Հայաստանում Ճապոնիայի արտակարգ եւ լիազոր դեսպան Ֆուկուշիմա Մասանորին Հայաստանի եւ Ճապոնիայի հարաբերությունների հետագա զարգացման կարեւորագույն խնդիրներն է համարում տնտեսական հարաբերությունների ամրապնդման, մշակութային փոխանակումների, ինչպես նաեւ երիտասարդների փոխանակման ծրագրերի զարգացումը։ Այս մասին Հայաստանում Ճապոնիայի դեսպանը հայտարարել է Ճապոնիայի կայսր Նարուհիտոյի ծննդյան առիթով հրավիրված ընդունելությանը, որին մասնակցում էին նախարարներ, պատգամավորներ, ՀՀ-ում հավատարմագրված օտարերկրյա դիվանագետներ, բարձրաստիճան այլ պաշտոնյաներ:
Դեսպանը նախ շնորհավորել է Ճապոնիայի կայսր Նարուհիտոյի ծննդյան 63-րդ տարեդարձը՝ ընդգծելով, որ իր համար մեծ պատիվ է հարգարժան հյուրերի մասնակցությամբ երեք տարվա ընթացքում առաջին անգամ կազմակերպել ընդունելություն` նվիրված Նորին մեծություն կայսրին։ Ֆուկուշիմա Մասանորին շատ նշանակալից է համարում 2022 թվականը Ճապոնիա-Հայաստան հարաբերությունների համար, քանի որ սեպտեմբերի 7-ին երկու երկրները նշել են դիվանագիտական հարաբերությունների հաստատման 30-ամյակը։
«Այս ընթացքում մեր երկու երկրները շարունակաբար զարգացրել են երկկողմ հարաբերությունները՝ բոլոր կողմերի ջանքերի եւ համագործակցության շնորհիվ։ 30-ամյակի կապակցությամբ երկու կառավարությունները տարբեր միջոցառումներ էին անցկացնում Ճապոնիայում եւ Հայաստանում։ Ճապոնիայում Հայաստանի դեսպանության բարձր հովանու ներքո անցկացվել են մի շարք մշակութային միջոցառումներ»,- ասել է դեսպանը։
Նա ուրախությամբ տեղեկացրել է, որ 2023 թ. փետրվարին եւ մարտին Ճապոնիայի դեսպանությունը Հայաստանի չորս քաղաքներում անցկացնելու է ճապոնական ֆիլմերի փառատոն, ինչպես նաեւ հայկական կազմակերպությունների հետ համագործակցությամբ մարտին հրավիրելու է ճապոնացի երաժշտի, որը երաժշտասերներին կներկայացնի ճապոնական ավանդական երաժշտական գործիքը՝ կոտոն։
«1991 թվականից սկսած՝ Ճապոնիան, ձգտելով նպաստել Հայաստանի սոցիալ-տնտեսական եւ ժողովրդավարական առաջընթացին տարբեր ոլորտներում, տրամադրել է մոտ 430 միլիոն դոլարի օժանդակություն՝ դրամաշնորհային աջակցության, տեխնիկական օժանդակության եւ վարկային օգնության ծրագրերի միջոցով։ Օրինակ՝ անցյալ տարվա նոյեմբերին Ճապոնիայի կառավարությունը առողջապահության նախարարությանը տրամադրեց 39 շտապօգնության մեքենա։ Ինչ վերաբերում է մեր երկրների միջեւ մարդկային փոխանակումներին, ապա ես կցանկանայի նշել, որ ճապոնացի աշխարհահռչակ բժիշկ, վիրաբույժ, Լոս Անջելեսի Կալիֆոռնիայի համալսարանի բժշկական գիտությունների դոկտոր, պրոֆեսոր Ակիրա Իշիյամայի ներդրման մասին, որն ամեն տարի բազմաթիվ բարդ վիրահատություններ է կատարում հայ երեխաների համար։ Համոզված եմ, որ երկկողմ հարաբերությունների հետագա զարգացման կարեւորագույն խնդիրն է՝ տնտեսական հարաբերությունների ամրապնդման, մշակութային փոխանակումների, ինչպես նաեւ երիտասարդների փոխանակման ծրագրերի զարգացումը։ Որպես Հայաստանում Ճապոնիայի դեսպան՝ անելու եմ առավելագույնը վերը նշված նպատակներին հասնելու համար»,- եզրափակել է դեսպանը։
