Հանդիսապետությամբ Ն.Ս.Օ.Տ.Տ. Գարեգին Երկրորդ Ծայրագույն պատրիարք եւ Ամենայն հայոց կաթողիկոսի, Արմավիրի թեմի Սուրբ Աստվածածին եկեղեցում (ք. Էջմիածին) հունվարի 27-ին, Հայոց բանակի օրվա կապակցությամբ կատարվել է հանրապետական մաղթանք։ Այս մասին հայտնել են Մայր Աթոռի տեղեկատվական համակարգից:
Սրբազան արարողությանը ներկա էին ՀՀ ԶՈՒ բարձրագույն սպայական կազմի ներկայացուցիչներ, Մայր Աթոռի միաբաններ եւ ՀՀ ԶՈՒ հոգեւոր առաջնորդության գնդերեցներ: Հոգեւոր դասը եւ արարողությանը ներկա զինվորականներն ու ժողովուրդը աղոթք են բարձրացրել առ Աստված Հայաստանի եւ Արցախի խաղաղության, անսասանության ու Հայոց բանակի հաղթական ընթացքի համար: Այնուհետեւ Ամենայն Հայոց հայրապետը Հայոց բանակի օրվա առիթով իր խոսքն է ուղղել եկեղեցում ներկա սպաներին, զինվորներին, գնդերեցներին եւ հավատացյալներին։
Հանրապետական մաղթանքից հետո Գեւորգյան հոգեւոր ճեմարանի հանդիսությունների դահլիճում տեղի է ունեցել պաշտոնական ընդունելություն, որի ընթացքում կատարվել է պարգեւաբաշխություն: Ի գնահատություն հայրենիքին մատուցած ծառայությունների՝ Ամենայն հայոց կաթողիկոսը, ընդառաջ ՀՀ ԶՈՒ հոգեւոր առաջնորդության միջնորդությանը, Հայոց եկեղեցու «Սուրբ Ներսես Շնորհալի» պատվո բարձր շքանշանի է արժանացրել ՀՀ ՊՆ եւ ԱՀ ՊԲ մի շարք զինվորականների՝ գնդապետներ Կարեն Ջալավյանին, Արթուր Պողոսյանին, Նորայր Մկրտչյանին, Գագիկ Ասլանյանին, Արեն Սարգսյանին եւ Էրիկ Գրիգորյանին։ Նորին սրբությունը «Սուրբ Ներսես Շնորհալի» շքանշան է հանձնել նաեւ ՀՀ ՊՆ տեղակալ Արման Սարգսյանին եւ ՀՀ պաշտպանության նախարարության գլխավոր քարտուղարի տեղակալ Տիգրան Ղարիբյանին։
Ընդունելության ժամանակ ՀՀ պաշտպանության նախարարի հրամանով զինծառայողների հոգեւոր եւ հայրենասիրական դաստիարակության գործում զգալի ավանդի համար մի շարք եկեղեցականներ արժանացել են նախարարության պարգեւների: «Մարշալ Բաղրամյան» մեդալ է շնորհվել ՀՀ ԶՈՒ հոգեւոր առաջնորդ Հոգեշնորհ տ. Մովսես վարդապետ Սարգսյանին։
«Անդրանիկ Օզանյան» մեդալով պարգեւատրվել են քրեակատարողական հիմնարկների հոգեւոր տեսուչ հոգեշնորհ տ. Ռուբեն վարդապետ Զարգարյանը, Սուրբ Շողակաթ վանքի վանահայր հոգեշնորհ տ. Արիս աբեղա Տոնոյանը, ավագ գնդերեց արժանապատիվ տ. Պսակ քահանա Մկրտչյանը, գնդերեցներ արժանապատիվ տ. Մանուկ քահանա Զեյնալյանը եւ տ. Տրդատ քահանա Գեւորգյանը: «Դրաստամատ Կանայան» մեդալ է շնորհվել գնդերեցներ Գագիկ սարկավագ Հակոբյանին, Մինաս սարկավագ Կարապետյանին, Լորիս սարկավագ Անդրեասյանին, Սիմոն սարկավագ Իգիթյանին, Գեւորգ սարկավագ Միրզոյանին, Արթուր սարկավագ Օհանյանին, Արթուր սարկավագ Արամյանին։
Պարգեւաբաշխությունից հետո Ամենայն հայոց կաթողիկոսն իր հայրական օրհնությունն ու բարեմաղթանքներն է փոխանցել ներկաներին։
