Եփրատ գետը նախկինում հոսում էր սիրիական բերքառատ զեյթունի այգիներով պարուրված… Այժմ գետի զգալի մասը ցամաքած է, եւ նախկին ծաղկուն այգիների տեղում հողը պապակ է ու անապատացած։ Եփրատը հին աշխարհի օրրաններից էր, որ սնում էր մի քանի երկիր, եզերում դրախտը, այսօր այն դառնում է աշխարհի վերջի մոտեցման խորհրդանիշներից. «Եւ վեցերորդ հրեշտակն իր սկաւառակը թափեց մեծ գետ՝ Եփրատի վերայ, եւ նորա ջուրը ցամաքեց, որ արեւելքի թագաւորների ճանապարհը պատրաստուի»։ Հայտնություն 16։12
Ինչո՞ւ են գերտերություններն անընդհատ թեժ պահում իրավիճակը Իրաքում, Սիրիայում, Թուրքիայի շուրջ, անվերապահ աջակցություն ցուցաբերում Իսրայելին։ Նրանք պատմության ընթացքին փորձում են նայել աստվածաշնչյան աչքերով, սակայն մի բայցով՝ փորձում են հայտնության գրքի մարգարեություններն իրականացնել մարդու ձեռամբ…
Եփրատը միակ գետն է, որ հիշատակված է Հայտնության գրքում, եւ հաճախ հարկավոր է ժամանակակից նորություններն ընկալել, դրանց նայել հայտնության աչքերով, եւ մեզ համար շատ բան կպարզաբանվի։ Նախկինում Եփրատ գետը համարվում էր այն սահմանը, որը բյուզանդական կայսրությունը պաշտպանում էր արեւելքի նվաճողներից։ Այժմ, երբ Եփրատը ցամաքում է, նշանակում է՝ վերանում են այդ սահմանները, եւ պատերազմներն այլեւս լինելու են համամոլորակային ծավալներով։ Եվ բացարձակապես ոչ ոք չի կարող իրեն անվտանգ զգալ։ Ցանկացած պատերազմ վեր է ածվելու տարերային աղետների, մարդկային կորուստների՝ սոցիալական, բնապահպանական…
«Եւ տեսայ՝ վիշապի բերանիցը եւ սուտ մարգարէի բերանիցը երեք պիղծ հոգի էին դուրս գալիս գորտերի նման։ Որովհետեւ նորանք դեւերի ոգիք են, որ նշաններ են անում, նորանք գնում են երկրի եւ բովանդակ տիեզերքի թագաւորների մօտ, որ նորանց ժողովեն Ամենակարող Աստուծոյ այն մեծ օրուայ պատերազմի համար»։ Հայտնություն 16։13-14
Գորտերն այստեղ ժամանակակից հակաքրիստոնեական խավար ուժերն են։ Դրանք, կարելի է մեկնաբանել նաեւ, որ այսօրվա համացանցային հնարավորություններն են, որտեղ սովորեցնում են ցանկացած պղծությունների, հեռուստաալիքներն են, որոնք, անկախ երկրից ու հեռարձակման լեզվից, նույն աղբն են սփռում եթեր։ Ամենուր նույն դժոխային խոհանոցն է գործում, ամենուր նույն գորտերն են։ Ելից գրքում նկարագրված է, թե ինչպես է Աստծո ցուցումով Եգիպտոսը ծածկվում գորտերով. «Եւ Եհովան ասեց Մովսէսին. Այսպես ասիր Ահարօնին. Ձեռքդ մեկնիր քո գաւազանովը առուների վերայ, գետերի եւ լճերի վերայ, եւ Եգիպտոսի երկրի վերայ գորտեր հանիր։ Եւ Ահարօնը մեկնեց իր ձեռքը Եգիպտոսի ջրերի վերայ. եւ գորտերը ելան եւ Եգիպտոսի երկիրը ծածկեցին»։ Ելից 8։5-6
Գորտերի մեջ կան նաեւ թունավոր տեսակներ, որոնք աստվածաշնչյան վերլուծաբանները մեկնաբանում են որպես ստի թույն, գազանի թունավոր ստահոդություն, թունավոր ստահոդություն։ Դեռ Հայտնության գրքի երրորդ գլխում է Տերը Սարդեսի եկեղեցուն զգուշացնում, թե եթե չարթնանա, կգա գողի պես. «Արդ յիշիր, թէ ինչպէս ընդունեցիր եւ լսեցիր. եւ պահիր եւ ապաշխարիր. ապա թէ չարթնանաս՝ ես կգամ քեզ վերայ գողի պէս. եւ չես իմանալ, թէ որ ժամում քեզ մօտ կգամ»։ Հայտնություն 3։3
Եվ այժմ էլ, համաշխարհային պատմության ավարտին Նա եւս մեկ անգամ զգուշացնում է, բայց արդեն այլ կերպ՝ ոչ թե որ կգա, այլ՝ որ գալիս է. «Ահա գալիս եմ գողի նման, երանի նորան, որ արթուն է, եւ իր հանդերձները պահում է, որ մերկ ման չգայ, եւ նորա ամօթանքը չտեսնեն»։ Հայտնություն 16։15
Անահիտ ԲԱՆՈՒՉՅԱՆ
