2020 թ. մայիսի 28-ից ուժի մեջ է մտել ԵՏՀ խորհրդի թիվ 47 որոշումը, ըստ որի՝ անձնական օգտագործման տրանսպորտային միջոցների ժամանակավոր ներմուծման ժամկետները երկարաձգվել են մինչեւ այս տարվա սեպտեմբերի 30-ը։ Ֆիզիկական անձանց կողմից օտարերկրյա պետությունում գրանցված անձնական օգտագործման տրանսպորտային միջոցների ժամանակավոր ներմուծումը ՀՀ թույլատրվում է ոչ ավելի, քան 1 տարի ժամկետով:
Ասել է թե՝ եթե մեքենաները չունեն հայկական համարանիշեր, Հայաստան են ներկրվել «ժամանակավոր ներմուծում» ռեժիմով, ապա անպայման պետք է արտահանվեն, եւ դրա համար ընդամենը 2 ամիս ու մի քանի օր ժամանակ կա։ Իսկ եթե այս ընթացքում ժամանակավոր ներմուծողները չհասցնեն կամ չարտահանեն, ապա ինչի՞ կհանգեցնի դա։
Հասկանալու համար դիմեցինք ՊԵԿ-ին։ Պետական այս գերատեսչության տեղեկատվության եւ հասարակայնության հետ կապերի բաժնի պետ Լուսինե Մկրտչյանը պատասխանեց. «Անձնական օգտագործման նպատակով ժամանակավոր ներմուծված տրանսպորտային միջոցները մինչեւ 2021 թ. սեպտեմբերի 30-ը ՀՀ տարածքից չարտահանելու դեպքում պարտավորություններ կծագեն»։
Այդ պարտավորություն ասվածը ենթադրում է տուգանքների վճարում։ Ինչ վերաբերում է տուգանքի չափին, ապա, ըստ Լ. Մկրտչյանի, ՀՀ մաքսային օրենսգրքի 199-րդ հոդվածի 1-ի կետի համաձայն՝ հետագա արտահանման պարտավորությամբ Հայաստան ներմուծված տրանսպորտային միջոցները սահմանված ժամկետում չարտահանելն առաջացնում է տուգանքի նշանակում` խախտման օրվա դրությամբ այդ տրանսպորտային միջոցների համար «ներմուծում` ազատ շրջանառության համար» մաքսային ռեժիմով նախատեսված մաքսային վճարների մեծության 50 տոկոսի չափով:
Համավարակի պատճառով հնարավո՞ր է այդ ժամկետում տեղավորվել։ Ի պատասխան ՊԵԿ-ից պարզաբանեցին, որ վիրուսի պատճառով արդեն երկարացվել էր այդ ժամկետը, որը եւ ավարտվում է սեպտեմբերի վերջին։ Բացի այդ, կորոնավիրուսի սահմանափակումները մեղմացել են արդեն, օրինակ՝ ո՛չ Վրաստանը, ո՛չ Իրանը մարդկանց եւ ավտոմեքենաների ելումուտը չեն արգելում։ Իսկ ռուսական համարանիշներով ավտոմեքենաների պարագան այլ է. դրանք, հասկանալի է, ԵԱՏՄ տարածքում են։
