Վանաձորի Ստեփան Զորյանի տուն-թանգարանի հանրույթը հերթական հետաքրքիր նախաձեռնության հեղինակը դարձավ. արվեստասեր հասարակայնության դատին հանձնվեցին Վանաձորի բժշկական կենտրոնի բժիշկ-վնասվածքաբան Գեւորգ Քարամյանի ձեռքի աշխատանքները՝ գեղարվեստական ձեւավորումով փայտե ծաղկամանները: Մոտ 50 ծաղկամանները գեղեցիկ են, փորագրանկարներով զարդարուն, որ իրարից տարբերվում են արտաքին տեսքով, մեծությամբ, գեղարվեստական հնարանքով: Եթե որեւէ նմանություն էլ ունեն, իհարկե, արվեստագետ բժշկի ստեղծագործական ուրույն ձեռագրի կնիքն է:
Մինչ այդ վանաձորցիները նրան ճանաչում էին որպես բազմափորձ բժիշկ, այդ օրը ճանաչեցին նաեւ Քարամյան արվեստագետին:
Իր նոր «մասնագիտական» հափշտակվածության մասին Գեւորգ Քարամյանն ինքն է խոստովանում. «Աշխատանքը հիվանդանոցում նյարդային է, հոգնեցուցիչ, անշունչ փայտի հետ խոսակցելով` շունչ եմ տալիս՝ հոգեկան բավարարվածություն ստանում»: Նրա եղբայր Համլետը զարմանքը չթաքցրեց. «Որքան էլ մտածեի, չէի հավատա, թե մեր Գեւորգն այսպիսի գործեր կարարի, բայց Լոռի այցելելով՝ հասկացա, որ անկրկնելի, չքնաղ Լոռին է նրա մեջ նման հույզեր արթնացրել, այդ գործին մղել»:
Բժիշկ եւ արվեստագետ Քարամյանի մասին ջերմ ու սրտառուչ խոսքեր ասացին Գուգարաց թեմի առաջնորդ տեր Հովհան եպիսկոպոս Հակոբյանը, դրամատուրգ, երգիծաբան, ՀՀ արվեստի վաստակավոր գործիչ Սամվել Խալաթյանը, թանգարանի տնօրեն Լիլիթ Չոբանյանը, ասմունքի վարպետ Ջիվան Սարգսյանը, Լոռու նկարիչների միության նախագահ, գեղանկարիչ Փափագ Ալոյանը, գեղանկարիչ Ալա Գրիգորյանը, բանաստեղծուհի Ռոզա Վարդանյանը, Վանաձորի համայնքապետարանի մշակույթի բաժնի աշխատակից Անահիտ Կարապետյանը, «Թռիչք» կրթամշակութային ՀԿ նախագահ Հովհաննես Նիկողոսյանը, Վանաձորի պետական համալսարանի դասախոս, բանաստեղծ Կարինե Սիրադեղյանը, գրող, լրագրող Գագիկ Անտոնյանը:
Լուսանկարը՝ Էդգար ՕՀԱՆՅԱՆԻ
