Արժե լինել ազնիվ

«Աղօթք արէք մեզ համար, որովհետեւ համոզուած ենք, որ բարի խղճմտանք ունինք՝ կամենալով ամեն բանի մէջ բարւոք վարուիլ»:

Եբրայեցիս 13:18

Աստվածաշնչում հաճախ հանդիպող խոսքը, որ հիմնականում թարգմանվում է որպես «ազնվություն», բառացի նշանակում է «այն` ինչ իրականում լավ է»: Այն կարող է նշանակել նաեւ մի բան, ինչը շատ գեղեցիկ է բարոյականության տեսանկյունից:

Քրիստոնյաները շատ լուրջ են վերաբերվում Պողոս առաքյալի Աստվածահաճո խոսքերին, թե` մենք ամեն հարցում ցանկանում ենք առաջնորդվել ազնվությամբ:

Ներքին պայքար

Մարդկանց մեծ մասը ամեն առավոտ փողոց դուրս գալուց առաջ նայում է հայելու մեջ: Ինչի՞ համար: Յուրաքանչյուրը ցանկանում է հնարավորինս լավ տեսք ունենալ: Բայց կան շատ ավելի կարեւոր բաներ, քան նորաձեւ հագուստը կամ ժամանակակից սանրվածքը: Այն, թե ինչպիսին ենք մենք ներքուստ: Կամ պետք է ավելացնենք մեր գրավչությունը, կամ զրկենք մեզ դրանից: Աստծո խոսքը պարզ ասում է, որ մարդը հակված է վատ արարքների. «Եւ Եհովան անոյշ հոտը հոտոտաց, եւ Եհովան ասեց իր սրտումն. այլեւս չեմ անիծիլ երկիրը մարդի պատճառով, որովհետեւ մարդի սրտի խորհուրդը չար է իր մանկութիւնիցը, եւ այլեւս չեմ զարկիլ բնաւ ոչ մի կենդանի, ինչպես արի»: Ծննդոց 8:21

Դրա համար, որպեսզի մնանք ազնիվ, հարկավոր է անընդհատ պայքարել ի ծնե ունեցած մեղավոր մղումների դեմ:

Պողոս առաքյալը ասում է. «Որովհետեւ ես հաւանում եմ Աստուծոյ օրէնքին` ներսի մարդովը: Բայց տեսնում եմ ուրիշ օրէնք իմ անդամներումը` որ իմ մտքի օրէնքի դեմ պատերազմում է եւ ինձ գերի է բռնում այն մեղքի օրէնքովը` որ իմ անդամներումն է»:  Հռովմեացիս 7:22, 23

Երբ մեր սիրտը մեզ մղում է վատ արարքների, եւ մենք ունենում ենք մեղք գործելու գայթակղություն, պարտավոր չենք ստրկորեն ենթարկվել սրտի թելադրանքին: Մենք միշտ ունենք ընտրելու հնարավորություն: Մեզնից վանելով սխալ մտքերը, մենք հնարավորություն ենք ստանում մնալու ազնիվ, չնայած շուրջբոլորը տիրող անարդարություններին:

Ազնիվ լինելու համար մեզ հարկավոր է հստակ բարոյական կոդեքս: Ցավոք, մարդկանց մեծամասնությունն աշխատում է իր իմիջի վրա, քան բարոյական կերպարի: Դրա համար, երբ խոսքը վերաբերում է շահին, նրանք պատրաստ են արդարացնելու մի փոքր կեղծիքն ու անազնվությունը:

Ամենաճիշտ կոդեքսը կարելի է գտնել Աստվածաշնչում. «Տիրոջ օրէնքը անարատ է, հանգստացնում է հոգիին. Տիրոջ վկայութիւնը ճշմարիտ է, իմաստուն է անում պարզամիտին» (Սաղմոս 19:7): Այն տալիս է վստահ առաջնորդություն ընտանեկան կյանքի հարաբերություններում, աշխատանքում, բարոյականության ու հոգեւոր արժեքների պահպանման մեջ: Աստվածաշունչը բռնել է ժամանակի քննությունը: Նրա օրենքներն ու սկզբունքները կիրառելի են բոլորր ազգությունների ու ռասաների մարդկանց համար: Աստվածաշնչի ուսումնասիրությունը, նրա խոսքերի շուրջ մտորումներն ու կիրառումը կօգնեն մեզ մեր սիրտը սովորեցնելու ազնվության:

Սակայն միայն աստվածաշնչյան գիտելիքները բավարար չեն այս անիրավ երկրում գայթակղություններին դիմադրելու համար: Հարկավոր է աղոթել Աստծուն, որպեսզի Նա օգնի մեզ այս դժվարին պայքարում:

«Ոչինչ հոգս մի անէք. այլ ամեն բանում աղօթքով եւ աղաչանքով եւ գոհութիւնով` ձեր խնդրուածքները թող յայտնի լինեն Աստուծուն: Եւ Աստուծոյ խաղաղութիւնը, որ ամեն մտքից վեր է, կպահպանէ ձեր սրտերն ու միտքերը Քրիստոս Յիսուսումը: … Ամեն բան կարող եմ ինձ զօրացնող Քրիստոսով»: Փիլիպեցիս 4: 6,7,13

Այս դեպքում մենք կունենանք համարձակություն` գործելու ճիշտ եւ ազնիվ:

Անահիտ ԲԱՆՈՒՉՅԱՆ