Բարեկամնե՛ր, Մերկերիոս զորավարի վարքը գտա, փառք Աստծո: Երկու խոսք նրա մասին:
Երրորդ դարում է ապրել: Առաջին Հայքի հռոմեական բանակի աստիճանավոր էր: Եվ ահա Աստծո հրեշտակը հայտնվում է նրան եւ մի սուր տալով ասում է՝ վերցրու եւ հակառակորդի բանակը կոտորիր, բայց Աստծուդ անունը չմոռանաս: Մերկերիոսը, կարծելով, թե իշխան է իրեն հրամայողը, վերցնում է սուրը եւ կոտորում է հակառակորդի բանակն ու սպանում նրանց թագավորին: Եղածից ապշահար՝ Մերկերիոսին դարձնում են գլխավոր հրամանատար: Եվ Աստծո հրեշտակը կրկին է հայտնվում Մերկերիոսին, եւ հասկանում է զորավարը, որ Աստվա՛ծ իրեն բարձրացրեց:
-Քո Տեր Աստծու անունը չմոռանաս,- կրկին պատվիրում է հրեշտակը:
Եվ երբ թագավորն ու մեծամեծերը սկսում են դիցերին պաշտել, զորավարը արհամարհում է դիցերին եւ ասում, թե հարկ է միայն ԿԵՆԴԱՆԻ ԱՍՏԾՈՒՆ ՊԱՇՏԵԼ: Մերկերիոսին բազմաթիվ չարչարանքներ տալուց հետո գլխատում են: Նահատակվելուց հետո Մերկերիոս զորավարը մնում է Տիրոջ ԳՈՐԾՈՒՆ ՍՐԲԵՐԻՑ:
Պատմության հրեշներից Հուլիանոս Ուրացողը մեռնելիս վկայում է, որ Մերկերիոս զորավարը հանկարծակի երեւաց եւ սուրը իր կողը խրեց.. .
Ապարանյան Վարդենուտ գյուղում (Արագածոտնի մարզ) Մերկերիոս սուրբ զորավարի անունով եկեղեցի (13-րդ դար) կա, որը 2019 թ. են բարեկարգել ու վերաօծել:
Մաքսիմ ՈՍԿԱՆՅԱՆ
