Ամենահստակ տարբերակումը բարեկամներ եւ հոգեւոր եղբայրներ հասկացությունների մեջ սահմանել է Հիսուսը, երբ Նրան հայտնում են, որ Իր հետ ցանկանում են խոսել Նրա Մայրն ու եղբայրները։ Նա ասաց.
«Եւ նա տակաւին ժողովուրդների հետ խօսելիս, ահա նորա մայրը եւ նորա եղբայրները դուրսը կանգնած՝ ուզում էին նորա հետ խօսել։ Եւ մէկն ասեց նորան. Ահա մայրդ եւ եղբարքդ դուրսը կանգնած՝ ուզում են քեզ հետ խօսել։ Նա էլ պատասխան տուաւ իրան ասողին եւ ասեց. Ո՞վ է իմ մայրը, եւ ո՞վ են իմ եղբայրները։ Եւ իր ձեռքը դէպի իր աշակերտները մեկնելով ասեց. Ահա իմ մայրը եւ իմ եղբայրները։ Որովհետեւ ով որ իմ Հօր կամքը կատարէ որ երկնքումն է, նա է իմ եղբայրը, քոյրը եւ մայրը»։ Մատթեոս 12։46-50
Սրանով Հիսուսն ընդգծում է, որ իրական ընտանիքը հավատքով եղբայրությունն է, այսինքն՝ այն մարդիկ, ում հետ ունենք ավելի շատ ընդհանրություններ։ Այս իմաստով Հիսուսը դարձավ առաջնեկը բազմաթիվ եղբայրների մեջ Աստծո հոգեւոր ընտանիքում, որն առաջնահերթություն ունի սովորական մարդկային ընտանիքներից.
«Որովհետեւ նորանց որ առաջուց ճանաչեց, առաջուց էլ սահմանեց Իր Որդու պատկերին կերպարանակից լինելու. որ նա անդրանիկ լինի շատ եղբայրների մէջ»։ Հռովմեացիս 8։29
Նոր Կտակարանում հավատացյալների հանրույթի մասին գաղափարի արտահայտման համար գործածվում է «եղբայրներ» բառը հոգնակիով (սա, անշուշտ, վերաբերում է նաեւ կանանց)։ Եղբայրությունը հիմնվում է հավատքի միասնության եւ հավատացյալների հավասարության վրա։ Հիսուսն ընդգծում է այս երկու սկզբունքների կարեւորությունը՝ բացատրելով աշակերտներին, որ չձգտեն իրենց որեւէ առումով վեր դասել մյուսներից.
«Բայց դուք Ռաբբի չկանչուիք, որովհետեւ մէկն է ձեր ուսուցիչը՝ Քրիստոսը. եւ դուք ամենքդ եղբարք էք։ Եւ երկրիս վերայ մէկին ձեզ հայր չկանչէք. որովհետեւ մէկն է ձեր Հայրը՝ նա որ երկնքումն է։ Ոչ էլ ուսուցիչներ կանչուեցէք, որովհետեւ մէկն է ձեր Ուսուցիչը՝ Քրիստոսը։ Եւ ձեզանից մեծը թող ձեր ծառան լինի։ Ով որ իր անձը բարձրացնէ՝ կխոնարհուի, եւ ով որ իր անձը խոնարհեցնէ՝ կբարձրանայ»։ Մատթեոս 23։8-12
Ճիշտ հարաբերությունները հիմնվում են ներելու կարողության վրա, եւ այս հարցում Հիսուսը սահմանում է շատ բարձր նորմեր. մինչ երկրպագություն անելը հարկավոր է հաշտվել եղբոր հետ։ Եղբայրդ կարող է մեղանչել քո դեմ յոթ անգամ յոթանասուն անգամ, բայց դու պարտավոր ես ներել նրան սրտանց.
«Յիսուսը նորան ասեց. Չեմ ասում քեզ, մինչեւ եօթն անգամ, այլ մինչեւ եօթանասուն անգամ եօթը»։ Մատթեոս 18։22
«Այսպէս էլ իմ երկնաւոր Հայրը կանէ ձեզ, եթէ դուք ամէն մէկդ իր եղբօրը՝ ձեր բոլոր սրտիցը չթողէք նորանց յանցանքը»։ Մատթեոս 18։35
Անահիտ ԲԱՆՈՒՉՅԱՆ
