինելու մեր համալսարանում միշտ՝ որպես խիզախության եւ սխրանքի ուղենիշ գալիք սերունդների համար»:
Միջոցառման ընթացքում ցուցադրվեցին հերոս տղաներից յուրաքանչյուրի մասին պատմող տեսանյութեր, ուսանողներն էլ հայրենասիրական կատարումներ հնչեցրին:
Հերոս Վարդան Ավետյանի համակուրսեցին` Մարիամը, ներկաների հետ կիսվեց իր ջերմ հուշերով, Վարդանի հետ ունեցած ուսանողական կյանքի հիշարժան դրվագներով: Նա հատկապես շեշտեց, որ ցավոք, իրենց ընկերական խումբը մեկով պակասել է, բայց շարունակում են ներկա ժամանակով խոսել Վարդանի մասին` զգալով նրա ներկայությունը: Համակուրսեցու խոսքին հաջորդեց անգլերենի ամբիոնի դասախոս Գայանե Բարսեղյանի ելույթը, ով իր սրտակցման խոսքերը հղեց ներկաներին: Նա դասավանդել է Վարդան Ավետյանին, ուստի որոշ մանրամասներով կիսվեց ներկաների հետ:
«Արցախյան պատերազմների հերոսների հիշատակի լսարան»-ում կան առանձնացված ցուցատախտակներ՝ հերոսների լուսանկարներով, նրանց պատկանող եւ նկարագրող իրերով:
